തമിഴ്നാട് സർക്കാർ ജീവനക്കാർക്ക് മൂന്നാമത്തെ പ്രസവാവധി വെട്ടിച്ചുരുക്കാൻ കഴിയില്ലെന്ന് മദ്രാസ് ഹൈക്കോടതി ഉത്തരവിട്ടു. മൂന്നാമത്തെ പ്രസവത്തിന് വെറും മൂന്ന് മാസം മാത്രം അവധി നൽകാനുള്ള സർക്കാർ ഉത്തരവ് ഭരണഘടനാവിരുദ്ധമാണെന്ന് കോടതി നിരീക്ഷിച്ചു. ആദ്യ രണ്ട് പ്രസവങ്ങൾക്ക് നൽകുന്നതിന് സമാനമായി 365 ദിവസത്തെ അവധി തന്നെ മൂന്നാമത്തെ പ്രസവത്തിനും അനുവദിക്കണമെന്ന് ജസ്റ്റിസ് എം.എസ്. രമേശ്, ജസ്റ്റിസ് എ.ഡി. മരിയ ക്ലോഡ് എന്നിവരടങ്ങിയ ഡിവിഷൻ ബെഞ്ച് വ്യക്തമാക്കി.
മൂന്നാമതും ഗർഭം ധരിക്കുന്ന സ്ത്രീകളോട് വിവേചനം കാണിക്കുന്നത് നീതീകരിക്കാനാവില്ലെന്ന് കോടതി ചൂണ്ടിക്കാട്ടി. ഒന്നാമത്തെയും മൂന്നാമത്തെയും പ്രസവത്തിൽ ഒരു സ്ത്രീ അനുഭവിക്കുന്നത് ഒരേ വേദനയാണെന്ന് കോടതി പറഞ്ഞു. പ്രസവത്തിന് മുൻപും ശേഷവും കൃത്യമായ ആരോഗ്യപരിപാലനം ലഭിക്കുക എന്നത് ഒരു സ്ത്രീയുടെ മൗലികാവകാശമാണെന്നും അതിനാൽ അവധി കുറയ്ക്കുന്നതിൽ യുക്തിയില്ലെന്നും ഡിവിഷൻ ബെഞ്ച് നിരീക്ഷിച്ചു.
വിഴുപ്പുറം ജില്ലാ കോടതി ജീവനക്കാരിയായ ഷായി നിഷ നൽകിയ ഹർജിയിലാണ് ഈ സുപ്രധാന വിധി. മൂന്നാമത്തെ പ്രസവത്തിന് നിഷയ്ക്ക് 365 ദിവസത്തെ അവധി അനുവദിക്കാൻ കോടതി ഉത്തരവിട്ടു. സർക്കാർ നയങ്ങൾ സ്ത്രീകളുടെ ആരോഗ്യത്തിനോ അവകാശങ്ങൾക്കോ തടസ്സമാകരുത് എന്ന് വ്യക്തമാക്കിയ വിധി, സമാനമായ സാഹചര്യങ്ങളിലുള്ള നിരവധി സർക്കാർ ജീവനക്കാർക്ക് ആശ്വാസമാകും.
Madras High Court Rules Third Maternity Leave Cannot Be Curtailed
