‘ശത്രുക്കൾ ഇനി ആക്രമിക്കാൻ മടിക്കണം’; യു.എസിന് ശക്തമായ മുന്നറിയിപ്പുമായിഇറാൻ നാവികസേന

ടെഹ്‌റാൻ: തങ്ങൾക്കെതിരെ ഏതെങ്കിലും തരത്തിലുള്ള സൈനിക നീക്കമുണ്ടായാൽ യു.എസ് സേനയ്ക്ക് കനത്ത തിരിച്ചടി നൽകുമെന്ന മുന്നറിയിപ്പുമായി ഇറാൻ. രാജ്യത്തിന്റെ സായുധ സേനകൾ തമ്മിലുള്ള ഏകോപനം ഏറ്റവും ഉയർന്ന നിലയിലാണെന്നും സമുദ്ര അതിർത്തികൾ സംരക്ഷിക്കാൻ നാവികസേനാ വിഭാഗങ്ങൾ സദാസന്നദ്ധരാണെന്നും ഇറാന്റെ നോർത്തേൺ ഫ്ലീറ്റ് കമാൻഡർ റിയർ അഡ്മിറൽ മൊഹ്‌സൻ റസാഖി വ്യക്തമാക്കി. വടക്കൻ തീരദേശ നഗരമായ അസ്താരയിൽ നടന്ന ചടങ്ങിൽ സംസാരിക്കുകയായിരുന്നു അദ്ദേഹം.

ഇറാന്റെ സമുദ്രപരിധി സംരക്ഷിക്കാൻ മിസൈൽ-ഡ്രോൺ യൂണിറ്റുകളും കമാൻഡോകളും അടങ്ങുന്ന നാവികസേന നിരന്തര സാന്നിധ്യമായി നിലകൊള്ളുന്നുണ്ടെന്ന് അദ്ദേഹം പറഞ്ഞു. “ഇറാനെതിരായ ഏതൊരു ആക്രമണത്തിന്റെയും വില അത്രത്തോളം വർദ്ധിപ്പിക്കണം, ശത്രു ഇനി രാജ്യത്തെ ആക്രമിക്കാൻ ധൈര്യപ്പെടാത്ത വിധം അത് കഠിനമായിരിക്കും,” ഇറാന്റെ ഔദ്യോഗിക വാർത്താ ഏജൻസിയായ ഇർന (IRNA) റസാഖിയെ ഉദ്ധരിച്ച് റിപ്പോർട്ട് ചെയ്തു. ശത്രുത അവസാനിപ്പിക്കുന്നതിൽ മാത്രമല്ല, ആക്രമണകാരികൾക്ക് താങ്ങാനാവാത്ത നഷ്ടം വരുത്തിവെക്കുന്നതിലാണ് ഇറാന്റെ സൈനിക തന്ത്രം ശ്രദ്ധ കേന്ദ്രീകരിക്കുന്നതെന്നും അദ്ദേഹം കൂട്ടിച്ചേർത്തു.

അടുത്തിടെ ഇറാൻ ഉദ്യോഗസ്ഥരും സൈനിക മേധാവികളും യു.എസിന് നൽകുന്ന ആവർത്തിച്ചുള്ള മുന്നറിയിപ്പുകളുടെ തുടർച്ചയാണിത്. “ഒരു യുദ്ധം ആരംഭിച്ചാൽ നിങ്ങൾ നേരിടേണ്ടിവരുന്നത് വിനാശകരമായ പ്രതികരണമായിരിക്കും” എന്ന് സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്‌സൻ റെസായി നേരത്തെ എക്സ് (X) പ്ലാറ്റ്‌ഫോമിലൂടെ യു.എസിന് മുന്നറിയിപ്പ് നൽകിയിരുന്നു. രാജ്യത്തിന് നേരെ വീണ്ടുമൊരു ആക്രമണമുണ്ടായാൽ ഭൂമിശാസ്ത്രപരമായ അതിരുകളില്ലാതെ ഉടനടി ശക്തമായ മറുപടി നൽകാൻ ഇറാന്റെ പരമോന്നത നേതാവ് ആയത്തുള്ള സയ്യിദ് മുജ്തബ ഖമേനിയും സൈനിക കമാൻഡർമാർക്ക് നിർദ്ദേശം നൽകിയിട്ടുണ്ട്.

മേഖലയിലൂടെ ഇറാൻ നടത്തുന്ന ആയുധക്കടത്തും നിരോധിത വസ്തുക്കളുടെ നീക്കവും തടയാൻ യു.എസ് സെൻട്രൽ കമാൻഡ് (CENTCOM) ‘ടാസ്ക് ഫോഴ്സ് അയൺ ഗേറ്റ്’ (Task Force Iron Gate) എന്ന പേരിൽ പുതിയ ടാസ്ക് ഫോഴ്സ് രൂപീകരിച്ചതിന് പിന്നാലെയാണ് ഇറാന്റെ ഭാഗത്തുനിന്ന് ഈ ശക്തമായ പ്രതികരണം ഉണ്ടായിരിക്കുന്നത്. ഫ്ലോറിഡയിലെ ടാമ്പ ആസ്ഥാനമായി പ്രവർത്തിക്കുന്ന ഈ പ്രത്യേക സംഘം, ഇറാന്റെ കര അതിർത്തികൾ വഴിയും കാസ്പിയൻ കടൽ വഴിയുമുള്ള ആയുധ കൈമാറ്റ ശൃംഖലകൾ കർശനമായി നിയന്ത്രിക്കാനാണ് ലക്ഷ്യമിടുന്നത്.

Enemies should now hesitate to attack’; Iranian Navy issues a stern warning to the U.S