തമിഴ്നാട് നിയമസഭാ തിരഞ്ഞെടുപ്പിൽ ഏറ്റവും വലിയ ഒറ്റകക്ഷിയായ വിജയ് നയിക്കുന്ന തമിഴക വെട്രി കഴകത്തിന് (ടിവികെ) പിന്തുണ നൽകാൻ കോൺഗ്രസ് തീരുമാനിച്ചു. ഇതോടെ തമിഴ്നാട്ടിൽ ടിവികെ-കോൺഗ്രസ് സഖ്യം അധികാരത്തിലേറാനുള്ള സാധ്യത തെളിഞ്ഞു. ചെന്നൈയിൽ ചേർന്ന കോൺഗ്രസ് രാഷ്ട്രീയകാര്യ സമിതി യോഗത്തിലാണ് ഇതുസംബന്ധിച്ച അന്തിമ തീരുമാനമുണ്ടായത്. പിന്തുണ നൽകുന്നതിന് പകരമായി രണ്ട് മന്ത്രിസ്ഥാനങ്ങളും പ്രധാനപ്പെട്ട ബോർഡ്, കോർപ്പറേഷൻ പദവികളും കോൺഗ്രസ് ആവശ്യപ്പെട്ടിട്ടുണ്ട്.
സംസ്ഥാനത്തെ രാഷ്ട്രീയ സാഹചര്യം വിലയിരുത്തി തീരുമാനമെടുക്കാൻ എഐസിസി നേതൃത്വം തമിഴ്നാട് പിസിസിക്ക് അധികാരം നൽകിയതോടെയാണ് നിർണ്ണായക നീക്കമുണ്ടായത്. ഡൽഹിയിൽ കെ.സി. വേണുഗോപാൽ, ജയറാം രമേശ് എന്നിവരുടെ നേതൃത്വത്തിൽ ചേർന്ന യോഗത്തിന് പിന്നാലെയാണ് സംസ്ഥാന ഘടകം അടിയന്തര യോഗം വിളിച്ചത്. നേരത്തെ സർക്കാർ രൂപീകരണത്തിന് പിന്തുണ തേടി വിജയ് കോൺഗ്രസ് നേതൃത്വത്തിന് കത്തയച്ചിരുന്നു.
രൂപീകരിച്ച് വെറും രണ്ട് വർഷത്തിനുള്ളിൽ നേരിട്ട ആദ്യ തിരഞ്ഞെടുപ്പിൽ തന്നെ 107 സീറ്റുകൾ നേടിയാണ് ടിവികെ തമിഴ്നാട്ടിൽ ചരിത്രം കുറിച്ചത്. മത്സരിച്ച രണ്ട് മണ്ഡലങ്ങളിലും വൻ ഭൂരിപക്ഷത്തിലാണ് വിജയ് വിജയിച്ചത്. പെരമ്പൂരിൽ 53,715 വോട്ടിന്റെയും തിരുച്ചിറപ്പള്ളി ഈസ്റ്റിൽ 27,416 വോട്ടിന്റെയും ഭൂരിപക്ഷം അദ്ദേഹം നേടി. ഡിഎംകെ സഖ്യത്തിന് 73 സീറ്റുകളും എഐഎഡിഎംകെ സഖ്യത്തിന് 52 സീറ്റുകളും മാത്രമാണ് നേടാനായത്. കൊളത്തൂരിൽ മുഖ്യമന്ത്രി എം.കെ. സ്റ്റാലിൻ ടിവികെ സ്ഥാനാർത്ഥിയോട് പരാജയപ്പെട്ടത് ഡിഎംകെയ്ക്ക് വലിയ ആഘാതമായി.
234 അംഗ നിയമസഭയിൽ കേവല ഭൂരിപക്ഷത്തിന് 118 സീറ്റുകളാണ് വേണ്ടത്. 107 സീറ്റുകളുള്ള വിജയ്ക്ക് അധികാരം പിടിക്കാൻ 11 പേരുടെ കൂടി പിന്തുണ ആവശ്യമാണ്. കോൺഗ്രസ് കൂടി പിന്തുണ പ്രഖ്യാപിക്കുന്നതോടെ കേവല ഭൂരിപക്ഷത്തിലേക്ക് ടിവികെ കൂടുതൽ അടുക്കും. ഇതോടെ തമിഴ്നാട്ടിൽ പത്ത് വർഷത്തെ ഡിഎംകെ ഭരണത്തിന് അന്ത്യം കുറിച്ച് വിജയ് മുഖ്യമന്ത്രിയായി പുതിയ മന്ത്രിസഭ അധികാരമേൽക്കുന്നതിനുള്ള ഒരുക്കങ്ങൾ സജീവമായിരിക്കുകയാണ്.
Congress Supports TVK in Tamil Nadu; Demands Two Cabinet Berths
