ന്യൂജേഴ്സി: അമേരിക്കയിലെ മധ്യ – കിഴക്കൻ സംസ്ഥാനങ്ങളിൽ ആഞ്ഞടിച്ച കടുത്ത ഉഷ്ണതരംഗത്തിലും പിന്നാലെയുണ്ടായ ശക്തമായ കൊടുങ്കാറ്റിലും വ്യാപക നാശനഷ്ടം. ന്യൂജേഴ്സിയിൽ മാത്രം ചൂട് താങ്ങാനാവാതെ 25 ഓളം പേർ മരണപ്പെട്ടതായി ആരോഗ്യവകുപ്പ് അധികൃതർ അറിയിച്ചു. ജൂലൈ നാലിലെ സ്വാതന്ത്ര്യദിന വാരാന്ത്യത്തോടനുബന്ധിച്ചാണ് രാജ്യം ചരിത്രത്തിലെ ഏറ്റവും കടുത്ത ചൂടിന് സാക്ഷ്യം വഹിച്ചത്.
അന്തരീക്ഷത്തിൽ രൂപപ്പെട്ട ‘ഹീറ്റ് ഡോം’ പ്രതിഭാസമാണ് താപനില കുതിച്ചുയരാൻ കാരണമായത്. മരിച്ചവരിൽ ഭൂരിഭാഗം പേരും വീടുകളിൽ എയർ കണ്ടീഷണർ സൗകര്യമില്ലാത്തവരായിരുന്നു എന്ന് ന്യൂജേഴ്സി ഹെൽത്ത് കമ്മീഷണർ ഡോ. റെയ്നാർഡ് വാഷിംഗ്ടൺ വ്യക്തമാക്കി. ചിലരെ തെരുവുകളിലും പാർക്ക് ചെയ്ത കാറുകൾക്കുള്ളിലുമാണ് മരിച്ച നിലയിൽ കണ്ടെത്തിയത്. കഴിഞ്ഞ 14 വർഷത്തിനിടയിലെ ഏറ്റവും കഠിനമായ ചൂടാണിതെന്നും മുതിർന്നവരെ മാത്രമല്ല, എല്ലാ പ്രായത്തിലുള്ളവരെയും ഇത് ബാധിക്കുന്നുണ്ടെന്നും ഗവർണർ മിക്കി ഷെറിൽ പറഞ്ഞു.
അറ്റ്ലാൻ്റിക് സിറ്റിയിൽ 106 ഡിഗ്രി ഫാരൻഹീറ്റും, തലസ്ഥാനമായ വാഷിംഗ്ടൺ ഡി.സിയിൽ 103 ഡിഗ്രിയും ചൂടാണ് രേഖപ്പെടുത്തിയത്. ചരിത്രത്തിൽ രേഖപ്പെടുത്തിയ ഏറ്റവും ചൂടേറിയ ജൂലൈ 4 കൂടിയായിരുന്നു ഇത്.
ശനിയാഴ്ച രാത്രി മണിക്കൂറിൽ 80 മൈൽ വേഗതയിൽ വീശിയടിച്ച കാറ്റിലും ഇടിമിന്നലിലും വ്യാപക നാശനഷ്ടമുണ്ടായി. ന്യൂജേഴ്സിയിൽ മാത്രം മൂന്ന് ലക്ഷത്തോളം വീടുകളിലെ വൈദ്യുതി ബന്ധം വിച്ഛേദിക്കപ്പെട്ടു. മോശം കാലാവസ്ഥയെത്തുടർന്ന് രാജ്യത്തെ പ്രമുഖ സ്വാതന്ത്ര്യദിന ആഘോഷങ്ങളും പടക്കപ്രകടനങ്ങളും റദ്ദാക്കേണ്ടി വന്നു. വാഷിംഗ്ടൺ ഡി.സിയിലെ നാഷണൽ മാളിൽ പ്രസിഡൻ്റ് ഡോണൾഡ് ട്രംപ് പ്രസംഗിക്കുന്നതിന് തൊട്ടുമുമ്പ് കനത്ത ഇടിമിന്നൽ ഉണ്ടായതിനെത്തുടർന്ന് ജനങ്ങളെ സമീപത്തെ സർക്കാർ കെട്ടിടങ്ങളിലേക്ക് മാറ്റിപ്പാർപ്പിച്ചു. മണിക്കൂറുകൾ വൈകിയാണ് ചടങ്ങുകൾ ആരംഭിച്ചത്.
ഇല്ലിനോയിയിൽ ക്യാമ്പർ ട്രെയിലറിന് മുകളിലേക്ക് മരം ഒടിഞ്ഞുവീണ് ഒരു സ്ത്രീ മരണപ്പെടുകയും ചെയ്തു. ചില വടക്കുകിഴക്കൻ പ്രദേശങ്ങളിൽ താപനില നേരിയ തോതിൽ കുറഞ്ഞിട്ടുണ്ടെങ്കിലും, മിഡ്-അറ്റ്ലാൻ്റിക്, തെക്കൻ സംസ്ഥാനങ്ങളിൽ വരും ദിവസങ്ങളിലും കനത്ത മഴയ്ക്കും പെട്ടെന്നുള്ള വെള്ളപ്പൊക്കത്തിനും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.
Severe heat wave in America; 25 deaths in New Jersey alone, millions in the dark
