മെലാനിയ ട്രംപിന് ഡോണൾഡ് ട്രംപിന്റെ പരിപാടികളിൽ പങ്കെടുക്കാൻ പണം നൽകുന്നുണ്ടോ? അവകാശവാദമുയർത്തി മുൻ വൈറ്റ് ഹൗസ് ഉദ്യോഗസ്ഥ

വാഷിങ്ടൺ: മുൻ അമേരിക്കൻ പ്രഥമ വനിത മെലാനിയ ട്രംപിന്റെ പൊതുപങ്കാളിത്തവുമായി ബന്ധപ്പെട്ട് പുതിയ അവകാശവാദം. ഡോണൾഡ് ട്രംപിന്റെ ആദ്യ ഭരണകാലത്ത് മെലാനിയ വൈറ്റ് ഹൗസിൽ നിന്ന് ഏറെ അകന്നുനിന്നിരുന്നുവെന്ന് മുൻ വൈറ്റ് ഹൗസ് ഡെപ്യൂട്ടി പ്രസ് സെക്രട്ടറി സാറ മാത്യൂസ് ആരോപിച്ചു. MeidasTouchന്റെ ‘On Sunday with Jack Cocchiarella’ പോഡ്കാസ്റ്റിൽ സംസാരിക്കവെയാണ് മെലാനിയയ്ക്ക് തിരഞ്ഞെടുപ്പ് പ്രചാരണ പരിപാടികളിൽ പങ്കെടുക്കാൻ പ്രതിഫലം നൽകിയിരുന്നുവെന്ന് മാത്യൂസ് അവകാശപ്പെട്ടത്.

ട്രംപിന്റെ 2020ലെ തിരഞ്ഞെടുപ്പ് പ്രചാരണത്തിൽ പ്രവർത്തിച്ച മാത്യൂസ് പിന്നീട് വൈറ്റ് ഹൗസ് ഡെപ്യൂട്ടി പ്രസ് സെക്രട്ടറിയായി ചുമതലയേറ്റിരുന്നു. 2021 ജനുവരി 6ന് ക്യാപിറ്റോളിലുണ്ടായ ആക്രമണത്തിന് പിന്നാലെയാണ് അവർ സ്ഥാനമൊഴിഞ്ഞത്. വൈറ്റ് ഹൗസിൽ ഭരണകൂടവുമായി അടുത്ത് പ്രവർത്തിച്ചിരുന്നിട്ടും തന്റെ കാലയളവിൽ മെലാനിയയെ ഒരിക്കൽ പോലും നേരിൽ കണ്ടിട്ടില്ലെന്ന് മാത്യൂസ് പറഞ്ഞു. ഒരു വർഷം പ്രചാരണ സംഘത്തിലും പിന്നീട് വൈറ്റ് ഹൗസിലും ജോലി ചെയ്തപ്പോൾ ഞാൻ നേരിൽ കാണാത്ത ഏക വ്യക്തി മെലാനിയ ട്രംപായിരുന്നുവെന്ന് മാത്യൂസ് പറഞ്ഞു.

മെലാനിയയ്ക്ക് വൈറ്റ് ഹൗസിൽ കഴിയാൻ താൽപര്യമില്ലായിരുന്നുവെന്നത് അറിയപ്പെടുന്ന കാര്യമായിരുന്നു എന്നും അവർ അവകാശപ്പെട്ടു. വൈറ്റ് ഹൗസിൽ താമസിക്കുന്നതിനേക്കാൾ ന്യൂയോർക്കിൽ സമയം ചെലവഴിക്കുന്നതിനാണ് മെലാനിയ താൽപര്യം കാണിച്ചിരുന്നതെന്നും വൈറ്റ് ഹൗസിനെ അവർ പഴയതും തകർന്നുകൊണ്ടിരിക്കുന്നതുമായ കെട്ടിടം എന്ന് വിശേഷിപ്പിച്ചിരുന്നുവെന്നും മാത്യൂസ് പറഞ്ഞു.

ട്രംപിനൊപ്പം തിരഞ്ഞെടുപ്പ് പ്രചാരണ പരിപാടികളിൽ പങ്കെടുക്കുന്നതിന് മെലാനിയയ്ക്ക് പണം ലഭിച്ചിരുന്നുവെന്നും മാത്യൂസ് അവകാശപ്പെട്ടു. എന്നാൽ ഇതിന് തെളിവുകളൊന്നും അവർ ഹാജരാക്കിയിട്ടില്ല. പ്രചാരണ കാലത്ത് പരിപാടികളിൽ പങ്കെടുക്കുന്നതിന് മെലാനിയയ്ക്ക് പ്രതിഫലം ലഭിച്ചിരുന്നുവെന്ന് റിപ്പോർട്ടുകളുണ്ടായിരുന്നുവെന്ന് മാത്യൂസ് പറഞ്ഞു. എന്നാൽ, അവകാശവാദം സ്ഥിരീകരിച്ചിട്ടില്ല.

