കേരള മുഖ്യമന്ത്രിയെ സംബന്ധിച്ച തർക്കം പരിഹരിക്കാനുള്ള നിർണ്ണായക ചർച്ചകൾ ഡൽഹിയിൽ അന്തിമഘട്ടത്തിലേക്ക്. കോൺഗ്രസ് അധ്യക്ഷൻ മല്ലികാർജുൻ ഖർഗെയും രാഹുൽ ഗാന്ധിയും തമ്മിലുള്ള കൂടിക്കാഴ്ച വൈകുന്നേരം 5.30-ന് നടക്കും. ഒൻപത് ദിവസമായി തുടരുന്ന അനിശ്ചിതത്വത്തിന് ഈ കൂടിക്കാഴ്ചയോടെ വിരാമമാകുമെന്നും മുഖ്യമന്ത്രിയുടെ കാര്യത്തിൽ ഇന്ന് തന്നെ ഔദ്യോഗിക പ്രഖ്യാപനം ഉണ്ടായേക്കുമെന്നുമാണ് സൂചന.
സംസ്ഥാനത്തെ മുതിർന്ന നേതാക്കളുമായും വർക്കിംഗ് പ്രസിഡന്റുമാരുമായും രാഹുൽ ഗാന്ധി നടത്തിയ വ്യക്തിപരമായ കൂടിക്കാഴ്ചകളുടെ വിശദാംശങ്ങൾ അദ്ദേഹം ഖർഗെയെ ധരിപ്പിക്കും. കെ.സി. വേണുഗോപാൽ, വി.ഡി. സതീശൻ, രമേശ് ചെന്നിത്തല എന്നിവരിൽ ആർക്കാണ് കൂടുതൽ സ്വീകാര്യത എന്നതിനെക്കുറിച്ചുള്ള തന്റെ നിഗമനവും രാഹുൽ ഗാന്ധി കൈമാറും. എംഎൽഎമാരുടെ പിന്തുണയ്ക്കൊപ്പം ഹൈക്കമാൻഡിന്റെ താല്പര്യവും ജനവികാരവും ഒരുപോലെ പരിഗണിച്ചാകും അന്തിമ തീരുമാനം.
അണികൾക്കിടയിലുള്ള ചേരിതിരിവ് ഭരണത്തിന്റെ തുടക്കത്തിൽ തന്നെ തിരിച്ചടിയാകുമെന്ന് ഹൈക്കമാൻഡ് വിലയിരുത്തുന്നുണ്ട്. അതിനാൽ, എല്ലാവർക്കും സ്വീകാര്യമായ ഒരു ഫോർമുലയിലൂടെ തർക്കം പരിഹരിക്കാനാണ് കേന്ദ്ര നേതൃത്വം ശ്രമിക്കുന്നത്. ഖർഗെ-രാഹുൽ കൂടിക്കാഴ്ചയ്ക്ക് ശേഷം സോണിയാ ഗാന്ധിയുമായും ചർച്ച നടത്തിയ ശേഷമാകും എഐസിസി ഔദ്യോഗികമായി മുഖ്യമന്ത്രിയുടെ പേര് പുറത്തുവിടുക.
Final Call on Kerala CM: Kharge and Rahul Gandhi to Meet at 5.30 PM
