ഒസ്ലോ: നോർവേയുടെ ചരിത്രത്തിലെ ഏറ്റവും ജനപ്രിയനായ ഭരണാധികാരികളിൽ ഒരാളായ ഹരാൾഡ് അഞ്ചാമൻ രാജാവിൻ്റെ വിയോഗത്തിൽ അനുശോചനം രേഖപ്പെടുത്തി ലോകനേതാക്കളും ജനങ്ങളും. പ്രതിസന്ധി ഘട്ടങ്ങളിൽ രാജ്യത്തെ ഒരുമിപ്പിച്ചു നിർത്തുകയും, ഔദ്യോഗിക പദവികൾക്കപ്പുറം ജനങ്ങളോട് വ്യക്തിപരമായ സ്നേഹബന്ധം പുലർത്തുകയും ചെയ്ത അദ്ദേഹം ‘ജനങ്ങളുടെ രാജാവ്’ എന്നാണ് അറിയപ്പെട്ടിരുന്നത്.
രാജ്യത്തെ ഉലച്ച ചരിത്രപരമായ രണ്ട് സന്ദർഭങ്ങളിൽ അദ്ദേഹം നടത്തിയ പ്രസംഗങ്ങൾ ഇന്നും ജനമനസ്സുകളിൽ മായാതെ കിടക്കുന്നു. 2011-ൽ ഉട്ടോയ ദ്വീപിൽ തീവ്രവാദി നടത്തിയ വെടിവെപ്പിൽ 69 പേർ കൊല്ലപ്പെട്ടപ്പോൾ, രാജ്യത്തെ അഭിസംബോധന ചെയ്ത രാജാവിൻ്റെ വാക്കുകൾ ലോകം വിതുമ്പലോടെയാണ് കേട്ടത്. “ഒരു അച്ഛനായും മുത്തശ്ശനായും ഭർത്താവായും ഈ രാജ്യത്തിൻ്റെ രാജാവായും നിങ്ങളുടെ വേദന ഞാൻ പങ്കുവെക്കുന്നു” എന്ന് കണ്ണീരണിഞ്ഞ ശബ്ദത്തോടെ അദ്ദേഹം പറഞ്ഞ വാക്കുകൾ ഭരണാധികാരി എങ്ങനെയായിരിക്കണം എന്നതിൻ്റെ ഉത്തമ ഉദാഹരണമായി ചരിത്രകാരനായ ഓലെ-ജോർഗൻ ഷുൽസ്രുഡ്-ഹാൻസെൻ അനുസ്മരിച്ചു.
പിന്നീട് 2016-ൽ, ഭിന്നലൈംഗികത പുലർത്തുന്നവർക്കും വിദേശത്തുനിന്നുള്ള അഭയാർത്ഥികൾക്കും വിവിധ മതവിശ്വാസികൾക്കും തുല്യ അവകാശങ്ങൾ ഉറപ്പുനൽകിക്കൊണ്ട് അദ്ദേഹം നടത്തിയ പ്രസംഗം അന്താരാഷ്ട്ര തലത്തിൽ വലിയ മാധ്യമശ്രദ്ധ നേടിയിരുന്നു. ജാതിക്കും മതത്തിനും ലിംഗഭേദത്തിനുമപ്പുറം മനുഷ്യത്വത്തിന് വില കൽപ്പിച്ച നോർവേ രാജാവിൻ്റെ വിയോഗം ലോകത്തിന് തന്നെ വലിയൊരു നഷ്ടമാണ്.
Norway’s King Harald V dies; Europe’s oldest ruler dies
