ഉമ്മന് കാപ്പില് & ജോര്ജ് തുമ്പയില്
ലാങ്കസ്റ്റര്, പെന്സില്വേനിയ: മലങ്കര ഓര്ത്തഡോക്സ് സുറിയാനി സഭയുടെ നോര്ത്ത് ഈസ്റ്റ് അമേരിക്കന് ഭദ്രാസന ഫാമിലി & യൂത്ത് കോണ്ഫറന്സ് ജൂലൈ 18 ശനിയാഴ്ച ആത്മീയാനുഭവങ്ങളുടെയും സഹോദര്യസംഗമത്തിന്റെയും വിശ്വാസപഠനത്തിന്റെയും നവീകരണത്തിന്റെയും നാല് ദിനങ്ങള്ക്കു ശേഷം സമാപിച്ചു.
ജൂലൈ 15 മുതല് 18 വരെ നടന്ന ഈ കോണ്ഫറന്സ് നോര്ത്ത് ഈസ്റ്റ് അമേരിക്കന് ഭദ്രാസനത്തിലെ വിശ്വാസികളുടെ ഏറ്റവും വലിയ വാര്ഷിക ആത്മീയ സംഗമമാണ്. അവസാന ദിവസത്തെ പരിപാടികള് ലിങ്കണ് തിയേറ്ററില് നടന്ന പ്രഭാത പ്രാര്ത്ഥനയോടെ ആരംഭിച്ചു. തുടര്ന്ന് കുര്ബാന അര്പ്പിക്കപ്പെട്ടു. കണ്ടനാട് ഭദ്രാസനാധിപന് ഡോ. തോമസ് മാര് അത്താനാസിയോസ് മെത്രാപ്പോലീത്ത മുഖ്യകാര്മികത്വം വഹിച്ചു.
നോര്ത്ത് ഈസ്റ്റ് അമേരിക്കന് ഭദ്രാസനാധിപന് സഖറിയാ മാര് നിക്കളാവോസ് മെത്രാപ്പോലീത്തയും 30 വൈദികരും സഹകാര്മികരായിരുന്നു.
കുര്ബാനയ്ക്കുശേഷം നടന്ന പൊതുസമ്മേളനത്തില് മുഖ്യപ്രഭാഷകരായ ഡോ. തോമസ് മാര് അത്തനാസിയോസ് മെത്രാപ്പോലീത്ത, റഷ്യന് ഓര്ത്തഡോക്സ് സഭയിലെ ഫാ. ഹിയറോമോങ്ക് വസിലിയോസ് വില്ലാര്ഡ്, ഫാ. ഡോ. എബി ജോര്ജ്, ലിജിന് ഹന്നാ തോമസ് എന്നിവര് തങ്ങളുടെ ആത്മീയ അനുഭവങ്ങളും കോണ്ഫറന്സില് പങ്കെടുത്തതിലുള്ള സന്തോഷവും പങ്കുവെച്ചു. സമാപന സന്ദേശത്തില് സഖറിയാ മാര് നിക്കളാവോസ് മെത്രാപ്പോലീത്ത വൈദികര്ക്കും പ്രതിനിധികള്ക്കും സന്നദ്ധ പ്രവര്ത്തകര്ക്കും വിശ്വാസിസമൂഹത്തിനും ഹൃദയംഗമമായ നന്ദി രേഖപ്പെടുത്തി. ആത്മീയ നവീകരണത്തിനും ഭദ്രാസന കുടുംബത്തിലെ അംഗത്വബോധം കൂടുതല് ദൃഢമാക്കുന്നതിനും ഈ കോണ്ഫറന്സ് സഹായകമായതായി അദ്ദേഹം അഭിപ്രായപ്പെട്ടു. കോണ്ഫറന്സിന്റെ വിജയകരമായ ആസൂത്രണത്തിനും നടത്തിപ്പിനും നേതൃത്വം നല്കിയ ഫാമിലി കോണ്ഫറന്സ് ഭാരവാഹികളെയും, പ്രത്യേകിച്ച് സ്ഥാനമൊഴിയുന്ന സെക്രട്ടറി ജെയ്സണ് തോമസിനെയും ട്രഷറര് ജോണ് താമരവേലിലിനെയും അദ്ദേഹം പ്രത്യേകം അഭിനന്ദിച്ചു.
