ഗായിക എസ് ജാനകിയുടെ വേർപാടിൽ മുഖ്യമന്ത്രി വി ഡി സതീശനും പ്രതിപക്ഷ നേതാവ് പിണറായി വിജയനും ഉൾപ്പെടെയുള്ളവർ അഗാധമായ അനുശോചനം രേഖപ്പെടുത്തി. പാട്ടിന്റെ അമ്മയ്ക്ക് പ്രണാമമർപ്പിച്ച മുഖ്യമന്ത്രി, മലയാളി മനസ്സിനെ ഇത്രത്തോളം കീഴടക്കിയ മറ്റൊരു മധുരശബ്ദമില്ലെന്ന് സ്മരിച്ചു. മാതൃഭാഷ മലയാളമല്ലായിരുന്നിട്ടും ഉച്ചാരണശുദ്ധിയോടെയും ഭാവസാന്ദ്രതയോടെയും അവർ ആലപിച്ച ഓരോ ഗാനവും മലയാളിയുടെ ഹൃദയത്തോട് ചേന്നുനിൽക്കുന്നതാണെന്ന് അദ്ദേഹം പറഞ്ഞു. ‘തുമ്പീ വാ’, ‘മോഹം കൊണ്ട് ഞാൻ’ തുടങ്ങി തനിക്ക് ഏറ്റവും പ്രിയപ്പെട്ട നിരവധി ഗാനങ്ങൾ ഓർത്തെടുത്ത അദ്ദേഹം, സങ്കടത്തിലും സന്തോഷത്തിലും മലയാളിയുടെ വികാരങ്ങൾ നിർണ്ണയിച്ച അപൂർവ്വ സ്വരത്തിന് നന്ദിയർപ്പിച്ചു.
മറ്റൊരു നാട്ടിൽ നിന്നെത്തി മലയാളി മനസ്സ് കീഴടക്കിയ മഹാഗായിക വിടവാങ്ങുമ്പോൾ ഒരു നീണ്ട കാലഘട്ടത്തിന് കൂടിയാണ് തിരശ്ശീല വീഴുന്നതെന്ന് പ്രതിപക്ഷ നേതാവ് പിണറായി വിജയൻ അനുശോചിച്ചു. ശബ്ദവും ഭാവവും കൊണ്ട് തലമുറകളെ ഒപ്പം നടത്തിയ എക്കാലത്തെയും മികച്ച ഗായികയാണ് എസ് ജാനകിയെന്നും സിനിമകൾ മറവിയിലേക്ക് മറഞ്ഞപ്പോഴും അവരുടെ പാട്ടുകൾ വാടാതെ നിൽക്കുന്നുവെന്നും അദ്ദേഹം ചൂണ്ടിക്കാട്ടി. ഭാഷയുടെയും ദേശാതിർത്തികളുടെയും പരിധികൾ മറികടന്ന് കോടിക്കണക്കിന് മനുഷ്യരുടെ ഹൃദയങ്ങളിൽ ഇടംനേടിയ ജാനകിയമ്മയുടെ വിയോഗം ഇന്ത്യൻ സംഗീതലോകത്തിന് തീരാനഷ്ടമാണെന്ന് അദ്ദേഹം കൂട്ടിച്ചേർത്തു.
രാഷ്ട്രീയ, സാംസ്കാരിക, ചലച്ചിത്ര മേഖലയിലെ പ്രമുഖർ തങ്ങളുടെ പ്രിയ ഗായികയ്ക്ക് ആദരാഞ്ജലികൾ അർപ്പിച്ചു. അരനൂറ്റാണ്ടിലേറെക്കാലം ചലച്ചിത്ര സംഗീത ശാഖയെ തന്റെ സ്വരമാധുര്യം കൊണ്ട് സമ്പന്നമാക്കിയ കലാകാരിയുടെ വേർപാട് നികത്താനാവാത്ത ശൂന്യതയാണ് സൃഷ്ടിച്ചിരിക്കുന്നതെന്ന് സാംസ്കാരിക ലോകം ഒരേസ്വരം വ്യക്തമാക്കി. ദക്ഷിണേന്ത്യയുടെ വാനമ്പാടിയുടെ വിയോഗത്തിൽ രാജ്യമൊട്ടാകെ കടുത്ത ദുഃഖത്തിലാണ്.
S Janaki Passes Away: Chief Minister VD Satheesan and Leader of Opposition Pinarayi Vijayan Express Condolences
