മുൻ രാഷ്ട്രപതിയും കോൺഗ്രസ് നേതാവുമായിരുന്ന പ്രണബ് മുഖർജിക്ക് പ്രധാനമന്ത്രിയാകാൻ ആഗ്രഹമുണ്ടായിരുന്നെന്നും അത് തന്നോട് സൂചിപ്പിച്ചത് ഞെട്ടലുണ്ടാക്കിയെന്നും വിപണിയിലെത്തിയ തന്റെ ആത്മകഥയായ ‘ബിലോങ്ങിങ്: എ ജേർണി ഓഫ് ലവ്’ എന്ന പുസ്തകത്തിലൂടെ സോണിയ ഗാന്ധി വെളിപ്പെടുത്തി. രാജീവ് ഗാന്ധിയുമായുള്ള പ്രണയം, വിവാഹം, കുടുംബത്തിലെ ദുരന്തങ്ങൾ, രാഷ്ട്രീയ പ്രവേശം എന്നിവ വിശദീകരിക്കുന്ന പുസ്തകത്തിലാണ് സോണിയ ഇക്കാര്യം പരാമർശിച്ചിരിക്കുന്നത്. 2010-ൽ ധനമന്ത്രി പി. ചിദംബരവുമായുള്ള അഭിപ്രായവ്യത്യാസങ്ങൾ പ്രകടിപ്പിച്ച പ്രണബ്, ഏറ്റവും ഉയർന്ന പദവിയിൽ മാറ്റത്തിന് സമയമായെന്ന നിർദേശം മുന്നോട്ടുവെച്ചതിനെയാണ് താൻ പ്രധാനമന്ത്രിയാകാനുള്ള ആഗ്രഹത്തിന്റെ സൂചനയായി കണ്ടതെന്നും തന്ത്രപരമായി ആ വിഷയം മാറ്റുകയായിരുന്നുവെന്നും സോണിയ പുസ്തകത്തിൽ വ്യക്തമാക്കുന്നു.
സർക്കാരുമായുള്ള ഏകോപനത്തിനും പാർലമെന്റിൽ ചർച്ച ചെയ്യേണ്ട വിഷയങ്ങൾ തീരുമാനിക്കാനും പ്രധാനമന്ത്രിയോടൊപ്പം ആഴ്ചതോറും യോഗം ചേർന്നിരുന്ന കോർ ഗ്രൂപ്പിൽ പ്രണബ് മുഖർജിയെ കൂടാതെ അർജുൻ സിങ്, എ.കെ. ആന്റണി, അഹമ്മദ് പട്ടേൽ എന്നിവർ അംഗങ്ങളായിരുന്നുവെന്നും പുസ്തകത്തിലുണ്ട്. ആഗ്രഹഭംഗം ഉണ്ടായെങ്കിലും പ്രണബ് അത് മനസ്സിൽ വെച്ചുകൊണ്ട് പെരുമാറിയിരുന്നില്ലെന്നും, തുടർന്ന് 2012-ൽ കോൺഗ്രസ് അദ്ദേഹത്തെ യുപിഎയുടെ രാഷ്ട്രപതി സ്ഥാനാർഥിയായി നാമനിർദേശം ചെയ്യുകയും അദ്ദേഹം തിരഞ്ഞെടുക്കപ്പെടുകയും ചെയ്തുവെന്നും സോണിയ കുറിക്കുന്നു.
അതേസമയം, സോണിയാ ഗാന്ധിയുടെ പരാമർശങ്ങൾക്ക് മറുപടിയുമായി പ്രണബ് മുഖർജിയുടെ മകൾ ശർമ്മിഷ്ഠ മുഖർജി രംഗത്തെത്തി. പതിറ്റാണ്ടുകളുടെ രാഷ്ട്രീയ, ഭരണപരിചയവും കഠിനാധ്വാനവും ബുദ്ധിയുമുള്ള ഒരാൾക്ക് പ്രധാനമന്ത്രിയാകാൻ ആഗ്രഹമുണ്ടാകുന്നതിൽ ഞെട്ടേണ്ട കാര്യം എന്താണെന്നും അത് ഒരു കുറ്റമാണോ എന്നും ശർമ്മിഷ്ഠ ചോദ്യമുയർത്തി. ഗാന്ധി-നെഹ്‌റു കുടുംബത്തിന് പുറത്തുള്ള ഒരാൾ ഇത്തരമൊരു ആഗ്രഹം വെച്ചുപുലർത്തുകയും അത് തുറന്നുപറയുകയും ചെയ്തതുകൊണ്ടാണോ സോണിയാ ഗാന്ധിക്ക് ഞെട്ടലുണ്ടായതെന്നും അവർ ചോദിച്ചു.
കുടുംബപരമായ അവകാശങ്ങളിലൂടെ താലത്തിൽ വെച്ചുനീട്ടിയ പദവികളല്ല, മറിച്ച് സ്വന്തം കഴിവിലൂടെയും അധ്വാനത്തിലൂടെയുമാണ് തന്റെ പിതാവ് ഉയർന്നുവന്നതെന്ന് ശർമ്മിഷ്ഠ കൂട്ടിച്ചേർത്തു. സോണിയാ ഗാന്ധിയോടോ മറ്റാരോടെങ്കിലുമോ പിതാവിന് വിരോധമൊന്നും ഉണ്ടായിരുന്നില്ലെന്നും, രാഷ്ട്രീയത്തിലെ അരക്ഷിതാവസ്ഥയും അതിനുപിന്നിലെ കാരണങ്ങളും കൃത്യമായി മനസ്സിലാക്കാൻ ശേഷിയുള്ള പ്രായോഗിക നേതാവായിരുന്നു പ്രണബ് മുഖർജിയെന്നും അവർ വ്യക്തമാക്കി.
