യു.എസ് ഇടക്കാല തെരഞ്ഞെടുപ്പിൽ പ്രസിഡന്റ് ഡോണാൾഡ് ട്രംപിനും റിപ്പബ്ലിക്കൻ പാർട്ടിക്കും കനത്ത തിരിച്ചടി നേരിട്ടതിൽ പരിഹാസ പ്രതികരണവുമായി ശതകോടീശ്വരൻ ഇലോൺ മസ്ക്. ‘തെരഞ്ഞെടുപ്പിൽ കൃത്രിമം കാണിക്കുന്ന എന്റെ ബഹിരാകാശ ലേസറുകൾ ഇത്തവണ പ്രവർത്തിച്ചില്ലെന്ന് തോന്നുന്നു’ എന്നാണ് മസ്ക് എക്സിൽ കുറിച്ചത്. തെരഞ്ഞെടുപ്പ് പ്രചാരണത്തിലുടനീളം മസ്കിനെതിരെ ഡെമോക്രാറ്റുകൾ നിരന്തരം ആരോപണങ്ങൾ ഉന്നയിച്ചിരുന്ന പശ്ചാത്തലത്തിലാണ് ഈ പരിഹാസം. ട്രംപിന്റെ വലിയ പ്രചാരകനായിരുന്നു മസ്ക്.
അതേസമയം രാജ്യത്തുടനീളം അലയടിച്ച ഡെമോക്രാറ്റിക് തരംഗത്തിൽ കോൺഗ്രസിന്റെ ഇരുസഭകളുടെയും നിയന്ത്രണം ഡെമോക്രാറ്റുകൾ പിടിച്ചെടുത്തു. ടെക്സസ്, കാൻസാസ്, സൗത്ത് കരോലിന, അയോവ, നോർത്ത് കരോലിന, ഒഹായോ തുടങ്ങിയ പരമ്പരാഗത റിപ്പബ്ലിക്കൻ ശക്തികേന്ദ്രങ്ങളിൽ പോലും ഡെമോക്രാറ്റുകൾ അട്ടിമറി വിജയം നേടി. ഹൗസ് ന്യൂനപക്ഷ നേതാവ് ഹക്കീം ജെഫ്രിസ് അടുത്ത ജനുവരിയിൽ ആദ്യ കറുത്തവർഗക്കാരനായ സ്പീക്കറാകും. സെനറ്റ് ന്യൂനപക്ഷ നേതാവ് ചക്ക് ഷുമറും ഭൂരിപക്ഷ നേതൃത്വത്തിലേക്ക് തിരിച്ചെത്തും.
സാമ്പത്തിക പ്രതിസന്ധി, ഇറാൻ യുദ്ധം, ഭരണപരമായ വീഴ്ചകൾ എന്നിവയിലുള്ള അതൃപ്തിയാണ് ട്രംപിന്റെ നേതൃത്വത്തിനും ഭരണനയങ്ങൾക്കുമെതിരായ ജനവിധിയായി മാറിയത്. തെരഞ്ഞെടുപ്പ് ഫലം റിപ്പബ്ലിക്കൻ പാർട്ടിക്കുള്ളിലും വലിയ പ്രതിസന്ധിക്ക് വഴിവെച്ചിട്ടുണ്ട്. ടെക്സസ് സെനറ്റർ ടെഡ് ക്രൂസ് ഈ ഫലത്തെ ‘വാട്ടർഗേറ്റ് മാതൃകയിലുള്ള തിരിച്ചടി’ എന്നാണ് വിശേഷിപ്പിച്ചത്. ജെ.ഡി. വാൻസ് ഉൾപ്പെടെയുള്ള പ്രമുഖ നേതാക്കൾ ട്രംപിന്റെ നിലപാടുകളിൽനിന്ന് അകലം പാലിച്ചുതുടങ്ങി. കോൺഗ്രസിന്റെ നിയന്ത്രണം നഷ്ടമായതോടെ ഇനി വരുന്ന കാലയളവിൽ പ്രധാനപ്പെട്ട നിയമനിർമാണങ്ങൾ നടപ്പാക്കുക ട്രംപിന് കടുത്ത വെല്ലുവിളിയാകും.
US Midterm Elections: setback for Trump, Elon Musk reacts with sarcasm
