ഓസ്റ്റിൻ: അമേരിക്കയിലെ ടെക്സാസ് സംസ്ഥാനത്തുള്ള ഓസ്റ്റിൻ നഗരത്തിൽ ഫെഡറൽ ഇമിഗ്രേഷൻ ഏജന്റ് (ICE) വെനസ്വേലൻ സ്വദേശിയായ യുവാവിനെ വെടിവെച്ചു പരിക്കേൽപ്പിച്ച സംഭവം കനത്ത പ്രതിഷേധത്തിന് വഴിവെക്കുന്നു. ഞായറാഴ്ച ഉച്ചയ്ക്ക് ഒരു മണിയോടെ നഗരത്തിന്റെ വടക്കൻ മേഖലയിലാണ് നാടകീയമായ സംഭവങ്ങൾ അരങ്ങേറിയത്. ഗുരുതരമായി പരിക്കേറ്റ യുവാവിനെ ഐസ് അധികൃതർ രഹസ്യമായി കസ്റ്റഡിയിലെടുത്തത് സുതാര്യതയെക്കുറിച്ചുള്ള ആശങ്കകൾ വർദ്ധിപ്പിച്ചിരിക്കുകയാണ്.
28-കാരനായ വെനസ്വേലൻ പൗരൻ വിൽബർ റാഫേൽ ഗാർസെസ് പെരസിനാണ് വെടിയേറ്റത്. യുവാവിന്റെ നെഞ്ചിൽ ഒരു തവണ വെടിയേറ്റതായി ഓസ്റ്റിൻ-ട്രാവിസ് കൗണ്ടി ഇ.എം.എസ് ചീഫ് റോബർട്ട് ലക്രിറ്റ്സ് അറിയിച്ചു. നിലവിൽ യൂണിവേഴ്സിറ്റി ഓഫ് ടെക്സാസിലെ ഡെൽ സെറ്റൺ മെഡിക്കൽ സെന്ററിൽ പ്രവേശിപ്പിക്കപ്പെട്ട യുവാവിന്റെ ആരോഗ്യനില ഗുരുതരമാണെങ്കിലും തൃപ്തികരമാണെന്ന് ഓസ്റ്റിൻ മേയർ കിർക്ക് വാട്സൺ വ്യക്തമാക്കി.
കടുത്ത വേദനയാൽ നിലവിളിച്ചുകൊണ്ട് പെരസ് ആശുപത്രിയിൽ നിന്ന് ഭാര്യയെ ഫോണിൽ ബന്ധപ്പെട്ടിരുന്നുവെന്ന് അദ്ദേഹത്തിന്റെ അഭിഭാഷക കേറ്റ് ലിങ്കൺ-ഗോൾഡ്ഫിഞ്ച് വെളിപ്പെടുത്തി. എന്നാൽ ഏകദേശം ആറ് മണിക്കൂറോളം ആശുപത്രിയിൽ തടഞ്ഞുവെച്ച ശേഷം പെരസിനെ രഹസ്യമായി ഐസ് (ICE) കസ്റ്റഡിയിലേക്ക് മാറ്റിയതായി അഭിഭാഷക ആരോപിച്ചു. യുവാവിന്റെ നിലവിലെ അവസ്ഥയെക്കുറിച്ചോ എവിടെയാണെന്നതിനെക്കുറിച്ചോ കൃത്യമായ വിവരങ്ങൾ നൽകാൻ അധികൃതർ തയ്യാറാകുന്നില്ലെന്നും, ബന്ധുക്കളെ കാണാൻ അനുവദിക്കുന്നില്ലെന്നും കാണിച്ച് കുടുംബം രംഗത്തെത്തിയിട്ടുണ്ട്.
നാടുകടത്തൽ ഉത്തരവുള്ളതും അമേരിക്കയിൽ അനധികൃതമായി താമസിക്കുന്നതുമായ വ്യക്തിയെ പിടികൂടാനാണ് തങ്ങൾ എത്തിയതെന്നാണ് ഫെഡറൽ നിയമപാലകരുടെ വാദം. എന്നാൽ പെരസ് നിയമപരമായാണ് രാജ്യത്ത് പ്രവേശിച്ചതെന്ന് അദ്ദേഹത്തിൻ്റെ അഭിഭാഷക വ്യക്തമാക്കി.
