സംസ്ഥാനത്തെ കൊടും ചൂടിന് ആശ്വാസമായി മഴയെത്തുന്നു. ഇന്ന് മുതല് വെള്ളിയാഴ്ച വരെ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. നാളെ മുതല് വിവിധ ജില്ലകളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്. ഇന്ന് പാലക്കാട് ജില്ലയില് 40 ഡിഗ്രി സെല്ഷ്യസ് വരെയും കൊല്ലം ജില്ലയില് 39 ഡിഗ്രി സെല്ഷ്യസ് വരെയും താപനില ഉയര്ന്നേക്കുമെന്നാണ് മുന്നറിയിപ്പ്.
ബുധനാഴ്ച പത്തനംതിട്ടയിലും ഇടുക്കിയിലും വ്യാഴാഴ്ച കണ്ണൂര്, കാസര്കോട് ജില്ലകളിലും കേന്ദ്ര കാലാവസ്ഥ വകുപ്പ് യെല്ലോ അലേര്ട്ടാണ് നല്കിയിരിക്കുന്നത്. പത്തനംതിട്ട, കോട്ടയം, തൃശൂര്, കോഴിക്കോട് ജില്ലകളില് 38 ഡിഗ്രി സെല്ഷ്യസ് വരെയും താപനില ഉയര്ന്നേക്കാമെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി.
ഈ ജില്ലകളില് സാധാരണയെക്കാള് മൂന്ന് മുതല് നാല് ഡിഗ്രി സെല്ഷ്യസ് വരെ താപനില ഉയരാന് സാധ്യതയുള്ളതിനാല് ജനങ്ങള് സുരക്ഷാ നിര്ദേശങ്ങള് പാലിക്കണമെന്ന് കേന്ദ്ര കാലാവസ്ഥ വകുപ്പ് അറിയിച്ചു. നിലവില് ഇടുക്കി, വയനാട് ജില്ലകളില് ഒഴികെ 12 ജില്ലകളില് കേന്ദ്ര കാലാവസ്ഥ വകുപ്പിന്റെ ഉയര്ന്ന താപനിലാ മുന്നറിയിപ്പായ യെല്ലോ അലര്ട്ട് നിലനില്ക്കുകയാണ്.
അതോടൊപ്പം ഉത്തരേന്ത്യയിലും താപനില ഉയരുകയാണ്. ഉത്തരേന്ത്യന് സംസ്ഥാനങ്ങളില് കനത്ത ചൂട് തുടരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ഡൽഹിയിൽ ഇന്ന് നേരിയ തോതില് വേനല്മഴ ലഭിക്കും എന്നാണ് വിലയിരുത്തല്.
Relief from the scorching heat; Chance of rain with thunderstorms in the state from today
