ലണ്ടൻ: യുകെയിലെ പ്രമുഖ സൈനിക താവളമായ ആർ.എ.എഫ് ഫെയർഫോർഡിൽ നിന്ന് അമേരിക്ക തങ്ങളുടെ മുഴുവൻ ബോംബർ വിമാനങ്ങളും അടിയന്തരമായി പിൻവലിച്ചു. വ്യോമതാവളത്തിന് സമീപം സംശയാസ്പദമായ സാഹചര്യത്തിൽ വാഹനങ്ങൾ കണ്ടെത്തുകയും ഭീകരവിരുദ്ധ പൊലീസ് അന്വേഷണം ആരംഭിക്കുകയും ചെയ്തതിന് പിന്നാലെയാണ് യു.എസിന്റെ ഈ നിർണായക നീക്കം. താവളത്തിലുണ്ടായിരുന്ന എല്ലാ ബോംബർ വിമാനങ്ങളും അമേരിക്കയിലെ സ്വന്തം സ്റ്റേഷനുകളിലേക്ക് മടക്കിവിളിച്ചതായി യു.എസ് പ്രതിരോധ വകുപ്പ് ഉദ്യോഗസ്ഥർ സ്ഥിരീകരിച്ചു.
വിമാനങ്ങൾ പിൻവലിച്ചതിന് അമേരിക്ക ഔദ്യോഗികമായി കാരണങ്ങളൊന്നും വ്യക്തമാക്കിയിട്ടില്ലെങ്കിലും, സെപ്റ്റംബർ 27-നുണ്ടായ സുരക്ഷാ വീഴ്ചയാണ് ഇതിന് പിന്നിലെന്നാണ് വൈറ്റ്ഹൌസ് വൃത്തങ്ങൾ നൽകുന്ന സൂചന. ഇതൊരു രാഷ്ട്രീയ തീരുമാനമല്ലെന്നും, സൈനിക തലത്തിൽ എടുത്ത അടിയന്തര ഓപ്പറേഷണൽ തീരുമാനമാണെന്നും യു.എസ് സൈന്യം ബ്രിട്ടീഷ് അധികൃതരെ അറിയിച്ചിട്ടുണ്ട്. എന്നാൽ സംഭവത്തിൽ യുകെ പ്രതിരോധ മന്ത്രാലയം ഇതുവരെ പ്രതികരിച്ചിട്ടില്ല.
സെപ്റ്റംബർ 27-ന് പുലർച്ചെ വ്യോമതാവളത്തിന് നേരെ നീങ്ങിയ മൂന്ന് സംശയാസ്പദമായ വാഹനങ്ങളെ കേന്ദ്രീകരിച്ച് നടത്തിയ പരിശോധനയിലാണ് ലണ്ടൻ സ്വദേശികളായ അഞ്ച് യുവാക്കളെ പൊലീസ് ആദ്യം അറസ്റ്റ് ചെയ്തത്. സ്ഫോടകവസ്തുക്കൾ കൈവശം വെക്കൽ, ഭീകരാക്രമണത്തിന് പദ്ധതിയിടൽ എന്നീ കുറ്റങ്ങൾ ചുമത്തിയായിരുന്നു അറസ്റ്റ്. തുടർന്ന് വ്യാഴാഴ്ച ലണ്ടനിൽ നിന്ന് യുകെ-ഇറാൻ പൗരത്വമുള്ള ഇരുപത്തിയഞ്ചുകാരനായ ആറാമത് ഒരാളെയും പൊലീസ് കസ്റ്റഡിയിലെടുത്തു. എന്നാൽ, തന്ത്രപരമായ അന്വേഷണത്തിന്റെ ഭാഗമാണെന്ന് വ്യക്തമാക്കി നിലവിൽ ആറുപേരെയും പൊലീസ് ജാമ്യത്തിൽ വിട്ടയച്ചിരിക്കുകയാണ്. പ്രതികളെ വിട്ടയച്ച ബ്രിട്ടന്റെ നടപടിയിൽ യു.എസ് പ്രസിഡന്റ് ഡോണൾഡ് ട്രംപ് ആശ്ചര്യം പ്രകടിപ്പിച്ചു.
സംഭവത്തിന് പിന്നിൽ ഇറാന്റെ പങ്കുണ്ടെന്നതിന് ശക്തമായ സൂചനകളുണ്ടെന്ന് ബ്രിട്ടീഷ് പ്രധാനമന്ത്രി ആൻഡി ബേൺഹാം വ്യക്തമാക്കിയിരുന്നു. വിദേശ ശക്തികളുടെ ഇടപെടൽ ഇതിൽ വ്യക്തമാണെന്ന് യു.എസ് വിദേശകാര്യ സെക്രട്ടറി മാർക്കോ റൂബിയോയും പ്രതികരിച്ചു. എന്നാൽ ആരോപണങ്ങൾ ഇറാൻ പൂർണ്ണമായി നിഷേധിച്ചു.
കഴിഞ്ഞ ഏതാനും മാസങ്ങളായി മിഡിൽ ഈസ്റ്റിൽ ഇറാനെതിരെയുള്ള പ്രതിരോധ ആക്രമണങ്ങൾക്കായി യു.എസ് ബോംബർ വിമാനങ്ങൾ ഈ താവളമാണ് ഉപയോഗിച്ചിരുന്നത്. തങ്ങൾക്കെതിരായ ആക്രമണങ്ങൾക്ക് ഉപയോഗിക്കുന്ന ഏത് സൈനിക താവളവും ലക്ഷ്യമിടുമെന്ന് ജൂലൈയിൽ ഇറാൻ മുന്നറിയിപ്പ് നൽകിയിരുന്നു. ഇതിന് പിന്നാലെയാണ് വ്യോമതാവളത്തിന് നേരെ സുരക്ഷാ ഭീഷണിയുണ്ടായതും അമേരിക്ക വിമാനങ്ങൾ പിൻവലിച്ചതും.
Security concerns: US withdraws all bomber aircraft from British airbase
