ടെൽ അവീവ്: ദുബായിൽ നിന്ന് ഇസ്രായേലിലേക്ക് പറന്ന വിമാനം തകർക്കാൻ കോ-പൈലറ്റ് നടത്തിയ ശ്രമത്തിന് പിന്നിലെ യഥാർത്ഥ ലക്ഷ്യം എന്താണെന്ന് ഇപ്പോൾ വ്യക്തമാക്കാൻ സമയമായിട്ടില്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. സംഭവത്തിൽ ഇറാന് പങ്കുണ്ടോ എന്നതിനെക്കുറിച്ച് നിലവിൽ സൂചനകളൊന്നുമില്ലെന്നും അദ്ദേഹം വ്യക്തമാക്കി. വിമാനത്തിലുണ്ടായിരുന്ന 174 യാത്രക്കാരുടെ ജീവൻ അപകടത്തിലാക്കിയ സംഭവത്തെക്കുറിച്ച് ഇസ്രായേലിന് മുൻകൂട്ടി യാതൊരുവിധ രഹസ്യാന്വേഷണ വിവരങ്ങളോ മുന്നറിയിപ്പോ ലഭിച്ചിരുന്നില്ലെന്നും നെതന്യാഹു സി.എൻ.എന്നിനോട് പ്രതികരിച്ചു.
സൗദി അറേബ്യയിൽ വെച്ച് അറസ്റ്റിലായ അക്രമിയെ വിമാനം പുറപ്പെട്ട യുണൈറ്റഡ് അറബ് എമിറേറ്റ്സിലേക്ക് (യു.എ.ഇ) കൈമാറുമെന്നാണ് പ്രതീക്ഷിക്കുന്നത്. സംഭവത്തിൽ ഇസ്രായേൽ അതീവ ജാഗ്രതയിലാണെന്നും വരാനിരിക്കുന്ന ഔദ്യോഗിക അന്വേഷണത്തെ രാജ്യം സഗൌരവം നിരീക്ഷിക്കുമെന്നും ആവശ്യമെങ്കിൽ അതിൽ നേരിട്ട് പങ്കാളികളാകുമെന്നും ഇസ്രായേൽ പ്രധാനമന്ത്രി കൂട്ടിച്ചേർത്തു.
ഗുരുതരമായി കുത്തേറ്റ ശേഷവും അക്രമിയെ പ്രതിരോധിച്ച് വൻ ദുരന്തം ഒഴിവാക്കിയ ഇന്ത്യൻ പൈലറ്റ് ക്യാപ്റ്റൻ സ്മിത് മച്ഛാറെ നെതന്യാഹു പ്രശംസിച്ചു. “ഗുരുതരമായി പരിക്കേറ്റിട്ടും അദ്ദേഹം ധീരമായി പോരാടി. കോക്ക്പിറ്റിന്റെ വാതിൽ തുറന്ന് യാത്രക്കാർക്കും ജീവനക്കാർക്കും ഉള്ളിലേക്ക് കടക്കാനും അക്രമിയെ കീഴ്പ്പെടുത്താനും അദ്ദേഹം അവസരമൊരുക്കി. ഒരു വൻ ആകാശ ദുരന്തമാണ് ഇതിലൂടെ ഒഴിവായത്,” നെതന്യാഹു എക്സിൽ കുറിച്ചു. ഇന്ത്യൻ പ്രധാനമന്ത്രി നരേന്ദ്ര മോദിയും പൈലറ്റിന്റെ ധീരതയെ പ്രശംസിച്ചു.
അന്വേഷണം പ്രാഥമിക ഘട്ടത്തിലാണെന്ന് പ്രധാനമന്ത്രി പറയുമ്പോഴും, ഇതൊരു ‘ജിഹാദി ഭീകരാക്രമണ ശ്രമം’ ആണെന്ന് ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് ആരോപിച്ചു. സംഭവത്തെ തുടർന്ന് അമേരിക്കൻ പ്രസിഡന്റ് ഡോണൾഡ് ട്രംപ് നെതന്യാഹുവുമായി ഫോണിൽ സംസാരിക്കുകയും അക്രമി ഒരു ഭീകരനാകാനുള്ള സാധ്യത പ്രകടിപ്പിക്കുകയും ചെയ്തു.
യാത്രക്കാരിലേറെയും ഇസ്രായേൽ പൗരന്മാരായിരുന്ന ഫ്ലൈദുബായ് വിമാനം അടിയന്തര സന്ദേശങ്ങൾ നൽകിയതിനെ തുടർന്ന് ഇസ്രായേൽ, സൗദി വ്യോമസേനകൾ യുദ്ധവിമാനങ്ങൾ വിന്യസിച്ചിരുന്നു. നിലവിൽ യാത്രക്കാരെയെല്ലാം പ്രത്യേക വിമാനത്തിൽ ടെൽ അവീവിൽ എത്തിച്ചിട്ടുണ്ട്.
Is Iran behind the air attack? Netanyahu says it is too early to say; Israel will also participate in the investigation.
