ഡെമോക്രാറ്റിക് റിപ്പബ്ലിക് ഓഫ് കോംഗോയിലെ (ഡിആർ കോംഗോ) ഇതുരി പ്രവിശ്യയിൽ പടർന്നുപിടിച്ച എബോള വൈറസ് വ്യാപനം നിയന്ത്രിക്കുന്നത് “യുദ്ധം” പോലെ ആയിരിക്കുകയാണെന്നും, അതിനെ നേരിടാൻ ആവശ്യമായ വിഭവങ്ങൾ ഇല്ലെന്നും സൈനിക ഗവർണർ ജോണി ലുബോയ എൻകാഷാമ പറഞ്ഞു. ബാധിത പ്രദേശങ്ങളിലെ ജനങ്ങൾക്ക് മതിയായ ഭക്ഷണം ലഭിക്കുന്നില്ലെന്നും, മറ്റ് രോഗങ്ങളും അമിത ജനത്തിരക്കും സ്ഥിതി കൂടുതൽ രൂക്ഷമാക്കുകയാണെന്നും അദ്ദേഹം ഫ്രഞ്ച് മാധ്യമമായ RFI-യോട് പറഞ്ഞു.
ഇതുരി “ദുരന്തത്തിലേക്ക് വീഴാതിരിക്കാൻ” ആരോഗ്യപ്രവർത്തകരുടെ ശേഷി വർധിപ്പിക്കാനും അടിയന്തര സഹായം ലഭ്യമാക്കാനും അദ്ദേഹം അന്താരാഷ്ട്ര സമൂഹത്തോട് അഭ്യർഥിച്ചു. മെയ് 15-ന് പകർച്ചവ്യാധി പ്രഖ്യാപിച്ചതിന് ശേഷം 900-ലധികം സംശയാസ്പദ കേസുകളും 223 മരണങ്ങളും റിപ്പോർട്ട് ചെയ്തിട്ടുണ്ട്. ലോകാരോഗ്യ സംഘടന (WHO) രോഗവ്യാപനം പ്രതീക്ഷിച്ചതിലും വേഗത്തിലാണെന്ന് മുന്നറിയിപ്പ് നൽകി അന്താരാഷ്ട്ര പൊതുജനാരോഗ്യ അടിയന്തരാവസ്ഥ പ്രഖ്യാപിച്ചിട്ടുണ്ട്.
രോഗവ്യാപനം തടയാനുള്ള ശ്രമങ്ങളെക്കാൾ വേഗത്തിലാണ് വൈറസ് പടരുന്നത്. പ്രതികരണസംഘങ്ങൾ നിലവിൽ പിന്നാലെ ഓടുന്ന അവസ്ഥയിലാണ് എന്ന് WHO ഡയറക്ടർ ജനറൽ ടെഡ്രോസ് അദാനോം ഗെബ്രെയേസസ് പറഞ്ഞു. ഡിആർ കോംഗോയിലെ നോർത്ത് കിവു, സൗത്ത് കിവു പ്രവിശ്യകളിലും അയൽരാജ്യമായ ഉഗാണ്ടയിലും രോഗം സ്ഥിരീകരിച്ചിട്ടുണ്ട്. ഉഗാണ്ടയിൽ ഏഴ് സ്ഥിരീകരിച്ച കേസുകളുണ്ട്. ഇതിനിടെ, സുരക്ഷിത ചികിത്സാ കേന്ദ്രങ്ങളും കൂടുതൽ പരിശീലനം ലഭിച്ച ആരോഗ്യപ്രവർത്തകരും അടിയന്തിരമായി ആവശ്യമാണെന്ന് ഗവർണർ വ്യക്തമാക്കി.
എബോള ബാധിച്ച് മരിച്ചവരുടെ മൃതദേഹങ്ങൾ ഏറ്റെടുക്കാൻ ശ്രമിച്ച ബന്ധുക്കൾ രണ്ട് ചികിത്സാ കേന്ദ്രങ്ങൾ ആക്രമിച്ചതായും റിപ്പോർട്ടുണ്ട്. 2021 മുതൽ സൈനികഭരണത്തിലുള്ള ഇതുരിയിൽ നിരവധി സായുധസംഘങ്ങൾ പ്രവർത്തിക്കുന്ന സാഹചര്യത്തിൽ, നിലവിലുള്ള വിഭവങ്ങൾ സുരക്ഷാ നടപടികൾക്കായി വിനിയോഗിച്ചിരുന്നുവെന്നും, ഇപ്പോൾ “രണ്ടാമത്തെ യുദ്ധം” പോലെ എബോള പ്രതിസന്ധി ഉയർന്നുവന്നിരിക്കുകയാണെന്നും അദ്ദേഹം പറഞ്ഞു.
അതേസമയം, ആഫ്രിക്ക CDCയുടെ നേതൃത്വത്തിൽ ഡിആർ കോംഗോ, ഉഗാണ്ട, ദക്ഷിണ സുഡാൻ രാജ്യങ്ങൾ ചേർന്ന് അതിർത്തി സഹകരണ നടപടികൾ ശക്തമാക്കാൻ തീരുമാനിച്ചു. രോഗവ്യാപനം തടയാൻ 319 മില്യൺ ഡോളറിന്റെ ബജറ്റിനും അംഗീകാരം നൽകി. 1976-ൽ എബോള കണ്ടെത്തിയതിന് ശേഷം ഡിആർ കോംഗോയിൽ ഉണ്ടായ 17-ാമത്തെ പകർച്ചവ്യാധിയാണിത്. അപൂർവമായ ബുണ്ടിബുഗ്യോ ഇനത്തിലെ എബോളയുടെ ലോകത്തെ മൂന്നാമത്തെ വലിയ പകർച്ചവ്യാധിയുമാണിത്. നിലവിൽ ഈ വൈറസിനെതിരായ വാക്സിനുകളോ മരുന്നുകളോ ഇല്ലെങ്കിലും വികസനപ്രവർത്തനങ്ങൾ പുരോഗമിക്കുകയാണെന്ന് WHO അറിയിച്ചു.
