കോഴിക്കോട്: സിഎംആർഎൽ–എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട് എൻഫോഴ്സ്മെൻ്റ് ഡയറക്ടറേറ്റിൻ്റെ (ഇ.ഡി) ആരോപണങ്ങൾ പൂർണ്ണമായും തള്ളി പ്രതിപക്ഷ നേതാവ് പിണറായി വിജയൻ. തനിക്കും മകൾ ടി. വീണയ്ക്കും ഭർത്താവ പി.എ. മുഹമ്മദ് റിയാസിനുമെതിരെ അന്വേഷണം ആവശ്യപ്പെട്ട് ഇ.ഡി പൊലീസ് മേധാവിക്ക് നൽകിയ 25 പേജുള്ള കത്ത് മാധ്യമങ്ങൾ വഴി പുറത്തുവിട്ടത് രാഷ്ട്രീയ ലക്ഷ്യങ്ങളോടെയാണെന്ന് അദ്ദേഹം വാർത്താ സമ്മേളനത്തിൽ ആരോപിച്ചു. കത്ത് തനിക്ക് ഇതുവരെ ഔദ്യോഗികമായി ലഭിച്ചിട്ടില്ലെന്നും ഇ.ഡി തന്നെയാണ് വിവരങ്ങൾ പുറത്തുനൽകുന്നതെന്നും അദ്ദേഹം പറഞ്ഞു.
കേസിലെ ഇ.ഡിയുടെ നിലപാടുകളിലെ വൈരുധ്യവും അദ്ദേഹം ചൂണ്ടിക്കാട്ടി. മുൻപ് സേവനമൊന്നും നൽകാതെയാണ് എക്സാലോജിക്കിന് പണം നൽകിയതെന്നും സിഎംആർഎലിന് സാമ്പത്തിക നഷ്ടം ഉണ്ടായെന്നുമായിരുന്നു അന്വേഷണ ഏജൻസികൾ ആരോപിച്ചിരുന്നത്. എന്നാൽ ഇപ്പോൾ ആ നിലപാട് മാറ്റി, എക്സാലോജിക്കിന് ലഭിച്ച പണം വഴിവിട്ട ആനുകൂല്യങ്ങൾ നൽകിയതിന്റെ കൈക്കൂലിയാണെന്നാണ് ഇ.ഡി ഉന്നയിക്കുന്നത്. ഈ രണ്ടു വ്യത്യസ്ത വാദങ്ങളിൽ ഏതിലാണ് ഇ.ഡി ഉറച്ചുനിൽക്കുന്നതെന്ന് വ്യക്തമാക്കണമെന്ന് അദ്ദേഹം ആവശ്യപ്പെട്ടു.
തന്റെ ഭരണകാലത്ത് സിഎംആർഎലിന് വഴിവിട്ട ഒരു ആനുകൂല്യവും നൽകിയിട്ടില്ലെന്നും ആരോപണങ്ങൾക്ക് തെളിവിന്റെ ഒരു കണിക പോലുമില്ലെന്നും അദ്ദേഹം വ്യക്തമാക്കി. വ്യക്തിപരമായല്ല, മറിച്ച് രാഷ്ട്രീയ പ്രസ്ഥാനത്തെ തകർക്കുകയെന്ന ലക്ഷ്യത്തോടെയാണ് ഇത്തരം കടന്നാക്രമണങ്ങൾ നടക്കുന്നത്. മുൻപും ഇത്തരം ശ്രമങ്ങൾ ഉണ്ടായിട്ടുണ്ടെങ്കിലും ജന പിന്തുണയോടെ പ്രസ്ഥാനം അവയെല്ലാം അതിജീവിച്ചിട്ടുണ്ടെന്നും ഇനിയും മുന്നോട്ടുപോകുമെന്നും പിണറായി വിജയൻ കൂട്ടിച്ചേർത്തു.
“Hands are clean; aggressive attacks will not succeed”: Pinarayi Vijayan lashes out at the ED.
