പശ്ചിമേഷ്യയിൽ അമേരിക്കയും ഇറാനും തമ്മിൽ ഇതുവരെയുള്ളതിൽവച്ച് ഏറ്റവും വലിയ സൈനിക ഏറ്റുമുട്ടൽ ഉണ്ടായേക്കാമെന്ന സൂചന നൽകി അമേരിക്കയും ഇസ്രയേലും നീക്കങ്ങൾ ശക്തമാക്കി. ചർച്ചകൾ തടസ്സപ്പെടുകയും ഇരുവിഭാഗങ്ങളും പരസ്പരം ഭീഷണികൾ തുടരുകയും ചെയ്യുന്ന സാഹചര്യത്തിൽ, വരുംദിവസങ്ങളിൽ വലിയ തോതിലുള്ള ആക്രമണങ്ങൾ പുനരാരംഭിച്ചേക്കുമെന്നാണ് വിലയിരുത്തപ്പെടുന്നത്. നിലവിൽ രണ്ട് വിമാനവാഹിനി കപ്പലുകൾ പശ്ചിമേഷ്യയിൽ വിന്യസിച്ചിട്ടുള്ള യുഎസ്, മൂന്നാമത്തെ വിമാനവാഹിനിക്കപ്പലായ ‘യു.എസ്.എസ് തിയോഡോർ റൂസ്‌വെൽറ്റ്’ കൂടി മേഖലയിലേക്ക് അയച്ചിട്ടുണ്ട്.
നവംബർ ആദ്യത്തോടെ ഇരുപതിനായിരത്തിലധികം നാവികരും മറൈനുകളും നൂറുകണക്കിന് യുദ്ധവിമാനങ്ങളും മേഖലയിൽ സജ്ജമാകും. ഇറാന്റെ ആണവനിലയങ്ങളെ ലക്ഷ്യമിട്ട് ‘മദർ ഓഫ് ഓൾ ബോംബ്’ (MOAB) പ്രയോഗിച്ചേക്കുമെന്ന് ഡൊണാൾഡ് ട്രംപ് മുന്നറിയിപ്പ് നൽകിയിട്ടുമുണ്ട്. അമേരിക്കയുടെ ഈ കടുത്ത നീചമായ ആക്രമണങ്ങളെ മുൻകൂട്ടിക്കണ്ട് ഇറാനും ശക്തമായ തയ്യാറെടുപ്പുകളിലാണ്. ഒറ്റയടിക്ക് 30 ബാലിസ്റ്റിക് മിസൈലുകൾ വിക്ഷേപിച്ചുകൊണ്ട് ഇറാൻ രാജ്യവ്യാപകമായി സൈനിക പരിശീലനങ്ങൾ ആരംഭിച്ചിട്ടുണ്ട്.
അമേരിക്കൻ ആക്രമണമുണ്ടായാൽ രാജ്യത്തെ എണ്ണ ശുദ്ധീകരണശാലകൾ, കടലടിത്തട്ടിലെ കേബിളുകൾ, ഡാറ്റാ സെന്ററുകൾ എന്നിവയൊക്കെ ലക്ഷ്യമിടുമെന്ന് ഇറാന്റെ നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്‌സൻ റെസായി മുന്നറിയിപ്പ് നൽകി. കൂടാതെ, ‘ഫാദർ ഓഫ് ഓൾ ബോംബ്’ (FOAB) എന്ന പുതിയ വിനാശകരമായ ആയുധം തയ്യാറായി വരുന്നുവെന്നും ഇറാൻ കഴിഞ്ഞ ദിവസം ഔദ്യോഗികമായി വെളിപ്പെടുത്തിയിരുന്നു. ഈ സംഭവവികാസങ്ങളെല്ലാം മേഖലയെ സമ്പൂർണ്ണ യുദ്ധത്തിലേക്ക് നയിക്കുന്നതാണ്.
സംഘർഷ സാധ്യത കണക്കിലെടുത്ത് സൗദി അറേബ്യ, ബഹ്റൈൻ, ഖത്തർ, യു.എ.ഇ. എന്നിവിടങ്ങളിലെ അമേരിക്കൻ പൗരന്മാർക്ക് യു.എസ്. എംബസികൾ സുരക്ഷാ മുന്നറിയിപ്പ് നൽകിയിട്ടുണ്ട്. സൗദിയിലെ നയതന്ത്ര ഉദ്യോഗസ്ഥരോടും കുടുംബങ്ങളോടും മടങ്ങാൻ ഒക്ടോബർ 21-ന് യു.എസ്. ആവശ്യപ്പെടുകയുണ്ടായി. റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിൽ ഹൂതികൾ നടത്തിയ മിസൈൽ ആക്രമണത്തിൽ ഒരു ഇന്ത്യൻ പൗരൻ കൊല്ലപ്പെട്ടതിനെ തുടർന്ന്, സൗദിയിലുള്ള ഇന്ത്യൻ പൗരന്മാർക്കും ഇന്ത്യ കർശന സുരക്ഷാ മുന്നറിയിപ്പുകൾ നൽകിയിട്ടുണ്ട്. ഒക്ടോബർ 31 വരെ ഇന്ത്യൻ എയർലൈനുകൾ സൗദിയിലേക്കുള്ള സർവീസുകൾ റദ്ദാക്കിയിട്ടുമുണ്ട്.
ഇതിനിടെ, ഡസൻകണക്കിന് ഇസ്രയേലി യുദ്ധവിമാനങ്ങൾ സിറിയൻ, ഇറാഖി വ്യോമപാതയിലൂടെ ഇറാന്റെ അതിർത്തിക്ക് സമീപം നിരീക്ഷണ പറക്കൽ നടത്തിയത് സംഘർഷസാധ്യത ഇരട്ടിപ്പിച്ചിട്ടുണ്ട്. ഇസ്രയേലും ഈ സൈനിക നീക്കത്തിൽ സജീവമായി പങ്കാളിയാകുമെന്നാണ് ഇത് വ്യക്തമാക്കുന്നത്. വരുന്ന രണ്ടാഴ്ചയ്ക്കുള്ളിൽ നടക്കാനിരിക്കുന്ന അമേരിക്കൻ, ഇസ്രയേൽ തിരഞ്ഞെടുപ്പുകൾ സൈനിക നടപടിയുടെ സമയത്തെ സ്വാധീനിക്കുമെന്നാണ് വിദഗ്ധരുടെ വിലയിരുത്തൽ. ഹോർമുസ് കടലിടുക്ക് വഴിയുള്ള എണ്ണ ഗതാഗതം തുറന്നുകൊടുക്കാനും യുറേനിയം വിട്ടുകൊടുക്കാനും ഇറാൻ വിസമ്മതിക്കുന്നതാണ് ഈ പ്രതിസന്ധിക്ക് ആക്കംകൂട്ടുന്നത്.
US and Israel Intensify Military Moves in West Asia; Iran Warns of Deploying ‘Father of All Bombs’
