ടെഹ്‌റാൻ: ഹോർമുസ് കടലിടുക്കിലൂടെയുള്ള വാണിജ്യ കപ്പൽ ഗതാഗതത്തിലുണ്ടായ തുടർച്ചയായ തടസ്സങ്ങൾക്ക് കാരണം അമേരിക്കയും ഇസ്രായേലുമെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഘായി. പ്രതിവാര വാർത്താസമ്മേളനത്തിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഫെബ്രുവരി അവസാനം യുഎസും ഇസ്രായേലും ചേർന്ന് ഇറാനിൽ സംയുക്ത വ്യോമാക്രമണം നടത്തുന്നതിന് മുൻപ് ഹോർമുസ് കടലിടുക്ക് പൂർണ്ണമായും തുറന്നുകിടക്കുകയായിരുന്നുവെന്ന് അദ്ദേഹം ചൂണ്ടിക്കാട്ടിക്കൂട്ടി.
മേഖലയിൽ നാം കാണുന്ന എല്ലാ പ്രതിസന്ധികൾക്കും കാരണം അമേരിക്കയുടെയും ഇസ്രായേൽ ഭരണകൂടത്തിന്റെയും നടപടികളാണെന്നും, കടലിടുക്കിലെ കപ്പൽ ഗതാഗത തടസ്സം മൂലമുണ്ടാകുന്ന സാമ്പത്തിക പ്രതിസന്ധികൾ ഇതിന്‍റെ ഫലമാണെന്നും ബഘായി പറഞ്ഞു. ഈ വിഷയത്തിൽ യഥാർത്ഥത്തിൽ ആശങ്കയുള്ള സർക്കാരുകൾ സ്ഥിതിഗതികൾ സൃഷ്ടിച്ച യഥാർത്ഥ ഉത്തരവാദികളെയാണ് സമീപിക്കേണ്ടതെന്നും, അമേരിക്കയുടെ അക്രമണോത്സുകമായ നടപടികൾ അവസാനിപ്പിക്കാൻ അവർ തയ്യാറാകണമെന്നും അദ്ദേഹം ആവശ്യപ്പെട്ടു.
അതേസമയം, ഹോർമുസ് കടലിടുക്കിലെ നിയന്ത്രണങ്ങളെ ചൊല്ലി ടെഹ്‌റാനും വാഷിംഗ്ടണും തമ്മിൽ അവകാശവാദങ്ങൾ ശക്തമാണ്. പേർഷ്യൻ ഗൾഫിലും കടലിടുക്കിലും ഇരുരാജ്യങ്ങളും പരസ്പരം ഉപരോധങ്ങൾ ഏർപ്പെടുത്തിവരികയാണ്. ഇറാൻ ആണവായുധങ്ങൾ നിർമ്മിക്കുന്നത് തടയാൻ ഈ യുദ്ധം അത്യന്താപേക്ഷിതമാണെന്നാണ് യുഎസ് പ്രസിഡന്‍റ് ഡോണൾഡ് ട്രംപ് വ്യക്തമാക്കിയിട്ടുള്ളത്.
