തിരുവനന്തപുരം: കെ.പി.സി.സി പ്രസിഡന്റ് കെ. സുധാകരന് എം.പിയുടെ എക്സ് അക്കൗണ്ട് ഹാക്ക് ചെയ്തു. ഹാക്ക് ചെയ്യപ്പെട്ട പേജിന്റെ പാസ്വേഡ് ഉള്പ്പെടെ അജ്ഞാതര് മാറ്റിയതിനാല് ഈ പേജിന്റെ നിയന്ത്രണം ഏറ്റെടുക്കാന് ഇതുവരെ കഴിഞ്ഞിട്ടില്ല. @SudhakaranINC എന്ന വെരിഫൈഡ് അക്കൗണ്ടാണ് ഹാക്ക് ചെയ്യപ്പെട്ടത്. യൂസര് നെയിമിന് താഴെയായി അറബിക് ഭാഷയോട് സാമ്യമുള്ള ഒരു വാക്കും ഹാക്ക് ചെയ്യപ്പെട്ട പേജില് ഉള്പ്പെടുത്തിയിട്ടുണ്ട്.
കെ. സുധാകരന് എന്ന പേരും പ്രൊഫൈല് ചിത്രവും അജ്ഞാതര് മാറ്റിയെങ്കിലും @SudhakaranINC എന്ന അഡ്രസ്സ് മാറ്റാന് ഹാക്കര്മാര്ക്ക് സാധിച്ചിട്ടില്ലെങ്കിലും പേജില് കെ. സുധാകരന് എന്ന പേരിന്റെ സ്ഥാനത്ത് ഒന്ന് എന്നാക്കിയിട്ടുണ്ട്. പേജ് തിരികെ കിട്ടുന്നതിന് വേണ്ട നടപടികള് സ്വീകരിക്കണമെന്ന് ചൂണ്ടിക്കാട്ടി എക്സ് അധികൃതര്ക്ക് അദ്ദേഹം കത്ത് നല്കിയിട്ടുണ്ട്. മാത്രമല്ല, ഹാക്ക് ചെയ്തവര്ക്കെതിരെ നിയമനടപടി സ്വീകരിക്കണമെന്ന് ആവശ്യപ്പെട്ട് കെ സുധാകരന് എം.പി സംസ്ഥാന പൊലീസ് മേധാവിക്ക് പരാതി നല്കി.
