ഡിജിറ്റൽ പൂട്ട്, രഹസ്യ കോഡ്; നീറ്റ് സംവിധാനം അത്രമേൽ ഭദ്രമെന്ന് കേന്ദ്രം സുപ്രീം കോടതിയിൽ, പക്ഷേ, ചില ഇടപെടലുകൾ ഉണ്ടായി, അന്വേഷണ നിഴലിൽ എൻടിഎ വിദഗ്ധർ

ന്യൂഡൽഹി: മെഡിക്കൽ പ്രവേശന പരീക്ഷയായ നീറ്റ്-യുജി നടത്തുന്നതിനുള്ള നിലവിലെ സംവിധാനം പൂർണ്ണമായും കുറ്റമറ്റതാണെന്ന് കേന്ദ്ര സർക്കാർ സുപ്രീം കോടതിയെ അറിയിച്ചു. ചോദ്യപേപ്പർ ചോർച്ചയുമായി ബന്ധപ്പെട്ട കേസ് പരിഗണിക്കുന്നതിനിടയിലാണ് സർക്കാർ നിലപാട് വ്യക്തമാക്കിയത്. പരീക്ഷാ പ്രക്രിയയിൽ മനുഷ്യ ഇടപെടലുകൾ ഉണ്ടെന്ന കാര്യം സമ്മതിച്ച സർക്കാർ, ചോദ്യപേപ്പർ തയ്യാറാക്കുന്നത് മുതൽ വിതരണം ചെയ്യുന്നത് വരെയുള്ള സുരക്ഷാ ക്രമീകരണങ്ങൾ കോടതിക്ക് മുന്നിൽ വിശദീകരിച്ചു.

സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത, 100 ചോദ്യങ്ങളുള്ള ഒരു ഫിസിക്സ് പേപ്പർ ഉദാഹരണമായി ചൂണ്ടിക്കാണിച്ചാണ് പരീക്ഷാ രീതി വിവരിച്ചത്.

ചോദ്യപേപ്പർ തയ്യാറാക്കുന്നത് ഇങ്ങനെ

• വിവിധ മോഡറേറ്റർമാരുടെ പാനലുകൾ ചേർന്ന് ആദ്യം 500 ചോദ്യങ്ങൾ അടങ്ങിയ ഒരു ‘ചോദ്യബാങ്ക്’ രൂപീകരിക്കുന്നു.
• ഇതിൽ നിന്നും മറ്റ് മോഡറേറ്റർമാർ 100 ചോദ്യങ്ങൾ വീതം തിരഞ്ഞെടുത്ത് 4 വ്യത്യസ്ത ചോദ്യപേപ്പറുകൾ തയ്യാറാക്കും.
• നാഷണൽ ടെസ്റ്റിംഗ് ഏജൻസി ഡയറക്ടർ ജനറലാണ് ഈ നാല് പേപ്പറുകളിൽ നിന്നും പരീക്ഷയ്ക്കുള്ള രണ്ട് സെറ്റുകൾ തിരഞ്ഞെടുക്കുന്നത്.
• തുടർന്ന് സിസിടിവി, സിഐഎസ്എഫ് സുരക്ഷയിലുള്ള രണ്ട് പ്രിന്റിംഗ് പ്രസ്സുകളിലേക്ക് ഈ ചോദ്യപേപ്പറുകൾ അതീവ സുരക്ഷിതമായ പെട്ടികളിലാക്കി മാറ്റും.
• ഡിജിറ്റൽ പൂട്ടുള്ള ഈ പെട്ടികൾ തുറക്കണമെങ്കിൽ പ്രിന്റിംഗ് പ്രസ്സ് ഉടമ എൻടിഎ ഡയറക്ടർ ജനറലുമായി ബന്ധപ്പെട്ട് പ്രത്യേക കോഡ് കൈപ്പറ്റണം.
• പ്രിന്റിംഗ് പ്രസ്സിൽ പുറത്തുനിന്നുള്ള ആർക്കും പ്രവേശനമുണ്ടാകില്ല. ഈ നടപടികൾ മുഴുവൻ വീഡിയോയിൽ ചിത്രീകരിക്കും.

ചോദ്യപേപ്പർ ഏത് പരീക്ഷാ കേന്ദ്രത്തിലേക്കാണ് അയക്കുന്നതെന്ന് പ്രിന്റിംഗ് പ്രസ്സിലുള്ളവർക്ക് പോലും അറിയാൻ കഴിയില്ലെന്നും, പരീക്ഷാ ഹാളിൽ വെച്ച് സീൽ പൊട്ടിക്കുന്നത് വരെ ചോദ്യപേപ്പറും ഒഎംആർ ഷീറ്റും പൂർണ്ണ സുരക്ഷിതമായിരിക്കുമെന്നും സോളിസിറ്റർ ജനറൽ കോടതിയെ ബോധിപ്പിച്ചു.

നീറ്റ് പരീക്ഷ കമ്പ്യൂട്ടർ അധിഷ്ഠിത പരീക്ഷാ രീതിയിലേക്ക് മാറ്റണമെന്ന് ആവശ്യപ്പെട്ട് ഡോക്ടർമാരുടെ സംഘടനയായ ‘ഫൈമ’ ഉൾപ്പെടെയുള്ളവർ നൽകിയ ഹർജി പരിഗണിക്കവെയായിരുന്നു കേന്ദ്രത്തിൻ്റെ ഈ വിശദീകരണം.

അന്വേഷണ നിഴലിൽ എൻടിഎ വിദഗ്ധർ
കേന്ദ്ര സർക്കാർ പരീക്ഷാ സംവിധാനത്തെ ന്യായീകരിക്കുമ്പോഴും, ചോദ്യപേപ്പർ ചോർച്ചയുമായി ബന്ധപ്പെട്ട അന്വേഷണം എൻടിഎ നിയോഗിച്ച മൂന്ന് വിദഗ്ധരിലേക്ക് നീളുന്നതായി റിപ്പോർട്ടുകൾ വ്യക്തമാക്കുന്നു. പൂനെ സ്വദേശികളായ മനീഷ ഗുരുനാഥ് മന്ധാരെ (ബോട്ടണി, സുവോളജി), പ്രഹ്ലാദ് വിഠൽറാവു കുൽക്കർണി (കെമിസ്ട്രി), മനീഷ സഞ്ജയ് ഹവിൽദാർ (ഫിസിക്സ്) എന്നിവരാണ് അന്വേഷണ പരിധിയിലുള്ളത്.

ഇവരിൽ മനീഷ മന്ധാരെ ഡൽഹിയിലെ എൻടിഎ ആസ്ഥാനത്ത് നടന്ന ചോദ്യപേപ്പർ നിർമ്മാണത്തിന്റെ നാല് സുപ്രധാന ഘട്ടങ്ങളിലും പങ്കാളിയായിരുന്നു. ‘കൈലാഷ്’, ‘ശിവാലിക്’, ‘സെറ്റ് 2’, ‘സെറ്റ് 3’ എന്നിങ്ങനെ ആഭ്യന്തരമായി പേരിട്ടിരുന്ന നാല് മാസ്റ്റർ ചോദ്യപേപ്പറുകളും ഒരേസമയം കാണാൻ ഈ വിദഗ്ധർക്ക് അനുമതിയുണ്ടായിരുന്നു എന്നാണ് പുറത്തുവരുന്ന വിവരങ്ങൾ.

Digital lock, secret code; Center tells Supreme Court that NEET system is very secure, but there were some interferences, NTA experts under investigation