കോൺഗ്രസിന്റെ രാജ്യസഭാ സ്ഥാനാർത്ഥി പട്ടികയ്ക്ക് എ.ഐ.സി.സി അംഗീകാരം നൽകി. കോൺഗ്രസ് ഡാറ്റാ അനലിറ്റിക്സ് വിഭാഗം മേധാവി പ്രവീൺ ചക്രവർത്തി തമിഴ്നാട്ടിൽ നിന്ന് രാജ്യസഭയിലേക്ക് മത്സരിക്കും. തമിഴ്നാട്ടിൽ നടൻ വിജയ്യുടെ പാർട്ടിയായ ടിവികെയുടെ പിന്തുണ ഉറപ്പാക്കാൻ കഴിഞ്ഞതാണ് പ്രവീണിന് അനുകൂലമായത്. മുൻപ് ഡി.എം.കെ ശക്തമായി എതിർത്ത പ്രവീൺ ചക്രവർത്തിക്ക് 2024-ൽ മയിലാടുതുറൈ ലോക്സഭാ സീറ്റും ഈ വർഷം ഏപ്രിലിൽ രാജ്യസഭാ സീറ്റും ഡി.എം.കെ അധ്യക്ഷൻ എം.കെ. സ്റ്റാലിന്റെ ഇടപെടൽ മൂലം നഷ്ടമായിരുന്നു.
മുതിർന്ന കോൺഗ്രസ് വക്താവ് പവൻ ഖേരയ്ക്ക് കർണാടകയിൽ നിന്നാണ് സീറ്റ് നൽകിയിരിക്കുന്നത്. എ.ഐ.സി.സി അധ്യക്ഷൻ മല്ലികാർജുന ഖാർഗെയ്ക്കും കർണാടകയിൽ നിന്ന് വീണ്ടും അവസരം ലഭിച്ചപ്പോൾ മൻസൂർ അലി ഖാനും ഇതേ സംസ്ഥാനത്തുനിന്നുള്ള പട്ടികയിൽ ഇടംപിടിച്ചു. കൂടാതെ, ഖാർഗെയുടെ ഓഫീസിലെ സെക്രട്ടറിയായ പ്രണവ് ഝായും ഇത്തവണ രാജ്യസഭയിലേക്ക് മത്സരിക്കും.
അതേസമയം, മുതിർന്ന നേതാവ് ദിഗ്വിജയ് സിംഗിന് ഇക്കുറി പാർട്ടി രാജ്യസഭാ സീറ്റ് നൽകിയിട്ടില്ല. നിലവിൽ വിദ്യാഭ്യാസ കാര്യങ്ങൾ പരിശോധിക്കുന്ന പാർലമെന്ററി സമിതി അംഗമായ അദ്ദേഹത്തിന് പകരം മീനാക്ഷി നടരാജനെയാണ് ഹൈക്കമാൻഡ് ഇത്തവണ രാജ്യസഭയിലേക്ക് പരിഗണിച്ചിരിക്കുന്നത്. സീറ്റ് വിഭജനത്തെച്ചൊല്ലി സഖ്യകക്ഷികൾക്കിടയിലും പാർട്ടിക്കുള്ളിലും സജീവ ചർച്ചകൾ നിലനിൽക്കുന്ന പശ്ചാത്തലത്തിലാണ് കോൺഗ്രസിന്റെ പുതിയ സ്ഥാനാർത്ഥി പട്ടിക പുറത്തുവന്നിരിക്കുന്നത്.
AICC Approves Rajya Sabha Candidates: Praveen Chakravarty Named from Tamil Nadu and Pawan Khera from Karnataka
