വാഷിംഗ്ടൺ: അമേരിക്കൻ സ്ഥിരതാമസത്തിനുള്ള (ഗ്രീൻ കാർഡ്) ഏറ്റവും ഉയർന്ന വിസ വിഭാഗമായ ഇബി-1-ൽ ഇന്ത്യക്കാർക്കുള്ള കാത്തിരിപ്പ് കാലാവധി വർദ്ധിക്കുന്നതായി റിപ്പോർട്ട്. ഉയർന്ന യോഗ്യതയുള്ളവർക്ക് മുൻകാലങ്ങളിൽ വളരെ വേഗത്തിൽ ഗ്രീൻ കാർഡ് ഉറപ്പാക്കിയിരുന്ന ഈ വിഭാഗത്തിൽ, അപേക്ഷകരുടെ എണ്ണത്തിലുണ്ടായ വൻ വർദ്ധനവാണ് നിലവിലെ പ്രതിസന്ധിക്ക് കാരണം.
നടപ്പ് സാമ്പത്തിക വർഷം അവസാനിക്കുന്നതിന് മുൻപ് തന്നെ ഇന്ത്യക്കാർക്കായി നിശ്ചയിച്ചിട്ടുള്ള വിസ പരിധി പൂർത്തിയാകാൻ സാധ്യതയുണ്ടെന്ന് യു.എസ്. സ്റ്റേറ്റ് ഡിപ്പാർട്ട്മെൻ്റ് മുന്നറിയിപ്പ് നൽകിയിട്ടുണ്ട്. നിശ്ചിത പരിധി കഴിഞ്ഞാൽ ഈ വിഭാഗത്തിൽ താൽക്കാലികമായി വിസ അനുവദിക്കുന്നത് നിർത്തിവെച്ചേക്കുമെന്നാണ് സൂചന.
നിലവിലെ ഔദ്യോഗിക കട്ട് ഓഫ് തീയതി അനുസരിച്ച്, 2022 ഒക്ടോബർ 15-നോ അതിന് മുൻപോ അപേക്ഷ സമർപ്പിച്ച ഇന്ത്യക്കാർക്കാണ് ഇപ്പോൾ ഗ്രീൻ കാർഡ് അനുവദിച്ച് വരുന്നത്. ഇത് പ്രകാരം ഒരു ഇന്ത്യൻ പൗരന് ഇബി-1 വിഭാഗത്തിൽ ഗ്രീൻ കാർഡ് ലഭിക്കാൻ നിലവിൽ ഏകദേശം 3.5 മുതൽ 4 വർഷം വരെ കാത്തിരിക്കേണ്ടി വരുന്നുണ്ട്.
അപേക്ഷകൾ കൂടാൻ കാരണം
ഇബി-2, ഇബി-3 വിസ വിഭാഗങ്ങളിൽ വർഷങ്ങളായുള്ള വലിയ കാത്തിരിപ്പ് കാലാവധി നേരിടുന്ന പല ഇന്ത്യക്കാരും, വേഗത്തിൽ ഗ്രീൻ കാർഡ് നേടാനായി വലിയ തോതിൽ ഇബി-1 വിഭാഗത്തിലേക്ക് മാറുന്നതാണ് നിലവിലെ തിരക്കിന് പ്രധാന കാരണം. കൂടാതെ ഫാമിലി ക്വാട്ടയിൽ നിന്നുള്ള അധിക വിസകളുടെ ലഭ്യത കുറഞ്ഞതും പ്രതിസന്ധി രൂക്ഷമാക്കി.
ശാസ്ത്രജ്ഞർ, കമ്പനി സ്ഥാപകർ, കലാകാരന്മാർ (ഇബി-1എ), സർവ്വകലാശാലാ പ്രൊഫസർമാർ, ഗവേഷകർ (ഇബി-1ബി), മൾട്ടിനാഷണൽ കമ്പനികളിലെ വൈസ് പ്രസിഡൻ്റുമാർ, സീനിയർ മാനേജർമാർ (ഇബി-1സി) എന്നിവർക്കാണ് പ്രധാനമായും ഈ വിസ ലഭിക്കുന്നത്. അപേക്ഷകരുടെ പ്രവാഹം വർദ്ധിച്ചതോടെ വരും വർഷങ്ങളിലും ഈ വിഭാഗത്തിലെ വിസ ലഭ്യത കൂടുതൽ കർശനമാകാനാണ് സാധ്യത.
US Green Card will no longer be easy for Indians; Crisis in EB-1, fast-track visa category, also intensifying
