കോഴിക്കോട്: അഞ്ചുദിവസത്തെ ഇന്ത്യ പര്യടനത്തിന്റെ ഭാഗമായി ഡൽഹിയിൽ നടന്ന ബ്രിക്സ് ഉച്ചകോടിക്ക് ശേഷം മലേഷ്യൻ പ്രധാനമന്ത്രി അൻവർ ഇബ്രാഹിം കാരന്തൂർ മർകസിൽ എത്തി ഇന്ത്യൻ ഗ്രാൻഡ് മുഫ്തി കാന്തപുരം എ.പി. അബൂബക്കർ മുസല്യാരുമായി കൂടിക്കാഴ്ച നടത്തി. മർകസ് കൺവെൻഷൻ സെന്ററിൽ നൽകിയ ഉജ്ജ്വല സ്വീകരണ ചടങ്ങിൽ ‘എന്താ വർത്താനം’ എന്ന് മലയാളത്തിൽ ചോദിച്ചാണ് അദ്ദേഹം സദസ്സിനെ അഭിസംബോധന ചെയ്തത്. മലേഷ്യയും കേരളവും തമ്മിലുള്ള ബന്ധം കൂടുതൽ മെച്ചപ്പെടുത്തുമെന്നും, ഇന്ത്യൻ പ്രധാനമന്ത്രി നരേന്ദ്ര മോദി കാന്തപുരത്തിന് ആശംസകൾ അറിയിക്കാൻ പറഞ്ഞിട്ടുണ്ടെന്നും അദ്ദേഹം വ്യക്തമാക്കി. കേരള മുഖ്യമന്ത്രി വി.ഡി. സതീശനുമായി അദ്ദേഹം നാളെ കൂടിക്കാഴ്ച നടത്തും.
ഇന്ത്യയെപ്പോലെ എല്ലാ മതവിശ്വാസങ്ങളെയും ഒരുമിച്ചു കൊണ്ടുപോകുന്ന മണ്ണാണ് മലേഷ്യയെന്നും, പഠനത്തിനൊപ്പം മതപരമായ മൂല്യങ്ങൾ പ്രാവർത്തികമാക്കുകയാണ് പ്രധാനമെന്നും അദ്ദേഹം പറഞ്ഞു. എ.ഐ സാങ്കേതികവിദ്യ ചിലപ്പോൾ മാരകായുധങ്ങളേക്കാൾ വലിയ ഭീഷണിയാകുന്നുണ്ടെന്ന് മുന്നറിയിപ്പ് നൽകിയ അദ്ദേഹം, മുസ്ലിം സമുദായം സ്വന്തം പാരമ്പര്യത്തെക്കുറിച്ച് ബോധവാന്മാരായിരിക്കണമെന്നും കൂട്ടിച്ചേർത്തു. നേരത്തെ കരിപ്പൂർ വിമാനത്താവളത്തിലെത്തിയ അദ്ദേഹത്തെ മന്ത്രി ടി. സിദ്ദീഖ്, ചീഫ് സെക്രട്ടറി ബിശ്വനാഥ സിൻഹ, ഇ.ടി. മുഹമ്മദ് ബഷീർ എം.പി, ജനപ്രതിനിധികൾ, ഉന്നത ഉദ്യോഗസ്ഥർ എന്നിവരുടെ നേതൃത്വത്തിൽ സ്വീകരിച്ചു.
വൈകിട്ട് മർകസിലെത്തിയ പ്രധാനമന്ത്രിയെ മർകസ് വർക്കിങ് സെക്രട്ടറി ഡോ. മുഹമ്മദ് അബ്ദുൽ ഹകീം അസ്ഹരി, സെക്രട്ടറി സി. മുഹമ്മദ് ഫൈസി എന്നിവർ ചേർന്ന് സ്വീകരിച്ചു. കാന്തപുരവുമായുള്ള പ്രത്യേക കൂടിക്കാഴ്ചയിൽ മർകസും മലേഷ്യൻ ഉന്നത വിദ്യാഭ്യാസ സ്ഥാപനങ്ങളും തമ്മിലുള്ള വൈജ്ഞാനിക സഹകരണം, മലേഷ്യയിലെ ഇന്ത്യൻ സമൂഹത്തിന്റെ ക്ഷേമം തുടങ്ങിയ വിഷയങ്ങൾ ചർച്ചയായി. സ്വീകരണ സംഗമത്തിൽ ശൈഖ് അബൂബക്കർ ഫൗണ്ടേഷന്റെ എക്സലൻസ് അവാർഡ് അദ്ദേഹത്തിന് കൈമാറുകയും, ഹദീസ് സംഗമങ്ങൾ സംഘടിപ്പിച്ചതിൻ്റെ ആദരസൂചകമായി സ്വഹീഹുൽ ബുഖാരിയുടെ കയ്യെഴുത്ത് പ്രതി കാന്തപുരം അദ്ദേഹത്തിന് സമ്മാനിക്കുകയും ചെയ്തു.
മർകസ് സന്ദർശനത്തിനും ഗ്രാൻഡ് മുഫ്തിയുടെ അത്താഴ വിരുന്നിനും ശേഷം ദക്ഷിണേന്ത്യയിലെ പ്രമുഖ തീർഥാടന കേന്ദ്രമായ മടവൂർ സി.എം വലിയുല്ലാഹി മഖാമും കാന്തപുരത്തിനൊപ്പം അൻവർ ഇബ്രാഹിം സന്ദർശിക്കും.
Malaysian Prime Minister Visits Karanthur Markaz, Meets Kanthapuram AP Aboobacker Musliyar
