ജലന്ധർ: അമേരിക്കയിൽ മാതാപിതാക്കളെയും മുത്തശ്ശിയെയും വെടിവെച്ച് കൊലപ്പെടുത്തിയെന്നാരോപിച്ച് പഞ്ചാബ് വംശജനായ 19കാരനെ പൊലീസ് അറസ്റ്റ് ചെയ്തു. നവാൻഷഹർ ജില്ലയിലെ ബംഗയ്ക്ക് സമീപമുള്ള ലഖ്പുർ ഗ്രാമം സ്വദേശിയായ കുടുംബം ഏതാനും മാസങ്ങൾക്ക് മുൻപാണ് നാട്ടിലെത്തിയിരുന്നത്.
ഗൗരവ് ചോപ്ര എന്ന യുവാവാണ് പിതാവ് സ്വീറ്റാ റാം (56), മാതാവ് കമ്ലേഷ് റാണി (46), മാതൃവംശത്തിലെ മുത്തശ്ശി മോഹിന്ദർ കൗർ (73) എന്നിവരെ ടെക്സസിലെ ആൽട്ടണിലുള്ള വീട്ടിൽ ജൂൺ 16-ന് രാത്രി വെടിവെച്ച് കൊലപ്പെടുത്തിയതെന്നാണ് കേസ്. 21 വയസ്സുള്ള സഹോദരനെ വെടിവെച്ച് കൊല്ലാൻ ശ്രമിച്ചതുമായി ബന്ധപ്പെട്ട് ഗൗരവിനെതിരെ ‘അറ്റംപ്റ്റഡ് ക്യാപിറ്റൽ മർഡർ’ കുറ്റവും ചുമത്തിയിട്ടുണ്ടെന്ന് ഹിഡാൽഗോ കൗണ്ടി ഷെറിഫ് എഡി ഗ്വേര അറിയിച്ചു.
പൊലീസ് രേഖകൾ പ്രകാരം, മുകളിലത്തെ നിലയിലേക്ക് കയറിയ സഹോദരനാണ് ആദ്യം മൃതദേഹങ്ങൾ കണ്ടത്. തുടർന്ന് ഗൗരവ് തോക്കുമായി എത്തി സഹോദരന്റെ തലയ്ക്ക് നേരെ വെടിയുതിർത്തെങ്കിലും ലക്ഷ്യം തെറ്റി. വീട്ടിനുള്ളിൽ നടന്ന പിന്തുടരലിനൊടുവിൽ സഹോദരൻ രക്ഷപ്പെട്ട് പൊലീസിനെ വിവരമറിയിക്കുകയായിരുന്നു. വെളുത്ത ലെക്സസ് കാറിൽ രക്ഷപ്പെടാൻ ശ്രമിച്ച ഗൗരവിനെ പൊലീസ് പിന്തുടർന്ന് പിടികൂടി. വാഹനത്തിൽ നിന്ന് കൊലപാതകത്തിന് ഉപയോഗിച്ചതായി സംശയിക്കുന്ന ആയുധവും കണ്ടെത്തിയിട്ടുണ്ട്.
നിരവധി ക്യാപിറ്റൽ മർഡർ കുറ്റങ്ങൾ ചുമത്തി ഗൗരവിനെ കോടതിയിൽ ഹാജരാക്കി. കൊലപാതകത്തിന് പിന്നിലെ കാരണം വ്യക്തമല്ലെന്നും അന്വേഷണം തുടരുകയാണെന്നും ഷെറിഫ് ഗ്വേര പറഞ്ഞു. പ്രതിക്ക് മുൻ ക്രിമിനൽ പശ്ചാത്തലമില്ലെന്നും മയക്കുമരുന്ന് ഉപയോഗത്തിന്റെ തെളിവുകൾ ലഭിച്ചിട്ടില്ലെന്നും അദ്ദേഹം കൂട്ടിച്ചേർത്തു.
സംഭവവാർത്ത പുറത്തുവന്നതോടെ ലഖ്പൂരിലെ ബന്ധുക്കൾ ഞെട്ടലിലാണ്. “നാലോ അഞ്ചോ മാസം മുൻപാണ് കുടുംബം നാട്ടിലെത്തിയത്. എല്ലാവരും വളരെ സന്തോഷത്തിലായിരുന്നു. ഇത്തരമൊരു സംഭവം വിശ്വസിക്കാനാവുന്നില്ല,” സ്വീറ്റാ റാമിന്റെ ബന്ധുവായ മഖൻ സിംഗ് പറഞ്ഞു. ഏകദേശം 30 വർഷം മുൻപാണ് സ്വീറ്റാ റാം അമേരിക്കയിലേക്ക് കുടിയേറിയത്. ടെക്സസിലെ പാംവ്യൂവിൽ പ്രമുഖ ബിസിനസ് സംരംഭകനായിരുന്ന അദ്ദേഹത്തിന്റെ മരണത്തിൽ പ്രദേശവാസികളും അനുശോചനം രേഖപ്പെടുത്തി.
“റാം എനിക്ക് കുടുംബാംഗത്തെപ്പോലെയായിരുന്നു. എപ്പോഴും മറ്റുള്ളവരെ പ്രചോദിപ്പിക്കുകയും നല്ല കാര്യങ്ങൾ മാത്രം സംസാരിക്കുകയും ചെയ്ത വ്യക്തിയായിരുന്നു അദ്ദേഹം,” എന്ന് പാംവ്യൂ മേയർ റിക് വില്ലാറിയൽ പ്രതികരിച്ചു.
Punjabi teen arrested for killing parents and grandmother in US