കോണ്ഫറന്സില് പങ്കെടുത്തവരില് 50 ശതമാനവും കുട്ടികളും യുവജനങ്ങളുമായിരുന്നു. യുവതലമുറയുടെ ഈ ആവേശകരമായ പങ്കാളിത്തം സഭയുടെ ഭാവിയെക്കുറിച്ചുള്ള വലിയ പ്രത്യാശയാണ് നല്കുന്നത്. ബാല്യത്തില് ഫാമിലി കോണ്ഫറന്സില് പങ്കെടുത്തിരുന്ന പലരും ഇന്ന് കോണ്ഫറന്സിന്റെ വിവിധ നേതൃത്വ ചുമതലകള് വഹിക്കുന്നതും അമേരിക്കയിലെ സഭയുടെ തുടര്വളര്ച്ചയ്ക്ക് ആത്മവിശ്വാസം പകരുന്നതുമാണ്.
വിവിധ മേഖലകളില് നിന്നുള്ള പ്രഭാഷകര് ഓര്ത്തഡോക്സ് ആത്മീയതയെ ദൈനംദിന ജീവിതത്തിലെ വെല്ലുവിളികളുമായി ഫലപ്രദമായി ബന്ധിപ്പിച്ചു. ലോകവിജയങ്ങള് മാത്രം സൃഷ്ടിക്കുകയല്ല, വിശുദ്ധരെ വളര്ത്തിയെടുക്കുകയാണ് സഭയുടെ പ്രഥമ ദൗത്യമെന്ന സന്ദേശവും അവര് ശക്തമായി ഊന്നിപ്പറഞ്ഞു.
കോണ്ഫറന്സിലുടനീളം നടന്ന ഗ്രൂപ്പ് ചര്ച്ചകളില് പങ്കെടുത്തവരുടെ സജീവ പങ്കാളിത്തം ദൈവത്തോട് കൂടുതല് അടുക്കാനും വിശ്വാസത്തില് വളരാനും ഉള്ള ആത്മാര്ത്ഥമായ ആഗ്രഹത്തിന്റെ പ്രകടനമായിരുന്നു. ഓണ്ലൈന് യൂട്യൂബ് ചാനലായ മലങ്കര ശബ്ദം പ്രൊഡ്യൂസറും ഡയറക്ടറുമായ ബെന്നി കോട്ടപ്പുറം കോണ്ഫറന്സിലെ വിശിഷ്ടാതിഥികളില് ഒരാളായിരുന്നു. സമ്മേളനത്തിനിടെ അഭിവന്ദ്യ സഖറിയാ മാര് നിക്കളാവോസ് മെത്രാപ്പോലീത്ത മലങ്കര ടി.വി. എന്ന പുതിയ മൊബൈല് ആപ്ലിക്കേഷന് ഔദ്യോഗികമായി പ്രകാശനം ചെയ്തു. ഭക്തിസന്ദേശങ്ങള്, വിശുദ്ധ ഗാനങ്ങള്, പ്രാര്ത്ഥനകള്, കുര്ബാന ശുശ്രൂഷകള്, സഭാവാര്ത്തകള്, മറ്റ് ഓര്ത്തഡോക്സ് ആത്മീയ വിഭവങ്ങള് എന്നിവ ഈ ആപ്പിലൂടെ ലഭ്യമാകും.
കോണ്ഫറന്സിന്റെ വിജയത്തിനായി ഉദാരമായി സഹകരിച്ച സ്പോണ്സര്മാര്ക്ക് സംഘാടകര് ഹൃദയംഗമമായ നന്ദി രേഖപ്പെടുത്തി. ധനശേഖരണത്തിന്റെ ഭാഗമായി നടത്തിയ റാഫിള് നറുക്കെടുപ്പില് ന്യൂയോര്ക്കിലെ ബ്രോങ്ക്സിലുള്ള സെന്റ് മേരീസ് ഓര്ത്തഡോക്സ് ഇടവകാംഗം വര്ഗീസ് കുര്യന് ഒന്നാം സമ്മാനം നേടി. കോണ്ഫറന്സ് കോഓര്ഡിനേറ്ററായ ഫാ. അലക്സ് ജോയ്, പ്രഭാഷകര്, സന്നദ്ധ പ്രവര്ത്തകര്, പങ്കെടുത്ത എല്ലാ വിശ്വാസികളും ചേര്ന്നാണ് ഈ ഫാമിലി & യൂത്ത് കോണ്ഫറന്സിനെ അവിസ്മരണീയവും ആത്മീയമായി സമ്പന്നവുമായ അനുഭവമാക്കി മാറ്റിയതെന്ന് നന്ദിപ്രസംഗത്തില് പറഞ്ഞു. ലാങ്കസ്റ്റര് ബോള്റൂമില് ബ്രഞ്ചോടെ ആരാധനയുടെയും പഠനത്തിന്റെയും ക്രൈസ്തവ സഹോദര്യത്തിന്റെയും നാല് ദിനങ്ങള് സന്തോഷപൂര്വം സമാപിച്ചു.
Family & Youth Conference concludes with spiritual awakening and a sense of church family
