വീട്ടിൽ റെയ്ഡ് നടത്തുമ്പോൾ അവിടെ ഞാനുണ്ടായിരുന്നു, പക്ഷേ ഇഡി എന്നോട് ഒന്നും ചോദിച്ചില്ല; വീണയുടെ ഒരു അക്കൗണ്ട് മാത്രമാണ് മരവിപ്പിച്ചതെന്നും പിണറായി

ഗവർണറുടെ നയപ്രഖ്യാപന പ്രസംഗത്തിന് ശേഷം നടത്തിയ വാർത്താസമ്മേളനത്തിൽ തന്റെ വീട്ടിൽ നടന്ന ഇഡി റെയ്ഡ് സംബന്ധിച്ച കാര്യങ്ങൾ വ്യക്തമാക്കി പ്രതിപക്ഷ നേതാവ് പിണറായി വിജയൻ. റെയ്ഡ് സമയത്ത് താൻ വീട്ടിലുണ്ടായിരുന്നെന്നും എന്നാൽ ഇഡി ഉദ്യോഗസ്ഥർ തന്നോട് ഒന്നും ചോദിച്ചില്ലെന്നും അദ്ദേഹം പറഞ്ഞു. പ്രതിപക്ഷ നേതാവിനെ ഇഡി ചോദ്യം ചെയ്തോ എന്ന മാധ്യമങ്ങളുടെ ചോദ്യത്തിന്, താൻ അവിടെ ഉണ്ടായിരുന്നു എന്ന് മാത്രമേയുള്ളൂ എന്നായിരുന്നു അദ്ദേഹത്തിന്റെ മറുപടി.

മകൾ വീണ വിജയന്റെ ബാങ്ക് അക്കൗണ്ടുകൾ ഇഡി മരവിപ്പിച്ചെന്ന വാർത്തകളോടും പിണറായി വിജയൻ പ്രതികരിച്ചു. മാധ്യമങ്ങളിൽ പ്രചരിക്കുന്നതുപോലെ വലിയ എണ്ണത്തിലുള്ള ബാങ്ക് അക്കൗണ്ടുകളൊന്നും വീണയ്ക്കില്ലെന്ന് അദ്ദേഹം വ്യക്തമാക്കി. എന്നാൽ വീണയുടെ ഒരു ബാങ്ക് അക്കൗണ്ട് ഇഡി ഫ്രീസ് ചെയ്തിട്ടുണ്ടെന്ന കാര്യം ശരിയാണെന്ന് അദ്ദേഹം സമ്മതിച്ചു. തിരുവനന്തപുരത്ത് ഇഡി ഉദ്യോഗസ്ഥരുടെ വാഹനം ആക്രമിക്കപ്പെട്ട സംഭവത്തിൽ, കാര്യങ്ങൾ സമാധാനപരമായി നീക്കാനാണ് അവിടെയുള്ളവർ ശ്രമിച്ചതെന്നും പൊതു സമീപനം എന്താണെന്ന് അതിൽ നിന്ന് വ്യക്തമാണെന്നും അദ്ദേഹം കൂട്ടിച്ചേർത്തു.

ഔദ്യോഗിക വസതിയായ കന്റോൺമെന്റ് ഹൗസിലേക്ക് മാറുന്ന കാര്യത്തിലും പ്രതിപക്ഷ നേതാവ് വ്യക്തത വരുത്തി. നിലവിൽ അവിടെ താമസിക്കുന്നയാൾ മാറിയതിന് ശേഷം മാത്രമേ തനിക്ക് അങ്ങോട്ട് മാറാൻ സാധിക്കുകയുള്ളൂവെന്ന് അദ്ദേഹം പറഞ്ഞു. നിലവിലെ താമസക്കാരൻ മാറുന്നതിനുള്ള നടപടികൾ സ്വീകരിക്കുന്നുണ്ട്. അതിനുശേഷം വസതിയിൽ ആവശ്യമായ അറ്റകുറ്റപ്പണികൾ പൂർത്തിയാക്കിയ ശേഷമായിരിക്കും അങ്ങോട്ട് മാറുന്നതിനെക്കുറിച്ച് അന്തിമ തീരുമാനമെടുക്കുകയെന്നും പിണറായി വിജയൻ വിശദീകരിച്ചു.

I was at home, ED didn’t question me; only one of Veena’s accounts frozen, says Pinarayi Vijayan