മിഡിൽ ഈസ്റ്റിലെ വർദ്ധിച്ചു വരുന്ന സംഘർഷങ്ങൾക്ക് അയവുവരുത്താൻ പുതിയ നയതന്ത്ര നീക്കങ്ങൾക്ക് വഴിതുറക്കുന്നു. ഇതിന്റെ ഭാഗമായി സൗദി അറേബ്യ, പാകിസ്ഥാൻ, തുർക്കി എന്നീ രാജ്യങ്ങളിലെ ഉന്നത പ്രതിനിധികൾ ഇറാനിൽ വെച്ച് നിർണായക ചർച്ചകൾ നടത്തും. സൗദി പ്രതിരോധ മന്ത്രി, പാക് സൈനിക മേധാവി, തുർക്കി ഇന്റലിജൻസ് മേധാവി എന്നിവരാണ് ഈ ഉച്ചകോടിയിൽ പങ്കെടുക്കുന്നത്. സൗദി-ഹൂത്തി പോരാട്ടം ഉൾപ്പെടെയുള്ള പ്രധാന മിഡിൽ ഈസ്റ്റ് വിഷയങ്ങൾ ചർച്ചയാകുമെന്നാണ് സൂചന. സൗദിയും തുർക്കിയും പാകിസ്ഥാനും ‘മക്ക കരാറിൽ’ പങ്കാളികളായിരിക്കെ, ഇറാനിൽ വെച്ച് ഇത്തരമൊരു കൂടിക്കാഴ്ച നടക്കുന്നത് വലിയ നയതന്ത്ര പ്രാധാന്യത്തോടെയാണ് നിരീക്ഷിക്കപ്പെടുന്നത്.
അതിനിടെ, മേഖലയിൽ ഹൂത്തി സൈന്യവും സൗദി സഖ്യസേനയും തമ്മിലുള്ള സൈനിക ഏറ്റുമുട്ടൽ കൂടുതൽ രൂക്ഷമായി തുടരുകയാണ്. റിയാദിലെ കിങ് ഖാലിദ് അന്താരാഷ്ട്ര വിമാനത്താവളം, ഈസ്റ്റ്-വെസ്റ്റ് ക്രൂഡ് ഓയിൽ പമ്പിങ് സ്റ്റേഷൻ എന്നിവയ്ക്ക് നേരെ ആക്രമണം നടത്തിയതായി ഹൂത്തികൾ അവകാശപ്പെട്ടു. രണ്ടു ഘട്ടങ്ങളിലായി സൗദി സഖ്യസേനയുടെ സൈനിക വ്യൂഹത്തിന് നേരെ നടത്തിയ ആക്രമണത്തിൽ നിരവധി സൈനികർ കൊല്ലപ്പെട്ടതായും ഹൂത്തികൾ അവകാശവാദം ഉന്നയിച്ചു.
എന്നാൽ ഹൂതികളുടെ ആക്രമണ നീക്കങ്ങൾക്ക് ശക്തമായ തിരിച്ചടിയാണ് സൗദി സഖ്യസേന നൽകിയത്. ഹൂതികളുടെ അഞ്ച് ഭൂഗർഭ മിസൈൽ കേന്ദ്രങ്ങൾ സൗദി സൈന്യം തകർത്തു. ഇതിനുപുറമെ, ശത്രുക്കളുടെ നാല് മിസൈൽ ലോഞ്ചറുകളും വൻ മിസൈൽ സംഭരണ കേന്ദ്രങ്ങളും തകർത്തതായി സഖ്യസേന അറിയിച്ചു. നയതന്ത്ര ചർച്ചകൾ ഒരുവശത്ത് നടക്കുമ്പോഴും അതിർത്തിയിലെ ഏറ്റുമുട്ടലുകൾ മേഖലയെ കൂടുതൽ ആശങ്കയിലാക്കുന്നുണ്ട്.
New Diplomatic Moves in Middle East: Saudi, Pakistan, and Turkey to Hold Talks in Iran; Saudi Destroys Houthis Bases