അടുത്തിടെ വൈറ്റ് ഹൗസിലെ റോസ് ഗാർഡനിൽ നടന്ന ‘Fostering the Future’ പരിപാടിയിൽ മെലാനിയ പങ്കെടുത്തിരുന്നു. നേരത്തെ തന്നെ മെലാനിയ പരസ്യമായി പിന്തുണച്ചിരുന്ന സംരംഭമാണിത്. ഒരു മാസത്തിലേറെയായി പൊതുപരിപാടികളിൽ നിന്ന് വിട്ടുനിന്ന ശേഷമായിരുന്നു മെലാനിയയുടെ ഈ തിരിച്ചുവരവ്.

ട്രംപിന്റെ എക്സിക്യൂട്ടീവ് അസിസ്റ്റന്റ് നതാലി ഹാർപ്പിനെക്കുറിച്ചുള്ള റിപ്പോർട്ടുകൾ ശ്രദ്ധ നേടിത്തുടങ്ങിയതിന് പിന്നാലെയായിരുന്നു മെലാനിയയുടെ പരിപാടിയിലെ പങ്കാളിത്തമെന്നതും ശ്രദ്ധേയമാണെന്ന് മാത്യൂസ് പറഞ്ഞു. ഹാർപ്പിന് ട്രംപുമായി അടുത്ത പ്രവർത്തനബന്ധമുണ്ടെന്ന റിപ്പോർട്ടുകളാണ് അടുത്തിടെ പുറത്തുവന്നത്. ഈ റിപ്പോർട്ടുകളിൽ മെലാനിയ അസന്തുഷ്ടയായിരിക്കാമെന്നും മാത്യൂസ് ഊഹം പ്രകടിപ്പിച്ചു. ട്രംപിന്റെ രണ്ടാം ഭരണകാലത്ത് മെലാനിയ താരതമ്യേന കുറച്ച് പൊതുപരിപാടികളിൽ മാത്രമാണ് പങ്കെടുത്തതെന്ന് ‘ദ ഡെയിലി ബീസ്റ്റ്’ നേരത്തെ റിപ്പോർട്ട് ചെയ്തിരുന്നു.

പ്രസിദ്ധീകരണത്തിന്റെ വിശകലനം അനുസരിച്ച് ശരാശരി ആറ് ദിവസത്തിലൊരിക്കൽ മാത്രമാണ് മെലാനിയ പൊതുപരിപാടിയിൽ പ്രത്യക്ഷപ്പെട്ടത്. വേനൽക്കാലത്ത് ഇത് ഏകദേശം 12 ദിവസത്തിലൊരിക്കൽ എന്ന നിലയിലേക്ക് കുറഞ്ഞതായും റിപ്പോർട്ടിൽ പറയുന്നു. സമാന കാലയളവിൽ മുൻ പ്രഥമ വനിത മിഷേൽ ഒബാമ നടത്തിയതിനേക്കാൾ വളരെ കുറച്ച് പ്രസംഗങ്ങൾ മാത്രമാണ് മെലാനിയ നടത്തിയതെന്നും റിപ്പോർട്ടുണ്ട്.

ഓഗസ്റ്റ് 23ന് വാഷിങ്ടൺ ഡിസിയിൽ നടന്ന ‘Freedom 250’ IndyCar മത്സരത്തിനിടെ മെലാനിയ പുറത്തുപോകുന്നതായി അവകാശപ്പെടുന്ന ഒരു വീഡിയോയും എക്സിൽ പ്രചരിച്ചിരുന്നു. നതാലി ഹാർപ്പ് സമീപത്തെ വിഐപി ബോക്സിൽ പ്രത്യക്ഷപ്പെട്ടതിന് പിന്നാലെ മെലാനിയ അവിടെനിന്ന് പോയതായി @donkoclock എന്ന അക്കൗണ്ടിൽ പങ്കുവച്ച വീഡിയോയിൽ അവകാശപ്പെടുന്നു.

“നതാലി ഹാർപ്പ് ബോക്സിൽ പ്രത്യക്ഷപ്പെട്ട ഉടൻ മെലാനിയ പോകുന്നു” എന്നായിരുന്നു പോസ്റ്റിന്റെ അടിക്കുറിപ്പ്. വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചെങ്കിലും മെലാനിയ അവിടെനിന്ന് പോയതിന്റെ യഥാർഥ കാരണമോ വീഡിയോയുടെ പൂർണ പശ്ചാത്തലമോ സ്ഥിരീകരിച്ചിട്ടില്ല.

Is Melania Trump paid to attend Donald Trump’s events? What former White House aide claims