വാഷിംഗ്ടൺ: ജൂലൈ 25 ന് യുഎസ് സ്റ്റേറ്റ് ഡിപ്പാർട്ട്മെന്റ് പുറപ്പെടുവിച്ച നിർദ്ദേശത്തെത്തുടർന്ന്, 2025 ഓഗസ്റ്റ്, സെപ്റ്റംബർ മാസങ്ങളിൽ ഷെഡ്യൂൾ ചെയ്തിരുന്ന എല്ലാ ഡ്രോപ്പ്ബോക്സ് (ഇന്റർവ്യൂ ഇളവ്) വിസ അപ്പോയിന്റ്മെന്റുകളും ഇന്ത്യയിലെ യുണൈറ്റഡ് സ്റ്റേറ്റ്സ് കോൺസുലാർ ഓഫീസുകൾ റദ്ദാക്കി. 2025 സെപ്റ്റംബർ 2 മുതൽ പ്രാബല്യത്തിൽ വരുന്ന ഈ മാറ്റത്തിൽ മിക്ക നോൺ-ഇമിഗ്രന്റ് വിസ വിഭാഗങ്ങളുടെയും ഡ്രോപ്പ്ബോക്സ് പുതുക്കലുകൾ അവസാനിപ്പിക്കുകയാണ്.
മുമ്പ് അനുവദിച്ചിരുന്ന ഡ്രോപ്പ്ബോക്സ് സൗകര്യം വഴി വിസ പുതുക്കാൻ പദ്ധതിയിട്ടിരുന്ന ആയിരക്കണക്കിന് ഇന്ത്യൻ പ്രൊഫഷണലുകൾ, വിദ്യാർത്ഥികൾ, ഗവേഷകർ, എക്സ്ചേഞ്ച് സന്ദർശകർ എന്നിവരെ ഈ റദ്ദാക്കൽ ബാധിക്കും. 2025 സെപ്റ്റംബർ 2 മുതൽ, H1B പുതുക്കലുകൾ ഉൾപ്പെടെ മിക്ക വിസകൾക്കും ‘ഡ്രോപ്പ്ബോക്സ്’ ഇല്ലാതാകും. H1B, L1, F1, O1 വിസകൾ പുതുക്കുന്ന എല്ലാവരെയും മിക്കവാറും ഈ മാറ്റം ബാധിക്കാൻ സാധ്യതയുണ്ട്.14 വയസ്സിന് താഴെയുള്ള കുട്ടികൾക്കും 79 വയസ്സിനു മുകളിലുള്ള മുതിർന്നവരെയും ഈ മാറ്റം ബാധിക്കും. ഔദ്യോഗിക വിസകൾക്ക് അല്ലെങ്കിൽ നയതന്ത്ര വിസകൾക്ക് (A, G, NATO, TECRO മുതലായവ ) ഡ്രോപ്പ്ബോക്സ് ഇളവുകൾക്ക് അർഹതയുണ്ടായിരിക്കാം.
ഇന്ത്യയിലെ ഡ്രോപ്പ്ബോക്സ് അഭിമുഖങ്ങൾ താൽക്കാലികമായി നിർത്തിവച്ചതിന് പിന്നിലെ പ്രധാന കാരണം, പ്രീ-പാൻഡെമിക് വിസ സ്ക്രീനിംഗ് നടപടിക്രമങ്ങളിലേക്ക് മടങ്ങാനുള്ള യുണൈറ്റഡ് സ്റ്റേറ്റ്സിന്റെ തീരുമാനമാണ്. ഓഗസ്റ്റ്-സെപ്റ്റംബർ ഡ്രോപ്പ്ബോക്സ് സ്ലോട്ടുകൾ റദ്ദായ അപേക്ഷകർ ഇമെയിൽ വഴി റദ്ദാക്കൽ അറിയിപ്പ് പരിശോധിക്കുക, അപ്പോയിന്റ്മെന്റ് പോർട്ടൽ വഴി സ്റ്റാറ്റസ് സ്ഥിരീകരിക്കുക, ആവശ്യമെങ്കിൽ അപേക്ഷ പുനരാരംഭിക്കുകയും പുതിയ മാനദണ്ഡങ്ങൾ പ്രകാരം വീണ്ടും ബുക്ക് ചെയ്യേണ്ടതുമാണ്.
