ന്യൂഡൽഹി: വിളകൾ നശിക്കുന്നുവെന്ന കാരണം ചൂണ്ടിക്കാട്ടി ആനകളുടെ സഞ്ചാരപാതകളിൽ തടസ്സങ്ങൾ സൃഷ്ടിക്കാൻ സംസ്ഥാനങ്ങൾക്ക് കഴിയില്ലെന്ന് സുപ്രീംകോടതി. വന്യജീവികളുടെ സ്വാഭാവിക സഞ്ചാരം സംരക്ഷിക്കേണ്ടത് അനിവാര്യമാണെന്ന് കോടതി വ്യക്തമാക്കി. രാജ്യത്തെ ആനത്താരകളെക്കുറിച്ച് പുതിയ സർവേ നടത്താനും കേന്ദ്രസർക്കാരിന് കോടതി നിർദേശം നൽകി.
കേസ് പരിഗണിച്ച ചീഫ് ജസ്റ്റിസ് സൂര്യകാന്ത്, ആനക്കൂട്ടങ്ങൾ ദീർഘദൂരങ്ങൾ സഞ്ചരിക്കുന്ന സ്വഭാവമുള്ളവയാണെന്നും അവയ്ക്ക് ആവാസവ്യവസ്ഥകൾക്കിടയിൽ തടസ്സമില്ലാത്ത വഴികൾ ആവശ്യമാണ് എന്നും നിരീക്ഷിച്ചു. വന്യജീവികളുടെ സഞ്ചാരപാതയിൽ തടസ്സങ്ങൾ ഉണ്ടാകാൻ പാടില്ലെന്ന കാര്യത്തിൽ ഞങ്ങൾ വ്യക്തമാണ്. ആനക്കൂട്ടങ്ങൾ ദീർഘദൂരങ്ങൾ സഞ്ചരിക്കുന്ന പതിവുള്ളവയാണ്. വിളകൾ നശിക്കുന്നുവെന്ന കാരണം പറഞ്ഞ് അവരുടെ വഴിയിൽ തടസ്സങ്ങൾ സൃഷ്ടിക്കണമെന്ന് ഒരു സംസ്ഥാനത്തിനും പറയാനാവില്ല എന്നും ചീഫ് ജസ്റ്റിസ് പറഞ്ഞു.
ആനകളുടെ സ്വതന്ത്ര സഞ്ചാരം ഉറപ്പാക്കുന്നതിനായി പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം നിർബന്ധിത മാർഗനിർദേശങ്ങൾ പുറപ്പെടുവിച്ചിട്ടുണ്ടെന്ന് കോടതിയെ അറിയിച്ചിരുന്നു. എന്നാൽ പ്രാദേശിക സാഹചര്യങ്ങൾ കാരണം നിരവധി ആനത്താരകൾ തടസ്സപ്പെടുകയോ അടയുകയോ ചെയ്തിട്ടുണ്ടെന്നും കോടതിയുടെ ശ്രദ്ധയിൽപ്പെടുത്തി.
ഇത് ഗൗരവമായി പരിഗണിച്ച സുപ്രീംകോടതി, വിവിധ സംസ്ഥാനങ്ങളിലെ ആനത്താരകളെക്കുറിച്ച് പുതിയ സർവേ നടത്തി വിശദമായ റിപ്പോർട്ട് സമർപ്പിക്കാൻ കേന്ദ്ര പരിസ്ഥിതി മന്ത്രാലയത്തോട് നിർദേശിച്ചു. രാജ്യത്തെ വന്യജീവി സംരക്ഷണ ശ്രമങ്ങൾക്ക് കൂടുതൽ ശക്തി പകരുന്നതാണ് സുപ്രീംകോടതിയുടെ ഈ നിർണായക നിരീക്ഷണവും നിർദേശവും.
Crop Damage No Ground To Block Elephant Corridors, Says Supreme Court
