കെയ്റോ: ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാര കരാർ അന്തിമഘട്ടത്തിലാണെന്ന് കേന്ദ്ര വാണിജ്യ-വ്യവസായ മന്ത്രി പീയുഷ് ഗോയൽ വ്യക്തമാക്കി. കരാർ യാഥാർത്ഥ്യമാകുന്നതോടെ അമേരിക്കൻ വിപണിയിൽ ഇന്ത്യൻ ഉത്പന്നങ്ങൾക്ക് പ്രത്യേക മുൻഗണന ലഭിക്കുമെന്നതാണ് പ്രധാന സവിശേഷത. ഈജിപ്ത് സന്ദർശനത്തിനിടെ കെയ്റോയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. ഇരുരാജ്യങ്ങൾക്കും ഒരുപോലെ ഗുണകരമായ മികച്ചൊരു കരാറായിരിക്കും ഇതെന്നും, വ്യാപാര ചർച്ചകൾ വിജയകരമായി മുന്നോട്ട് പോവുകയാണെന്നും മന്ത്രി കൂട്ടിച്ചേർത്തു.
കരാർ പ്രാബല്യത്തിൽ വരുന്നതോടെ മത്സരിക്കുന്ന മറ്റ് രാജ്യങ്ങളേക്കാൾ കുറഞ്ഞ ഇറക്കുമതി തീരുവയാകും ഇന്ത്യൻ ഉത്പന്നങ്ങൾക്ക് അമേരിക്ക ചുമത്തുക. ഇത് അമേരിക്കൻ വിപണിയിൽ ഇന്ത്യൻ കയറ്റുമതി മേഖലയ്ക്ക് വലിയ ഉണർവ് നൽകും. എന്നാൽ, തീരുവ എത്ര ശതമാനമായിരിക്കും എന്ന കാര്യത്തിൽ അന്തിമ തീരുമാനമായിട്ടില്ലെന്നും അമേരിക്കയുടെ പുതിയ തീരുവ നയങ്ങൾക്കനുസരിച്ച് ഇതിൽ വ്യക്തത വരുമെന്നും പീയുഷ് ഗോയൽ അറിയിച്ചു.
വ്യാപാര കരാറിന്റെ ആദ്യഘട്ടം ഈ വർഷം അവസാനത്തോടെ തന്നെ നിലവിൽ വരുമെന്നാണ് പ്രതീക്ഷിക്കുന്നത്. ഡിസംബറിൽ മയാമിയിൽ നടക്കുന്ന ജി20 ഉച്ചകോടിയോടനുബന്ധിച്ച് പ്രധാനമന്ത്രി നരേന്ദ്ര മോദി അമേരിക്ക സന്ദർശിക്കുന്നുണ്ട്. ഈ സന്ദർശന വേളയിൽ യുഎസ് പ്രസിഡന്റ് ഡോണൾഡ് ട്രംപുമായി നടത്തുന്ന കൂടിക്കാഴ്ചയിൽ കരാറിന്റെ ആദ്യഘട്ടം സംബന്ധിച്ച് നിർണ്ണായക ധാരണയുണ്ടായേക്കുമെന്നാണ് സൂചന.
India-US Trade Deal in Final Stages; Indian Products to Get Preferential Access in US Market, Says Piyush Goyal
