ടെഹ്റാൻ: തങ്ങളുടെ ആണവനിലയങ്ങളിൽ സമഗ്രമായ പരിശോധന നടത്തുന്നതിനായി അന്താരാഷ്ട്ര ആണവോർജ്ജ ഏജൻസിയെ ക്ഷണിച്ചെന്ന വാർത്തകൾ ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായ് ഔദ്യോഗികമായി നിഷേധിച്ചു. അമേരിക്കയുമായി ഒപ്പുവെച്ചിട്ടുള്ള പ്രാഥമിക ധാരണാപത്രത്തിൽ വ്യക്തമാക്കിയത് പോലെ, ഇരുരാജ്യങ്ങളും തമ്മിൽ അന്തിമ കരാറിൽ എത്തുന്നതുവരെ തങ്ങളുടെ ആണവ പദ്ധതി നിലവിലെ അവസ്ഥയിൽ തന്നെ മാറ്റമില്ലാതെ തുടരുമെന്ന് അദ്ദേഹം വ്യക്തമാക്കി.
നിലവിൽ ബുഷെഹർ ഉൾപ്പെടെയുള്ള ആണവ കേന്ദ്രങ്ങളിൽ നടന്നുവരുന്ന പതിവ് പരിശോധനകളുമായി ഏജൻസിക്ക് മുന്നോട്ട് പോകാമെന്നും അദ്ദേഹം അറിയിച്ചു. എന്നാൽ മുൻപ് യുദ്ധസാഹചര്യങ്ങളെത്തുടർന്ന് ഐഎഇഎയുടെ പ്രവേശനം താൽക്കാലികമായി റദ്ദാക്കിയ മറ്റ് പ്രധാന ആണവനിലയങ്ങളിലെ പരിശോധന പുനരാരംഭിക്കുന്നത് സംബന്ധിച്ച കാര്യങ്ങൾ നിലവിലെ നയതന്ത്ര ചർച്ചകളുടെ പുരോഗതിയെയും അതിന്റെ ഫലത്തെയും ആശ്രയിച്ചിരിക്കുമെന്നും ബഗായ് കൂട്ടിച്ചേർത്തു. വരും ദിവസങ്ങളിൽ യുഎസുമായുള്ള ചർച്ചകളിൽ ഇറാൻ സ്വീകരിക്കുന്ന നിലപാടുകൾ ഈ വിഷയത്തിൽ നിർണ്ണായകമാകും.
