സ്വാതന്ത്ര്യദിനാഘോഷത്തിൽ എ.ഐ.സി.സി ആസ്ഥാനത്ത് ചരിത്രത്തിലാദ്യമായി വന്ദേമാതരം പൂർണ്ണമായും ആലപിച്ച സംഭവം രാഷ്ട്രീയ കേന്ദ്രങ്ങളിൽ ചർച്ചയാകുന്നു. ദേശീയ ഗീതം മുഴുവനായി പാടുന്നത് തടയാൻ സോണിയ ഗാന്ധിയും രാഹുൽ ഗാന്ധിയും ശ്രമിച്ചെങ്കിലും മറ്റുള്ളവരുടെ ഇടപെടലിൽ ആലാപനം പൂർത്തിയാവുകയായിരുന്നുവെന്ന് ബി.ജെ.പി ഐ.ടി സെൽ മേധാവി അമിത് മാളവ്യ ആരോപിച്ചു. ദേശീയ ഗാനത്തെ അവഹേളിക്കുന്നതിനെതിരെ ശിക്ഷ ഉറപ്പാക്കുന്ന പുതിയ നിയമം നിലവിൽ വന്നതിന്റെ പ്രത്യാഘാതം ഭയന്നാണ് കോൺഗ്രസ് നേതൃത്വം ഒടുവിൽ ഇതിന് വഴങ്ങിയതെന്നും അദ്ദേഹം പരിഹസിച്ചു.
ചടങ്ങിൽ ആലാപനം ആദ്യ രണ്ട് ചരണങ്ങൾ കഴിഞ്ഞും തുടർന്നതോടെ കോൺഗ്രസ് മുൻനിര നേതാക്കൾ അസ്വസ്ഥരാവുകയായിരുന്നു. ഇതിൽ അതൃപ്തി പ്രകടിപ്പിച്ച രാഹുൽ ഗാന്ധിയും സോണിയ ഗാന്ധിയും മല്ലികാർജുൻ ഖാർഗെയും ആലാപനം തടയാൻ ആംഗ്യം കാണിക്കുകയും സേവാദൾ നേതാവിനോട് വിശദീകരണം ചോദിക്കുകയും ചെയ്തു. പുറത്തുനിന്നെത്തിച്ച ഗായക സംഘത്തിന് കൃത്യമായ നിർദ്ദേശം നൽകുന്നതിൽ സംഘാടകർക്ക് സംഭവിച്ച വീഴ്ചയാണ് വന്ദേമാതരം പൂർണ്ണമായി ആലപിക്കാൻ ഇടയാക്കിയതെന്നാണ് ലഭിക്കുന്ന വിവരങ്ങൾ.
അതേസമയം, കോൺഗ്രസ് നേതാക്കൾ വന്ദേമാതരം തടസ്സപ്പെടുത്താൻ ശ്രമിച്ചെന്ന ആരോപണങ്ങൾ പാർട്ടി പൂർണ്ണമായി തള്ളി. ഏറെ നേരമായി നിൽക്കുകയായിരുന്ന എ.ഐ.സി.സി പ്രസിഡന്റ് മല്ലികാർജുൻ ഖാർഗെയ്ക്ക് ഇരിക്കാൻ കസേര കൊണ്ടുവരാനാണ് സോണിയ ഗാന്ധി ആവശ്യപ്പെട്ടതെന്ന് എ.ഐ.സി.സി ജനറൽ സെക്രട്ടറി ജയറാം രമേശ് വ്യക്തമാക്കി. സാംസ്കാരിക മൂല്യങ്ങളോടുള്ള കോൺഗ്രസിന്റെ വിമുഖതയാണ് സ്വാതന്ത്ര്യദിനത്തിൽ പോലും പുറത്തുവന്നതെന്ന് ബി.ജെ.പി ആവർത്തിച്ചു.
Controversy Over Vande Mataram Recital at AICC HQ: BJP Slams Congress Leadership
