വാഷിംഗ്ടൺ: യുഎസ് കോൺഗ്രസ് അംഗവും ഡെമോക്രാറ്റിക് പാർട്ടി നേതാവുമായ ഇൽഹാൻ ഒമറിന്റെ വാഷിംഗ്ടൺ ഡിസിയിലെ വസതിയിൽ ഹോംലാൻഡ് സെക്യൂരിറ്റി ഇൻവെസ്റ്റിഗേഷൻസ് (എച്ച്.എസ്.ഐ) ഉദ്യോഗസ്ഥരുടെ റെയ്ഡ്. തിങ്കളാഴ്ച പുലർച്ചെയോടെയായിരുന്നു ഫെഡറൽ ഏജന്റുകൾ റെയ്ഡ് നടത്തിയത്. ഇൽഹാൻ ഒമറുടെ ബാല്യകാലവുമായി ബന്ധപ്പെട്ട കുടിയേറ്റ രേഖകളെക്കുറിച്ചുള്ള ക്രിമിനൽ അന്വേഷണത്തിന്റെ ഭാഗമായാണ് പരിശോധനയെന്ന് ഔദ്യോഗിക വൃത്തങ്ങൾ വ്യക്തമാക്കി.
നടപടി തികഞ്ഞ അധികാര ദുർവിനിയോഗമാണെന്നും രാഷ്ട്രീയ എതിരാളികളെ ലക്ഷ്യമിട്ടുള്ള ഫെഡറൽ ഏജൻസികളുടെ വേട്ടയാടലാണിതെന്നും ഇൽഹാൻ ഒമറുടെ ഓഫീസ് പ്രതികരിച്ചു. താൻ തെറ്റൊന്നും ചെയ്തിട്ടില്ലെന്നും ഭയപ്പെടുത്തി നിശബ്ദയാക്കാൻ കഴിയില്ലെന്നും അവർ സോഷ്യൽ മീഡിയയിലൂടെ വ്യക്തമാക്കി. ദശകത്തോളമായി ഡൊണാൾഡ് ട്രംപ് തനിക്കെതിരെ അടിസ്ഥാനരഹിതമായ നുണകളും അപവാദ പ്രചാരണങ്ങളും അഴിച്ചുവിടുകയാണെന്നും അവർ കുറ്റപ്പെടുത്തി.
ഇത് ഒരന്വേഷണത്തിന്റെ ഭാഗമാണെന്നും ഫെഡറൽ കോടതിയുടെ സെർച്ച് വാറണ്ട് പ്രകാരമാണ് റെയ്ഡ് നടത്തിയതെന്നും ജസ്റ്റിസ് ഡിപ്പാർട്ട്മെന്റ് സ്ഥിരീകരിച്ചിട്ടുണ്ട്. അതേസമയം, സംഭവത്തെ ഡെമോക്രാറ്റിക് പാർട്ടി നേതൃത്വവും ശക്തമായി അപലപിച്ചു. ട്രംപ് ഭരണകൂടം രാഷ്ട്രീയ വൈരാതീതീരം തീർക്കാൻ ഫെഡറൽ സംവിധാനങ്ങളെ ദുരുപയോഗം ചെയ്യുകയാണെന്ന് ഹൗസ് ഡെമോക്രാറ്റിക് ലീഡർ ഹക്കീം ജെഫ്രീസും മറ്റ് പ്രമുഖ നേതാക്കളും ആരോപിച്ചു. തിരഞ്ഞെടുപ്പിന് തൊട്ടുമുമ്പ് നടക്കുന്ന ഇത്തരം നടപടികൾ വലിയ രാഷ്ട്രീയ വിവാദങ്ങൾക്ക് വഴിവെച്ചിട്ടുണ്ട്.