സംഭവത്തിൽ തദ്ദേശീയ പൊലീസിന് പങ്കില്ലെന്ന് ഓസ്റ്റിൻ പൊലീസ് ചീഫ് ലിസ ഡേവിസ് വ്യക്തമാക്കി. പ്രാഥമിക വിവരമനുസരിച്ച് കാൽനടയായി പിന്തുടരുന്നതിനിടയിലാണ് വെടിവെപ്പുണ്ടായതെന്ന് പൊലീസ് പറയുമ്പോഴും സിറ്റി കൗൺസിൽ അംഗം മൈക്ക് സീഗൽ ഇതിനെ തള്ളി രംഗത്തുവന്നു. ഐസ് ഓഫീസർ തന്റെ ഫെഡറൽ വാഹനം ഉപയോഗിച്ച് യുവാവിന്റെ ടൊയോട്ട കൊറോള കാർ ഇടിച്ചുതെറിപ്പിച്ച ശേഷം പുറത്തിറങ്ങി അഞ്ചിലധികം തവണ വെടിയുതിർക്കുകയായിരുന്നു എന്നാണ് അദ്ദേഹം ആരോപിക്കുന്നത്. സംഭവസ്ഥലത്തുണ്ടായിരുന്ന കാറിന്റെ ഡോറുകളിൽ വെടിയുണ്ടകൾ തുളച്ചുകയറിയ പാടുകൾ കണ്ടെത്തിയിട്ടുണ്ട്.
സാധാരണയായി ഇത്തരം ഫെഡറൽ വെടിവെപ്പുകൾ എഫ്.ബി.ഐ (FBI) ആണ് അന്വേഷിക്കാറുള്ളത്. എന്നാൽ ഈ കേസിൽ ഐസിന്റെ തന്നെ ആഭ്യന്തര വിഭാഗമായ ഹോംലാൻഡ് സെക്യൂരിറ്റി ഇൻവെസ്റ്റിഗേഷൻസിന് (HSI) അന്വേഷണ ചുമതല നൽകിയത് വലിയ രാഷ്ട്രീയ-നിയമ തർക്കങ്ങൾക്ക് കാരണമായിട്ടുണ്ട്.
സംഭവത്തെ തുടർന്ന് ട്രംപ് ഭരണകൂടത്തിന്റെ കൂട്ട നാടുകടത്തൽ നയങ്ങൾക്കെതിരെ കനത്ത പ്രതിഷേധമാണ് ഉയരുന്നത്. കഴിഞ്ഞ ജൂലൈയിൽ ഹൂസ്റ്റണിലും മെയ്നിലും സമാനമായ രീതിയിൽ ഐസ് ഏജന്റുമാരുടെ വെടിയേറ്റ് രണ്ട് കുടിയേറ്റക്കാർ കൊല്ലപ്പെട്ടിരുന്നു.
ഇമിഗ്രേഷൻ ഏജൻസിയുടെ സുതാര്യതയെ ജനപ്രതിനിധികൾ ശക്തമായി ചോദ്യം ചെയ്തു. ഐസിന്റെ മുൻകാല നടപടികളെ വിശ്വസിക്കാൻ കൊള്ളില്ലെന്നും, സംഭവത്തിന്റെ ബോഡി ക്യാമറ ദൃശ്യങ്ങൾ ഉടനടി പുറത്തുവിട്ട് സുതാര്യവും സ്വതന്ത്രവുമായ അന്വേഷണം ഉറപ്പാക്കണമെന്നും യു.എസ് കോൺഗ്രസ് അംഗം ഗ്രെഗ് കാസറും ഡെമോക്രാറ്റിക് സെനറ്റ് സ്ഥാനാർത്ഥി ജെയിംസ് തലരിക്കോയും ആവശ്യപ്പെട്ടു. ഏജൻസിയുടെ വിശ്വാസ്യത നഷ്ടപ്പെട്ടതായും ഓസ്റ്റിൻ ജനതയ്ക്ക് സത്യമറിയാൻ അവകാശമുണ്ടെന്നും മേയർ കിർക്ക് വാട്സൺ കൂട്ടിച്ചേർത്തു.
Immigration officers shot and wounded a young Venezuelan man in Texas; circumstances surrounding his detention raise questions, prompting calls for an independent investigation.
