
ആലപ്പുഴ: മുഖ്യമന്ത്രിയെ സ്വതന്ത്രമായി ഭരിക്കാൻ അനുവദിക്കണമെന്നും, അദ്ദേഹത്തെ വെല്ലുവിളിക്കുന്ന മന്ത്രിമാർ ആ സ്ഥാനത്ത് തുടരാൻ പാടില്ലെന്നും ജി. സുധാകരൻ എം.എൽ.എ ആവശ്യപ്പെട്ടു. മുഖ്യമന്ത്രിയുടെ വിശ്വാസമാർജ്ജിച്ചവരാണ് മന്ത്രിസഭയിൽ എത്തുന്നതെന്നും, മുഖ്യമന്ത്രിക്കെതിരെ പരസ്യപ്രസ്താവന നടത്തുന്ന മന്ത്രിമാരെ ഉടൻ പുറത്താക്കുകയാണ് വേണ്ടതെന്നും അദ്ദേഹം ചൂണ്ടിക്കാട്ടി. എന്നാൽ രാഷ്ട്രീയ സാഹചര്യങ്ങൾ കണക്കിലെടുത്ത് പല വശങ്ങളും ആലോചിക്കേണ്ടതുള്ളതുകൊണ്ടാണ് മുഖ്യമന്ത്രി അത്തരമൊരു കടുത്ത നടപടിയിലേക്ക് കടക്കാത്തതെന്നും സുധാകരൻ അഭിപ്രായപ്പെട്ടു.
പാർലമെൻ്റ് അംഗത്വം പോലെയുള്ള ഉന്നത പദവികൾ വഹിക്കുന്നവർക്ക് സംസ്ഥാന മന്ത്രിസഭയിൽ മന്ത്രിയാകാൻ ആഗ്രഹം തോന്നുന്നത് വിചിത്രമാണെന്നും ജി. സുധാകരൻ വിമർശിച്ചു. സംസ്ഥാന മന്ത്രിസഭയേക്കാൾ എത്രയോ വലിയ പദവിയാണ് പാർലമെൻ്റ് അംഗത്വമെന്നും, ഇത്തരത്തിലുള്ള പ്രവണതകൾ മുൻപൊന്നും കേട്ടുകേൾവിയില്ലാത്തതാണെന്നും അദ്ദേഹം കൂട്ടിച്ചേർത്തു.
ആലപ്പുഴ ബീച്ചിലെ വികസന പ്രവർത്തനങ്ങൾ വിലയിരുത്താനെത്തിയ സുരേഷ് ഗോപിക്കെതിരെയും ജി. സുധാകരൻ രൂക്ഷവിമർശനം ഉന്നയിച്ചു. തൻ്റെ നിയോജക മണ്ഡലത്തിൽ ഉൾപ്പെട്ട പ്രദേശത്ത് വികസന പ്രവർത്തനങ്ങൾ വിലയിരുത്താനെത്തിയ കാര്യം സ്ഥലം എം.എൽ.എയായ തന്നെ അറിയിച്ചില്ലെന്ന് അദ്ദേഹം ആരോപിച്ചു. തന്നെ അറിയിക്കാതെ മണ്ഡലത്തിൽ സന്ദർശനം നടത്താൻ സുരേഷ് ഗോപിക്ക് എങ്ങനെ ധൈര്യം വന്നുവെന്നും സുധാകരൻ ചോദിച്ചു.
Ministers Challenging the CM VD Satheesan Should Step Down G Sudhakaran Also Criticizes Suresh Gopi













