തിരുവനന്തപുരം: പ്രധാനമന്ത്രി നരേന്ദ്രമോദിയെ കാത്ത് തിരുവനന്തപുരം. രണ്ട് ദിവസത്തെ സന്ദര്ശനത്തിനായാണ് പ്രധാനമന്ത്രി നരേന്ദ്ര മോദി ഇന്ന് തിരുവനന്തപുരത്തെത്തുന്നത്.
രാവിലെ 10:30 ന് തിരുവന്തപുരം അന്താരാഷ്ട്ര വിമാനത്താവളത്തിലെത്തുന്ന പ്രധാനമന്ത്രി വ്യാമസേനയുടെ ടെക്നിക്കല് ഏര്യയില് എത്തിയ ശേഷം വിക്രം സാരാഭായ് സ്പേസ് സെന്ററിലേക്ക് പോകും. വി.എസ്.എസ്.സിയില് വിവിധ പദ്ധതികളുടെ ഉദ്ഘാടനം നടത്തുന്ന അദ്ദേഹം പിന്നീട് ബി ജെ പി സംസ്ഥാന അധ്യക്ഷന് കെ. സുരേന്ദ്രന് നയിക്കുന്ന കേരളാ പദയാത്രയുടെ സമാപന സമ്മേളനത്തിലും പങ്കെടുക്കും. ഇതിനിടയില് റോഡ് ഷോ നടത്താനും സാധ്യതയുണ്ട്.
ഉച്ചയ്ക്ക് 1.20ന് തിരുവനന്തപുരത്ത് നിന്ന് തമിഴ്നാട്ടിലേക്ക് യാത്രതിരിക്കും. 28ന് ഉച്ചയ്ക്ക് 1.10 ന് തിരുനെല്വേലിയില് നിന്ന് ഹെലികോപ്റ്ററില് തിരുവനന്തപുരം വ്യോമസേന ടെക്നിക്കല് ഏര്യയില് തിരിച്ചെത്തുന്ന പ്രധാനമന്ത്രി ഉച്ചയ്ക്ക് 1.15ന് മഹാരാഷ്ട്രയിലേക്ക് പോകും.
പ്രധാനമന്ത്രിയുടെ കേരള സന്ദര്ശനത്തിന്റെ ഭാഗമായി തിരുവനന്തപുരം നഗരത്തില് ഇന്നും നാളെയും കര്ശന ഗതാഗത നിയന്ത്രണമുണ്ട്. ഇന്ന് രാവിലെ മുതല് ഉച്ചവരെയും നാളെ 11 മണി മുതല് ഉച്ചവരെയുമാണ് നഗരത്തില് ഗതാഗത നിയന്ത്രണം ഏര്പ്പെടുത്തിയിരിക്കുന്നത്. 28-ാം തിയതി രാവിലെ 11 മണി മുതല് ഉച്ചയ്ക്ക് 2 മണി വരെയാണ് ഗതാഗത നിയന്ത്രണം. നിയന്ത്രണം മറികടന്ന് പാര്ക്ക് ചെയ്യുന്ന വാഹനങ്ങളെ റിക്കവറി വാഹനം ഉപയോഗിച്ച് നീക്കം ചെയ്യുന്നതുള്പ്പെടെയുള്ള നിയമനടപടികള് സ്വീകരിക്കും.
സുരക്ഷയുടെ ഭാഗമായി ഇന്നും നാളെയും രാവിലെ 6 മണിമുതല് വൈകുന്നേരം 6 മണിവരെ ഡ്രോണ് പറത്തുന്നതും കര്ശനമായി നിരോധിച്ചിട്ടുണ്ട്.
