വയനാട് മേപ്പാടി തുരങ്ക പാത നിര്മ്മാണ സ്ഥലത്തുണ്ടായ മണ്ണിടിച്ചിലില് മൂന്ന് പേരുടെ മരണം സ്ഥിരീകരിച്ചു. ഏഴ് പേരെ കാണാതായി. ഒൻപത് പേരെ ആശുപത്രിയിൽ പ്രവേശിപ്പിച്ചു. ഹിര കുമാർ (32), ദിലീപ് (19), സൂരജ് യാദവ് (25), സഞ്ജയ് താക്കൂർ (35), രജനീഷ് (27), തന്മയ് ഘോഷ് (28), കൂപമാൽ (ജയ) (37), കുഞ്ചു (39), സന്തോഷ് കുമാർ എന്നിവരെയാണ് ആശുപത്രിയിൽ പ്രവേശിപ്പിച്ചിരിക്കുന്നത്.
ദുരന്ത പ്രദേശത്ത് നിന്ന് മണ്ണ് നീക്കം ചെയ്യണമെന്ന് നിര്ദേശിച്ചിരുന്നുവെന്നും എന്നാല് കരാറുകാര് മണ്ണ് നീക്കം ചെയ്തിരുന്നില്ലെന്നും മുഖ്യമന്ത്രി വി ഡി സതീശൻ പ്രതികരിച്ചു. ഇതാണ് അപകടത്തിന് കാരണമായതെന്നും ദൗര്ഭാഗ്യകരമായ ദുരന്തമാണ് ഉണ്ടായതെന്നും മുഖ്യമന്ത്രി പറഞ്ഞു. ദുരന്തത്തിന് കാരണം അശാസ്ത്രീയമായി മണ്ണ് കൂട്ടിയിട്ടതാണെന്നും പ്രകൃതിദുരന്തമല്ല, മനുഷ്യനിര്മ്മിത ദുരന്തമാണ് സംഭവിച്ചതെന്നും മന്ത്രി ടി സിദ്ധിഖ് പറഞ്ഞിരുന്നു.
അശാസ്ത്രീയമായി മണ്ണ് കൂട്ടിയിടരുതെന്ന് നിര്മ്മാണ കമ്പനിക്ക് നിര്ദേശം നല്കിയിരുന്നു. നിര്ദേശം പാലിക്കാത്തതില് സര്ക്കാര് കര്ശന നടപടി സ്വീകരിക്കുമെന്നും മന്ത്രി കൂട്ടിച്ചേർത്തു. ഇന്ന് രാവിലെ 10.30 ഓടുകൂടിയായിരുന്നു മണ്ണിടിച്ചില് ഉണ്ടായത്. നിര്മ്മാണം നടക്കുന്നതിനിടെ മണ്ണിടിഞ്ഞ് റോഡിലേക്ക് പതിക്കുകയായിരുന്നു. മേപ്പാടിയില് നിന്ന് ചൂരല്മലയിലേക്ക് പോകുന്ന പ്രധാന പാതയിലാണ് അപകടമുണ്ടായത്. പ്രദേശത്ത് വയനാട് സംഘത്തിന് പുറമേ കോഴിക്കോട്, തൃശ്ശൂര് ജില്ലകളില് നിന്ന് കൂടിയുള്ള എന്ഡിആര്എഫ് സംഘം സ്ഥലത്തെത്തും.
Wayanad landslide: Three dead, seven missing in the disaster.
