വാഷിംഗ്ടൺ: അമേരിക്കയിൽ ജനിക്കുന്ന വിദേശ സർക്കാർ ജീവനക്കാരുടെ കുട്ടികൾക്ക് ജനനസമയത്ത് സ്വയമേവ ലഭിച്ചിരുന്ന ജന്മാവകാശ യു.എസ് പൗരത്വം നിർത്തലാക്കുന്നു. പകരം ഇവർക്ക് യു.എസ്സിൽ സ്ഥിരതാമസത്തിനുള്ള ഗ്രീൻ കാർഡിന് അപേക്ഷിക്കാമെന്ന് യു.എസ് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) വ്യക്തമാക്കി. ഇത് സംബന്ധിച്ച് കഴിഞ്ഞ സെപ്റ്റംബറിൽ പുറപ്പെടുവിച്ച നിയമത്തിൽ (interim final rule) അബദ്ധത്തിൽ പെട്ടുപോയ രേഖകൾ സംബന്ധിച്ച നിബന്ധനകൾ പുതുക്കിക്കൊണ്ടാണ് ഡി.എച്ച്.എസ് ഇപ്പോൾ വ്യക്തത വരുത്തിയിരിക്കുന്നത്.
പുതുക്കിയ നിയമപ്രകാരം, അമേരിക്കയിൽ ജനിക്കുന്ന കുട്ടിയുടെ മാതാപിതാക്കളിൽ ഒരാളെങ്കിലും യു.എസ് പൗരനല്ലെങ്കിൽ, ആ കുട്ടിക്ക് ജനനത്തിലൂടെയുള്ള യു.എസ് പൗരത്വം ലഭിക്കില്ല. ഈ ഭേദഗതിക്ക് 2026 സെപ്റ്റംബർ 4 മുതൽ മുൻകാലപ്രാബല്യം ഉണ്ടായിരിക്കും. ഈ തീയതിക്കോ അതിനുശേഷമോ ജനിച്ച കുട്ടികൾക്ക് പുതിയ നിയമം ബാധകമാണ്.
വിദേശ നയതന്ത്ര ഉദ്യോഗസ്ഥർ, വിദേശ സർക്കാരുകൾക്ക് വേണ്ടി ഔദ്യോഗിക പദവിയിൽ ജോലി ചെയ്യുന്ന മറ്റ് ജീവനക്കാർ, നയതന്ത്ര പരിരക്ഷയുള്ള അന്താരാഷ്ട്ര സംഘടനകളിലെ ജീവനക്കാർ എന്നിവരുടെ കുട്ടികൾക്കാണ് ഈ നിയമം ബാധകമാകുക. എന്നാൽ വിദേശ മിഷനുകളിലോ വിദേശ സർക്കാരുകളിലോ മറ്റ് താൽക്കാലിക പദവികളിൽ ജോലി ചെയ്യുന്നവരെ ഈ പരിധിയിൽ നിന്ന് ഒഴിവാക്കിയിട്ടുണ്ട്.
യോഗ്യരായ കുട്ടികൾക്ക് നിയമാനുസൃത സ്ഥിരതാമസക്കാരായി രജിസ്റ്റർ ചെയ്യാനുള്ള വഴി ഈ ഭേദഗതിയിലൂടെ തുറന്നു കിട്ടും. എന്നാൽ ഈ രജിസ്ട്രേഷൻ നിർബന്ധമല്ലെന്നും പൂർണ്ണമായും സ്വമേധയാ ഉള്ളതാണെന്നും ഡി.എച്ച്.എസ് അറിയിച്ചു. ഒരു ഗ്രീൻ കാർഡ് ലഭിക്കുന്നത് വഴി സ്ഥിരതാമസ പദവി ലഭിക്കുമെങ്കിലും ഇവർ യു.എസ് പൗരന്മാരായി മാറില്ല. യു.എസ് നിയമപ്രകാരം പൗരന്മാർക്കും സ്ഥിരതാമസക്കാർക്കും വ്യത്യസ്ത അവകാശങ്ങളാണ് ഉള്ളത്.
അപേക്ഷകർ കുട്ടി യു.എസ്സിൽ ജനിച്ചതാണെന്ന തെളിവും, ജനനസമയത്ത് മാതാപിതാക്കളിൽ ആരെങ്കിലും വിദേശ സർക്കാർ ജീവനക്കാരനായിരുന്നു എന്നതിന്റെ രേഖകളും സമർപ്പിക്കണം. നയതന്ത്ര പദവിയില്ലാത്ത ജീവനക്കാരുടെ കാര്യത്തിലും വ്യക്തമായ മാർഗ്ഗനിർദ്ദേശങ്ങൾ പുറപ്പെടുവിച്ചിട്ടുണ്ട്. നയതന്ത്ര ആനുകൂല്യങ്ങൾ ഒഴിവാക്കുന്നതിനുള്ള Form I-508 ചില അപേക്ഷകർക്ക് ഇനി ആവശ്യമില്ലെന്നും, പകരം മാതാപിതാക്കളുടെ ഔദ്യോഗിക ജോലി തെളിയിക്കുന്ന രേഖകൾ മതിയെന്നും ഡി.എച്ച്.എസ് വ്യക്തമാക്കി. അപേക്ഷകൾക്കായി Form I-485, Form G-325R എന്നിവയിൽ ആവശ്യമായ മാറ്റങ്ങൾ വരുത്തിയിട്ടുണ്ട്.
ജനുവരിയിൽ പുറത്തിറക്കിയ എക്സിക്യൂട്ടീവ് ഓർഡർ 14160-ലൂടെ, യു.എസ്സിൽ ജനിക്കുന്നവർക്ക് ജന്മാവകാശ പൗരത്വം നൽകുന്ന രീതി പരിമിതപ്പെടുത്താൻ ട്രംപ് ഭരണകൂടം ശ്രമിക്കുന്നതിനിടയിലാണ് ഡി.എച്ച്.എസിന്റെ പുതിയ നീക്കം. നിലവിൽ ഈ നിയമം പ്രാബല്യത്തിലുണ്ടെങ്കിലും, ഇത് സംബന്ധിച്ച പൊതുജനങ്ങളുടെ അഭിപ്രായങ്ങൾ ഡി.എച്ച്.എസ് സ്വീകരിച്ചു വരികയാണ്.
Amendment to US Citizenship Law: Children of foreign government employees no longer eligible for birthright citizenship; eligible for Green Card.
