ബെയ്ജിംഗ്: തായ്വാൻ പ്രസിഡന്റുമായി നടന്ന അഭിമുഖത്തെ തുടർന്ന് അമേരിക്കൻ മാധ്യമസ്ഥാപനമായ ന്യൂയോർക്ക് ടൈംസിന്റെ (NYT) ഒരു മാധ്യമപ്രവർത്തകയെ ചൈനയിൽ നിന്ന് പുറത്താക്കിയതായി റിപ്പോർട്ട്. തായ്വാനെ അന്താരാഷ്ട്ര തലത്തിൽ ഒറ്റപ്പെടുത്താനുള്ള ബെയ്ജിംഗിന്റെ ശ്രമങ്ങൾ ശക്തമാകുന്നതിനിടെയാണ് നടപടി.
ന്യൂയോർക്ക് ടൈംസ് റിപ്പോർട്ടർ വിവിയൻ വാങിനെയാണ് ഫെബ്രുവരിയിൽ രാജ്യം വിടാൻ ചൈനീസ് അധികൃതർ നിർദേശിച്ചത്. ബെയ്ജിംഗ് വിദേശ മാധ്യമപ്രവർത്തകരിൽ കൂടുതൽ സമ്മർദ്ദം ചെലുത്തുന്നതിന്റെ ഏറ്റവും പുതിയ ഉദാഹരണമാണ് ഈ നടപടിയെന്ന് NYT റിപ്പോർട്ട് ചെയ്തു. ചൈനീസ് അധികൃതരുടെ വിശദീകരണമനുസരിച്ച്, 2024 ഡിസംബറിൽ ന്യൂയോർക്ക് ടൈംസ് സംഘടിപ്പിച്ച ഉച്ചകോടിയിൽ തായ്വാൻ പ്രസിഡന്റ് ലൈ ചിങ്-തെയുമായി നടത്തിയ അഭിമുഖമാണ് നടപടിക്ക് കാരണമായത്. ആ അഭിമുഖം മാധ്യമപ്രവർത്തകൻ ആൻഡ്രൂ റോസ് സോർക്കിൻ വീഡിയോ ലിങ്ക് വഴി നടത്തിയതായിരുന്നു.2022 മുതൽ ബെയ്ജിംഗിൽ പ്രവർത്തിച്ചിരുന്ന വിവിയൻ വാങ് ഈ അഭിമുഖത്തിൽ പങ്കെടുത്തിരുന്നില്ലെന്നും റിപ്പോർട്ടിൽ പറയുന്നു
തായ്വാൻ പ്രസിഡന്റിനെ ചൈന “വിഘടനവാദി”യും “പ്രശ്നകാരൻ” എന്നും വിശേഷിപ്പിച്ചിട്ടുള്ളതാണ്. അതിനാൽ അദ്ദേഹവുമായി ബന്ധപ്പെട്ട റിപ്പോർട്ടിംഗുകൾ ബെയ്ജിംഗ് കർശനമായി നിരീക്ഷിച്ചുവരികയാണ്. ഇതിനിടെ, ഈ നടപടിക്ക് പ്രതികാരമായി അമേരിക്കയിലെ ചൈനീസ് സർക്കാർ മാധ്യമത്തിലെ ഒരു മാധ്യമപ്രവർത്തകയുടെ വിസ റദ്ദാക്കിയതായി ന്യൂയോർക്ക് ടൈംസ് റിപ്പോർട്ട് ചെയ്തു. എന്നാൽ ഈ നടപടി തങ്ങൾ ആവശ്യപ്പെട്ടതല്ലെന്നും പത്രം വ്യക്തമാക്കിയിട്ടുണ്ട്.
വിവിയൻ വാങിന്റെ റിപ്പോർട്ടിങ്ങിനെതിരെ സെൻസർഷിപ്പ്, കോവിഡ്-19 നിയന്ത്രണം, സർക്കാർ നിരീക്ഷണ സംവിധാനം തുടങ്ങിയ വിഷയങ്ങളിലെ റിപ്പോർട്ടുകൾ ഉൾപ്പെടെ ചൈനീസ് അധികൃതർ മാസങ്ങളായി അതൃപ്തി പ്രകടിപ്പിച്ചിരുന്നുവെന്നും റിപ്പോർട്ടിൽ പറയുന്നു. ഈ സംഭവത്തോടെ തായ്വാൻ വിഷയത്തിൽ വിദേശ മാധ്യമങ്ങൾക്ക് മേൽ ചൈന പുതിയ കടുത്ത നിലപാട് സ്വീകരിക്കുന്നുവെന്ന വിലയിരുത്തലും ഉയർന്നിട്ടുണ്ട്. അതേസമയം, വിഷയത്തിൽ ചൈനയുടെ വിദേശകാര്യ മന്ത്രാലയവും യുഎസ് സ്റ്റേറ്റ് ഡിപ്പാർട്ട്മെന്റും ഔദ്യോഗിക പ്രതികരണം നൽകിയിട്ടില്ല.
China has expelled a New York Times journalist from the country over an interview the US-based newspaper conducted with Taiwan’s president
