സൗദി അറേബ്യയിലെ റിയാദ് അന്താരാഷ്ട്ര വിമാനത്താവളത്തിന് നേരെയുണ്ടായ മിസൈൽ ആക്രമണത്തെ ശക്തമായി അപലപിച്ച് ഇന്ത്യ. സാധാരണക്കാർക്കും അവരുടെ അടിസ്ഥാന സൗകര്യങ്ങൾക്കും നേരെയുള്ള ആവർത്തിച്ചുള്ള ആക്രമണങ്ങൾ “ഒരിക്കലും അംഗീകരിക്കാനാവില്ല” എന്ന് വിദേശകാര്യ മന്ത്രാലയം വ്യക്തമാക്കി. ഒക്ടോബർ 10ന് ഉൾപ്പെടെ കഴിഞ്ഞ ദിവസങ്ങളിൽ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ തുടർച്ചയായ ആക്രമണങ്ങളെ ശക്തമായി അപലപിക്കുന്നതായി വിദേശകാര്യ മന്ത്രാലയം പ്രസ്താവനയിൽ പറഞ്ഞു. ആക്രമണങ്ങളിൽ ആളപായവും പരിക്കുകളും വസ്തുവകകൾക്ക് നാശനഷ്ടവും ഉണ്ടായതായും മന്ത്രാലയം വ്യക്തമാക്കി.
സാധാരണക്കാർക്കും സിവിലിയൻ അടിസ്ഥാന സൗകര്യങ്ങൾക്കും നേരെയുള്ള ആക്രമണങ്ങൾ ഉടൻ അവസാനിപ്പിക്കണമെന്നും ഇന്ത്യ ആവശ്യപ്പെട്ടു. സൗദി അറേബ്യയുടെ പരമാധികാരം സംരക്ഷിക്കുന്നതിനുള്ള രാജ്യത്തെ ജനങ്ങൾക്കും സർക്കാരിനും ഇന്ത്യ പിന്തുണ അറിയിച്ചു. മേഖലയിൽ എത്രയും വേഗം സമാധാനവും സാധാരണ നിലയും പുനഃസ്ഥാപിക്കപ്പെടുമെന്നാണ് പ്രതീക്ഷയെന്നും മന്ത്രാലയം വ്യക്തമാക്കി.
അതേസമയം, ഹൂതി ആക്രമണത്തിൽ 12 പേർ കൊല്ലപ്പെടുകയും 300ലധികം പേർക്ക് പരിക്കേൽക്കുകയും ചെയ്തിട്ടുണ്ട്. ആഭ്യന്തര സർവീസുകൾക്കായുള്ള ടെർമിനലുകൾ 3, 4 എന്നിവ ഉൾപ്പെടുന്ന കിങ് ഖാലിദ് അന്താരാഷ്ട്ര വിമാനത്താവള സമുച്ചയത്തിനാണ് മിസൈൽ പതിച്ചതെന്നാണ് റിപ്പോർട്ട്. ഇറാൻ യുദ്ധം ആരംഭിച്ചതിനുശേഷം ഗൾഫ് അറബ് രാജ്യങ്ങളിലുണ്ടായ ഏറ്റവും മാരകമായ ആക്രമണമാണിത്. യെമനിൽ സൗദി പിന്തുണയുള്ള സർക്കാർ സേനയും ഹൂതി വിമതരും തമ്മിലുള്ള പോരാട്ടം ശക്തമായതോടെ സംഘർഷം മറ്റ് മേഖലകളിലേക്കും വ്യാപിച്ചിരിക്കുകയാണ്.
ഇറാന്റെ പിന്തുണയുള്ള ഹൂതികൾ ആക്രമണം ശക്തമാക്കിയതോടെ ഒരു ദശാബ്ദത്തിലേറെയായി സൗദി അറേബ്യയിലുണ്ടായ ഏറ്റവും മാരകമായ ആക്രമണമാണ് റിയാദിലേത്. ഈ ആഴ്ച വിമാനത്താവളത്തിന് നേരെയുണ്ടായ മൂന്നാമത്തെ ആക്രമണത്തിൽ കൊല്ലപ്പെട്ടവരിൽ നാല് സൗദി പൗരന്മാരും രണ്ട് ബംഗ്ലാദേശ് പൗരന്മാരും ഉൾപ്പെടുന്നു. യുഎസ്, ജോർദാൻ, പലസ്തീൻ, സിറിയ, സുഡാൻ, ഈജിപ്ത് എന്നീ രാജ്യങ്ങളിൽനിന്നുള്ള ഓരോരുത്തരും കൊല്ലപ്പെട്ടതായി സൗദി സിവിൽ ഏവിയേഷൻ അതോറിറ്റി അറിയിച്ചു. പരിക്കേറ്റവരുടെ എണ്ണം 309 ആയി ഉയർന്നതായും അധികൃതർ വ്യക്തമാക്കി.
അതേസമയം, ഹൂതികൾക്കെതിരായ സൗദി അറേബ്യയുടെ സൈനിക നീക്കത്തിൽ അമേരിക്കയും പങ്കുചേരുന്നത് പരിഗണനയിലാണെന്ന് പ്രസിഡന്റ് ഡോണൾഡ് ട്രംപ് പറഞ്ഞു. ഹൂതികൾക്കെതിരായ സൗദിയുടെ ആക്രമണങ്ങളിൽ അമേരിക്ക പങ്കെടുക്കുമോയെന്ന മാധ്യമപ്രവർത്തകരുടെ ചോദ്യത്തിന്, “പങ്കെടുത്തേക്കാം. ഇക്കാര്യം പരിശോധിക്കും. ഏറ്റവും പുതിയ ആക്രമണത്തെക്കുറിച്ച് ഇപ്പോഴാണ് അറിഞ്ഞത്. അതിനാൽ തീരുമാനമെടുക്കും. ഞങ്ങൾ വേഗത്തിൽ നീങ്ങും,” എന്നായിരുന്നു ട്രംപിന്റെ മറുപടി.
‘Completely unacceptable’: India condemns attack on Saudi’s Riyadh airport that killed 12
