ന്യൂഡല്ഹി: മൃഗസ്നേഹികളുടെ ആവശ്യങ്ങൾ തള്ളി സുപ്രീം കോടതി. തെരുവുനായ്ക്കളെ ഷെല്ട്ടറുകളിലേക്ക് തന്നെ മാറ്റണമെന്നും തെരുവുകളിലേക്ക് തുറന്നുവിടരുതെന്നും സുപ്രീം കോടതി നിർദ്ദേശിച്ചു. രാജ്യത്തെ തെരുവുനായകളെ പൂര്ണമായി പിടികൂടി അഭയകേന്ദ്രങ്ങളിലേക്ക് മാറ്റണം. പൊതുനിരത്തിലേക്ക് തിരിച്ചുവരാനാകാത്ത രീതിയില് നടപടി എടുക്കണം. നായ കടിക്കാതെ ജീവിക്കുക എന്നതും മൗലികാവകാശത്തിന്റെ ഭാഗമാണെന്നും സുപ്രീം കോടതി വ്യക്തമാക്കി. തെരുവുനായകളെ പിടികൂടിയ ഇടത്ത് തന്നെ തിരിച്ചു വിടരുതെന്ന പരിഷ്കരിച്ച ഉത്തരവ് സുപ്രീം കോടതി തള്ളുകയും ചെയ്തു.
അതേസമയം, മൃഗസ്നേഹികളുടെ എല്ലാ ആവശ്യങ്ങളും സുപ്രീം കോടതി തള്ളി. നായ്ക്കളെ തെരുവില് തുറന്നുവിടണമെന്നും ഇടക്കാല ഉത്തരവ് പരിഷ്കരിക്കണമെന്നും മൃഗക്ഷേമ ബോര്ഡിന്റെ മാനദണ്ഡങ്ങള് റദ്ദാക്കണമെന്ന മൃഗസ്നേഹികളുടെ ആവശ്യങ്ങൾ കോടതി തള്ളി. തെരുവുനായ്ക്കളെ വന്ധ്യംകരിക്കാനുള്ള മാനദണ്ഡങ്ങള് റദ്ദാക്കില്ലെന്നും കോടതി വ്യക്തമാക്കി.നായകളെ ഷെല്ട്ടറുകളിലേക്ക് തന്നെ മാറ്റണമെന്ന ഇടക്കാല ഉത്തരവ് തുടരും. തെരുവുനായകളെ വന്ധ്യംകരിക്കാനുള്ള മാനദണ്ഡങ്ങള് റദ്ദാക്കില്ലെന്നും കോടതി വ്യക്തമാക്കി.
സുപ്രീം കോടതി കേന്ദ്ര-സംസ്ഥാന സര്ക്കാരുകളെയും രൂക്ഷമായി വിമര്ശിച്ചു. എബിസി മാനദണ്ഡം നടപ്പാക്കുന്നതില് സര്ക്കാരുകള്ക്ക് വീഴ്ച പറ്റി. തെരുവുനായകളുടെ കടിയേല്ക്കാതെ കുട്ടികളെയും വയോധികരെയും സംരക്ഷിക്കേണ്ടത് സംസ്ഥാന സര്ക്കാരുകളുടെ ഉത്തരവാദിത്തമാണ്. തെരുവുനായ്ക്കള് കൂടുന്നതിന് അനുസരിച്ച് അടിസ്ഥാന സൗകര്യങ്ങള് വര്ദ്ധിക്കുന്നില്ല. എബിസി ചട്ടങ്ങള് നടപ്പാക്കുന്നതിന് അടിസ്ഥാന സൗകര്യങ്ങള് വര്ദ്ധിപ്പിക്കണം. നടപ്പാക്കാത്ത ഉദ്യോഗസ്ഥര്ക്കെതിരെ കര്ശന നടപടിയെടുക്കണമെന്നും സുപ്രീം കോടതി പറഞ്ഞു.
രാജ്യത്ത് വിദേശ പൗരന്മാര് പോലും തെരുവുനായ ആക്രമണത്തിന് ഇരകളായെന്നും രാജ്യത്തിന്റെ വിവിധ ഭാഗങ്ങളിലെ തെരുവുനായ ആക്രമണങ്ങളില് ആശങ്കയുണ്ടെന്നും സുപ്രീം കോടതി വ്യക്തമാക്കി. തെരുവുനായ പ്രശ്നത്തില് സ്വമേധയാ സ്വീകരിച്ച ഹര്ജിയിലാണ് സുപ്രീം കോടതിയുടെ ഉത്തരവ്. ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത, ജസ്റ്റിസ് എന് വി അഞ്ചാരിയ എന്നിവരടങ്ങുന്ന ബെഞ്ചിന്റേതാണ് നിര്ദേശം.
Dangerous stray dogs can be killed; living without being bitten by a dog is also a fundamental right, says Supreme Court
