ഹോർമുസ് കടലിടുക്ക് തുറക്കുന്നതിനായി ഇറാൻ മുന്നോട്ടുവച്ച ഏഴ് നിബന്ധനകളിൽ ചിലത് അമേരിക്ക അംഗീകരിച്ചതായി ഇറാൻ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്‌സൻ റെസായി. എന്നാൽ, മറ്റ് ആവശ്യങ്ങളിൽ വ്യക്തതയില്ലെന്നും അമേരിക്കയുടെ മറുപടി തൃപ്തികരമല്ലെന്നും അദ്ദേഹം പറഞ്ഞു. ഖത്തർ വഴിയാണ് അമേരിക്ക ഇറാന് മറുപടി നൽകിയത്. നിബന്ധനകൾ അംഗീകരിക്കുന്നതുവരെ ഹോർമുസ് കടലിടുക്ക് അമേരിക്കയ്ക്കായി തുറക്കില്ലെന്നും ചർച്ചകൾ പുനരാരംഭിക്കില്ലെന്നും റെസായി വ്യക്തമാക്കി. ഏതൊക്കെ ആവശ്യങ്ങളാണ് അമേരിക്ക അംഗീകരിച്ചതെന്ന് അദ്ദേഹം വെളിപ്പെടുത്തിയില്ല.
നിബന്ധനകൾ അംഗീകരിച്ചാൽ ഏഴ് ദിവസത്തിനുള്ളിൽ കടലിടുക്ക് തുറന്ന് സാധാരണ കപ്പൽഗതാഗതം പുനഃസ്ഥാപിക്കാമെന്നാണ് ഇറാന്റെ നിർദേശം. എന്നാൽ, ധാരണയിലെത്തുന്നതിൽ ഇപ്പോഴും അനിശ്ചിതത്വം തുടരുകയാണ്. ആഗോള എണ്ണ, എൽഎൻജി വിതരണത്തിന്റെ ഏകദേശം അഞ്ചിലൊന്ന് കടന്നുപോകുന്ന പാതയാണ് ഹോർമുസ് കടലിടുക്ക്. ഇവിടെ കപ്പൽഗതാഗതം ദീർഘകാലം തടസ്സപ്പെടുന്നത് ആഗോള ഊർജവിപണിയെ ബാധിച്ചേക്കും.
ഫെബ്രുവരിയിൽ ഇറാനുനേരെ അമേരിക്കയും ഇസ്രയേലും നടത്തിയ ആക്രമണങ്ങളോടെയാണ് സംഘർഷം ആരംഭിച്ചത്. യുദ്ധം അവസാനിപ്പിക്കാൻ ഖത്തറിന്റെ മധ്യസ്ഥതയിൽ ചർച്ചകൾ തുടരുന്നുണ്ടെങ്കിലും കടലിടുക്ക് തുറക്കുന്നതുമായി ബന്ധപ്പെട്ട് ഇരുരാജ്യങ്ങളും ഇതുവരെ സമഗ്രമായ ധാരണയിലെത്തിയിട്ടില്ല.
‘Response insufficient’: Iran claims US accepted ‘some of its seven conditions’ to reopen Strait of Hormuz
