വാഷിംഗ്ടൺ: മിഡിൽ ഈസ്റ്റിലെ സങ്കീർണ്ണമായ സുരക്ഷാ സാഹചര്യങ്ങൾ കണക്കിലെടുത്ത് മേഖലയിലുള്ള അമേരിക്കൻ പൗരന്മാർക്ക് യുഎസ് സർക്കാർ അതീവ ജാഗ്രതാ നിർദ്ദേശം നൽകി. സൗദി അറേബ്യയിലെ സിവിലിയൻ വിമാനത്താവളങ്ങൾക്ക് നേരെ ഇറാൻ പിന്തുണയുള്ള ഹൂതി വിമതർ നടത്തുന്ന ആക്രമണങ്ങളും യാത്രാ തടസ്സങ്ങളും ചൂണ്ടിക്കാണിച്ചാണ് ഈ മുന്നറിയിപ്പ്.
മേഖലയിലെ സംഘർഷങ്ങൾ പെട്ടെന്ന് വഷളാകാൻ സാധ്യതയുണ്ടെന്നും, ഇറാനും സഖ്യകക്ഷികളും വിദേശത്തുള്ള യുഎസ് താൽപ്പര്യങ്ങളെയും പൗരന്മാരെയും ലക്ഷ്യമിട്ടേക്കാമെന്നും സുരക്ഷാ മുന്നറിയിപ്പിൽ വ്യക്തമാക്കുന്നു. സൗദി അറേബ്യയിലുണ്ടായ ഹൂതി ആക്രമണങ്ങളിൽ ഒരു അമേരിക്കക്കാരൻ ഉൾപ്പെടെ കുറഞ്ഞത് 20 പേർ കൊല്ലപ്പെട്ടിരുന്നു. തുടർന്ന് ഫ്ലൈറ്റ് റദ്ദാക്കലുകൾക്കും വ്യോമാതിർത്തി അടച്ചുപൂട്ടലുകൾക്കും സാധ്യതയുള്ളതിനാൽ യാത്രക്കാർ അതീവ ജാഗ്രത പാലിക്കണമെന്ന് യുഎസ് മിഷൻ നിർദ്ദേശിച്ചു.
അതേസമയം, യെമന്റെ തെക്കൻ പ്രവിശ്യയായ ഷബ്‌വയിലെ അൽ-അലം സൈനിക ക്യാമ്പിന് നേരെ ഇറാൻ പിന്തുണയുള്ള ഹൂതി വിമതർ നടത്തിയ ബാലിസ്റ്റിക് മിസൈലാക്രമണത്തിൽ കുറഞ്ഞത് 20 സർക്കാർ സൈനികർ കൊല്ലപ്പെട്ടു. ആക്രമണത്തിൽ ഇരുപതോളം പേർക്ക് പരുക്കേറ്റിട്ടുണ്ട്. അന്താരാഷ്ട്രതലത്തിൽ അംഗീകരിക്കപ്പെട്ട യമൻ സർക്കാരുമായി ബന്ധപ്പെട്ട സൈനിക ഉദ്യോഗസ്ഥരാണ് ഇക്കാര്യം സ്ഥിരീകരിച്ചത്. കഴിഞ്ഞ കുറേ മാസങ്ങളായി അമേരിക്കയും ഇറാനും തമ്മിലുള്ള സംഘർഷങ്ങളുടെ പശ്ചാത്തലത്തിൽ യമനിലെ ആഭ്യന്തരയുദ്ധവും കൂടുതൽ രൂക്ഷമായിരിക്കുകയാണ്.
