ന്യൂയോർക്ക്: അമേരിക്കയിലുടനീളം വിമാന സർവീസുകൾ മണിക്കൂറുകളോളം നിർത്തിവെക്കേണ്ടി വന്ന ‘നേഷൻവൈഡ് ഗ്രൗണ്ട് സ്റ്റോപ്പ്’ പ്രതിസന്ധിയെ തുടർന്ന് യുഎസ് ഗതാഗത സെക്രട്ടറി ഷോൺ ഡഫി രാജിവെക്കണമെന്നും, അല്ലെങ്കിൽ പ്രസിഡന്റ് ഡോണൾഡ് ട്രംപ് അദ്ദേഹത്തെ പുറത്താക്കണമെന്നും ന്യൂയോർക്ക് ഗവർണർ കാത്തി ഹോക്കൽ ആവശ്യപ്പെട്ടു. ശനിയാഴ്ച രാവിലെ പുറത്തിറക്കിയ പ്രസ്താവനയിലാണ് ഡെമോക്രാറ്റിക് ഗവർണർ രൂക്ഷവിമർശനം ഉന്നയിച്ചത്.
എയർ ട്രാഫിക് കൺട്രോളർമാരുടെ രൂക്ഷമായ ക്ഷാമം മുതൽ ആവർത്തിച്ചുള്ള ആശയവിനിമയ തകരാറുകൾ വരെ, ഷോൺ ഡഫിയുടെ മേൽനോട്ടത്തിൽ രാജ്യത്തെ വ്യോമയാന മേഖലയിൽ ഗുരുതരമായ വീഴ്ചകൾ പതിവായിരിക്കുകയാണെന്ന് ഹോക്കൽ കുറ്റപ്പെടുത്തി. വകുപ്പിലെ പ്രതിസന്ധികൾ പരിഹരിക്കുന്നതിന് പകരം സ്വന്തം ‘റിയാലിറ്റി ഷോ’യിൽ തിളങ്ങാനാണ് ഡഫി കൂടുതൽ ശ്രദ്ധ ചെലുത്തുന്നതെന്നും അവർ പരിഹസിച്ചു.
സാങ്കേതിക തകരാറും പ്രത്യാഘാതങ്ങളും
വെള്ളിയാഴ്ച ഉച്ചയ്ക്ക് ശേഷമാണ് ആശയവിനിമയ സംവിധാനങ്ങളിലെയും റഡാർ വിവരങ്ങളിലെയും തകരാറുകളെ തുടർന്ന് ഫെഡറൽ ഏവിയേഷൻ അഡ്മിനിസ്ട്രേഷൻ രാജ്യവ്യാപകമായി വിമാനങ്ങൾ നിലത്തിറക്കാൻ ഉത്തരവിട്ടത്. പഴകിയ എയർ ട്രാഫിക് കൺട്രോൾ സാങ്കേതികവിദ്യയും, അമിതമായ ഡാറ്റ കാരണം റൂട്ടറുകളും സ്വിച്ചുകളും പ്രവർത്തനരഹിതമായതുമാണ് പ്രതിസന്ധിക്ക് കാരണമായതെന്നാണ് ഷോൺ ഡഫി വിശദീകരിക്കുന്നത്.
ഏകദേശം അഞ്ച് മണിക്കൂറോളം നീണ്ട നിയന്ത്രണത്തിന് ശേഷം വ്യോമപാത വീണ്ടും തുറന്നെങ്കിലും, ആയിരക്കണക്കിന് വിമാനങ്ങൾ റദ്ദാക്കപ്പെട്ടതിനാൽ യാത്രക്കാർ ഇപ്പോഴും കടുത്ത ദുരിതത്തിലാണ്. ഇത്തരം സംഭവങ്ങൾ ആവർത്തിക്കാതിരിക്കാൻ ഗ്രൗണ്ട് സ്റ്റോപ്പിന് ഇടയാക്കിയ സാഹചര്യങ്ങളെക്കുറിച്ച് യു.എസ് കോൺഗ്രസ് സമഗ്രമായ അന്വേഷണം നടത്തണമെന്നും കാത്തി ഹോക്കൽ ആവശ്യപ്പെട്ടു. സംഭവത്തിൽ കൂടുതൽ വിശദീകരണം നൽകുന്നതിനായി ഷോൺ ഡഫി ഉടൻ മാധ്യമങ്ങളെ കാണും.
