ന്യൂഡൽഹി: പ്രധാനമന്ത്രി നരേന്ദ്ര മോദിക്ക് ജന്മദിനാശംസകൾ നേർന്നുകൊണ്ട് കോൺഗ്രസ് എം.പി. ശശി തരൂർ പങ്കുവെച്ച കുറിപ്പിലെ വ്യാകരണ പിശക് സോഷ്യൽ മീഡിയയിൽ ചർച്ചയാകുന്നു. മികച്ച ഇംഗ്ലീഷ് ശൈലികൊണ്ടും കഠിനമായ പദപ്രയോഗങ്ങൾ കൊണ്ടും ശ്രദ്ധേയനായ ശശി തരൂരിന് സംഭവിച്ച ചെറിയൊരു അക്ഷരത്തെറ്റാണ് നെറ്റിസൺസ് തെരഞ്ഞുപിടിച്ചത്.
സെപ്റ്റംബർ 17-ന് പ്രധാനമന്ത്രിയുടെ 76-ാം ജന്മദിനത്തിലാണ് തരൂർ എക്സ് പ്ലാറ്റ്ഫോമിൽ ആശംസകൾ നേർന്നത്. എന്നാൽ “on his 76th birthday” (അദ്ദേഹത്തിന്റെ 76-ാം ജന്മദിനത്തിൽ) എന്ന് എഴുതുന്നതിന് പകരം “in his 76th birthday” എന്നാണ് തരൂർ കുറിച്ചത്. ഊഷ്മളമായ ആശംസകൾക്കൊപ്പം പ്രധാനമന്ത്രിക്ക് ആരോഗ്യവും പൊതുസേവനത്തിൽ തുടരാൻ സാധിക്കട്ടെ എന്നുമുള്ള സന്ദേശവും കുറിപ്പിലുണ്ടായിരുന്നു.
തരൂരിന്റെ പോസ്റ്റ് പ്രത്യക്ഷപ്പെട്ടതിന് പിന്നാലെ നിരവധി ഉപയോക്താക്കൾ ഈ ചെറിയ വ്യാകരണ പിശക് ചൂണ്ടിക്കാണിച്ച് രംഗത്തെത്തി. ഇംഗ്ലീഷ് ഭാഷയിൽ ഇത്രയും അഗാധ പാണ്ഡിത്യമുള്ള തരൂരിന് ഇങ്ങനെയൊരു തെറ്റ് പറ്റിയത് വിശ്വസിക്കാനാകുന്നില്ലെന്ന് ചിലർ തമാശ രൂപേണ കുറിച്ചപ്പോൾ, മൊബൈൽ കീബോർഡിൽ ‘I’, ‘O’ എന്നീ അക്ഷരങ്ങൾ അടുത്തടുത്തായതുകൊണ്ട് സംഭവിച്ച അക്ഷരത്തെറ്റ് മാത്രമാണിതെന്ന് മറ്റ് ചിലർ വാദിച്ചു.
എന്നാൽ, ഈ വിമർശനങ്ങൾ സോഷ്യൽ മീഡിയയിൽ നിറഞ്ഞതോടെ തെറ്റ് പരസ്യമായി സമ്മതിച്ച് ശശി തരൂർ തന്നെ രംഗത്തെത്തി. ഒരു ഉപയോക്താവിന്റെ കമന്റിന് മറുപടിയായി, “അതെ, ‘on’ എന്നത് ‘in’ ആയി മാറിപ്പോയതാണ്. ഇത്തരം അബദ്ധങ്ങൾ എപ്പോഴും സംഭവിക്കാറുള്ളതാണ്, കഷ്ടം തന്നെ” എന്ന് അദ്ദേഹം കുറിച്ചു. തരൂർ തന്നെ മറുപടിയുമായി എത്തിയതോടെ സോഷ്യൽ മീഡിയയിലെ ഈ ചർച്ച സൌഹാർദ്ദപരമായ ഒരു തമാശ നിമിഷമായി അവസാനിച്ചു.
‘On’ became ‘In’; trolls pounced on the English error, while Shashi Tharoor’s birthday wish to the Prime Minister went viral.
