ചേരാനല്ലൂരിൽ 17-കാരൻ ഓടിച്ച ബെൻസ് ഇടിച്ച് കൊല്ലപ്പെട്ട ജയബാലകൃഷ്ണന്റെ കുടുംബത്തെ ആശ്വസിപ്പിക്കാൻ പ്രതിപക്ഷ നേതാവ് പിണറായി വിജയൻ വീട്ടിലെത്തി. ജയബാലകൃഷ്ണന്റെ കുടുംബത്തിന് ഇതുവരെ നീതി ലഭിച്ചില്ലെന്ന് പിണറായി വിജയൻ മാധ്യമങ്ങളോട് പറഞ്ഞു. സ്വാധീനമുള്ളവർക്കും പണമുള്ളവർക്കും എന്തുമാകാം എന്ന നിലപാട് അംഗീകരിക്കാനാവില്ലെന്നും കുറ്റവാളിക്ക് അർഹമായ ശിക്ഷ ഉറപ്പാക്കണമെന്നും അദ്ദേഹം ആവശ്യപ്പെട്ടു. ശിക്ഷ ഉറപ്പാക്കുമെന്ന് മുഖ്യമന്ത്രിയും ആഭ്യന്തര മന്ത്രിയും സഭയിൽ നൽകിയ ഉറപ്പുകൾ പാലിക്കപ്പെട്ടില്ലെന്ന് കുടുംബം ആരോപിക്കുന്നതായും, കുടുംബത്തോടൊപ്പം സമൂഹം ഒന്നാകെയുണ്ടെന്നും പിണറായി വിജയൻ കൂട്ടിച്ചേർത്തു.
അതേസമയം, പ്രോസിക്യൂഷൻ അഭിഭാഷകനിൽ തങ്ങൾക്ക് വിശ്വാസം നഷ്ടപ്പെട്ടെന്നും അദ്ദേഹത്തെ മാറ്റണമെന്നും ജയബാലകൃഷ്ണന്റെ മകൾ ഭദ്രകീർത്തി പ്രതിപക്ഷ നേതാവിനോട് ആവശ്യപ്പെട്ടു. എറണാകുളം അഡീഷണൽ സെഷൻസ് കോടതിയിൽ 17-കാരന്റെ ജാമ്യം റദ്ദാക്കണമെന്ന ആവശ്യത്തിൽ കൃത്യമായ മറുപടി നൽകാൻ പ്രോസിക്യൂട്ടർക്ക് സാധിച്ചില്ല. ജാമ്യം റദ്ദാക്കാൻ തക്ക കാരണങ്ങൾ ബോധിപ്പിക്കാൻ കഴിഞ്ഞില്ലെന്ന് ചൂണ്ടിക്കാട്ടി കോടതി പ്രോസിക്യൂഷനെയും അന്വേഷണ രീതിയെയും കടുത്ത ഭാഷയിൽ വിമർശിച്ചിരുന്നു. കോടതി ഓരോ തവണ കേസ് പരിഗണിക്കുമ്പോഴും പ്രതീക്ഷയുടെ ഗ്രാഫ് താഴുകയാണെന്ന് ഭദ്ര മാധ്യമങ്ങളോട് വ്യക്തമാക്കി.
പ്രോസിക്യൂട്ടർക്കെതിരെ വിമർശനമുയർന്ന പശ്ചാത്തലത്തിൽ, തിങ്കളാഴ്ച കേസ് ഡയറിയുമായി നേരിട്ട് ഹാജരാകാൻ അന്വേഷണ ഉദ്യോഗസ്ഥനോട് കോടതി നിർദേശിച്ചിട്ടുണ്ട്. കൂടാതെ, 17-കാരന്റെ സ്വകാര്യ ചിത്രങ്ങളും വിവരങ്ങളും പ്രചരിപ്പിച്ച സോഷ്യൽ മീഡിയ അക്കൗണ്ടുകൾക്കെതിരെ നടപടിയെടുക്കാനും കോടതി ഉത്തരവിട്ടു. രാവിലെ ജയബാലകൃഷ്ണന്റെ വീട് സന്ദർശിച്ച ആഭ്യന്തര മന്ത്രി രമേശ് ചെന്നിത്തല, കുടുംബം ആവശ്യപ്പെടുന്നവരെ പബ്ലിക് പ്രോസിക്യൂട്ടറായി നിയമിക്കാൻ സർക്കാർ തയ്യാറാണെന്ന് വ്യക്തമാക്കുകയും ചെയ്തു.
Pinarayi Visits Cheranalloor Accident Victim’s Family; Daughter Demands Change of Prosecutor
