ലണ്ടൻ: യുകെയിലെ പ്രശസ്തമായ ആർ.എ.എഫ് ഫെയർഫോർഡ് വ്യോമതാവളത്തിൽ നിന്ന് അമേരിക്ക തങ്ങളുടെ അത്യാധുനിക ബോംബർ വിമാനങ്ങൾ അടിയന്തിരമായി പിൻവലിച്ചതിനു പിന്നിലെ കാരണം വെളിപ്പെടുത്തി യുഎസ് പ്രസിഡന്റ് ഡോണൾഡ് ട്രംപ് . താവളത്തിന് നേരെ ഉണ്ടായ ഗുരുതരമായ സുരക്ഷാ ഭീഷണിയെ തുടർന്നാണ് നടപടിയെന്ന് ട്രംപ് സ്ഥിരീകരിച്ചു. ഏകദേശം ഒരു ഡസനോളം ബി-1 (B-1) ബോംബർ വിമാനങ്ങളാണ് അമേരിക്കയിലെ സ്വന്തം താവളങ്ങളിലേക്ക് തിരികെ എത്തിച്ചിരിക്കുന്നത്.
“വ്യോമതാവളത്തിന് നേരെ വ്യക്തമായ ചില ഭീഷണികൾ ഉണ്ടായിരുന്നു. ശത്രുക്കൾക്ക് അവസരം നൽകാതിരിക്കാനാണ് വിമാനങ്ങൾ അവിടെനിന്നും മാറ്റിയത്,” എന്ന് വാഷിംഗ്ടണിൽ മാധ്യമപ്രവർത്തകരോട് സംസാരിക്കവെ ട്രംപ് വ്യക്തമാക്കി. ഭീഷണിക്ക് പിന്നിൽ പ്രവർത്തിച്ചവരെക്കുറിച്ച് കൃത്യമായ വിവരങ്ങൾ ലഭിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
സെപ്റ്റംബർ 27-ന് ഫെയർഫോർഡ് വ്യോമതാവളത്തിന് സമീപം സംശയാസ്പദമായ രീതിയിൽ മൂന്ന് വാഹനങ്ങൾ കാണപ്പെട്ടതിനെ തുടർന്ന് ബ്രിട്ടീഷ് കൗണ്ടർ ടെററിസം പൊലീസ് വലിയ തോതിലുള്ള അന്വേഷണം ആരംഭിച്ചിരുന്നു. സംഭവവുമായി ബന്ധപ്പെട്ട് ഒരു ബ്രിട്ടീഷ്-ഇറാനിയൻ പൗരനടക്കം ആറ് പേരെ പൊലീസ് അറസ്റ്റ് ചെയ്യുകയും പിന്നീട് ജാമ്യത്തിൽ വിടുകയും ചെയ്തു. ഈ സംഭവത്തിന് പിന്നിൽ ഇറാന്റെ പങ്കുണ്ടെന്ന് യുഎസ് ഉദ്യോഗസ്ഥരും ബ്രിട്ടീഷ് പ്രധാനമന്ത്രി ആൻഡി ബേൺഹാമും സൂചന നൽകിയിട്ടുണ്ട്. എന്നാൽ തങ്ങൾക്കെതിരെയുള്ള ആരോപണങ്ങൾ ഇറാൻ ശക്തമായി നിഷേധിച്ചു.
ഇറാനെതിരെയുള്ള പ്രതിരോധ ആക്രമണങ്ങൾക്കായി അമേരിക്കൻ വ്യോമസേന ഈ താവളമാണ് പ്രധാനമായും ഉപയോഗിച്ചിരുന്നത്. യുഎസ് വിമാനങ്ങൾ പെട്ടെന്ന് പിൻവലിച്ചത് മിഡിൽ ഈസ്റ്റിൽ ഇറാനെതിരെ വേഗത്തിൽ വ്യോമാക്രമണം നടത്താനുള്ള അമേരിക്കയുടെ ശേഷിയെ താൽക്കാലികമായി ബാധിക്കുമെന്ന് പ്രതിരോധ വിദഗ്ദ്ധർ വിലയിരുത്തുന്നു. വരും ദിവസങ്ങളിൽ ഈ വിമാനങ്ങൾ ഡീഗോ ഗാർസിയയിലുള്ള താവളത്തിലേക്കോ ഗൾഫ് രാജ്യങ്ങളിലേക്കോ മാറ്റാനാണ് സാധ്യത.
Trump says withdrawal of state-of-the-art US warplanes from Britain was due to security threats.
