കെന്റക്കി: യുഎസ് ഇടക്കാല തെരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ, കെന്റക്കിയിലെ സെനറ്റ് തെരഞ്ഞെടുപ്പിൽ ഡെമോക്രാറ്റിക് പാർട്ടി സ്ഥാനാർത്ഥി ചാർലസ് ബുക്കർക്ക് പിന്തുണ പ്രഖ്യാപിച്ച് മുൻ യുഎസ് പ്രസിഡന്റ് ബരാക് ഒബാമ. കെന്റക്കിയിലെ സാധാരണക്കാരായ ജനങ്ങളുടെ പ്രശ്നങ്ങൾ അടുത്തറിയുന്ന ബുക്കർ, അവർക്ക് വേണ്ടി വാഷിംഗ്ടണിൽ ശബ്ദമുയർത്താൻ പ്രാപ്തനായ നേതാവാണെന്ന് ഒബാമ പ്രസ്താവനയിൽ വ്യക്തമാക്കി.
റിപ്പബ്ലിക്കൻ പാർട്ടിയുടെ പ്രമുഖ നേതാവും നിലവിലെ പ്രതിനിധിയുമായ ആൻഡി ബാര് ആണ് ബുക്കറുടെ പ്രധാന എതിരാളി. 84-കാരനായ പ്രമുഖ സെനറ്റർ മിച്ച് മക്കോണൽ വിരമിക്കൽ പ്രഖ്യാപിച്ചതിനെ തുടർന്നാണ് ഈ സീറ്റിലേക്ക് ശക്തമായ മത്സരം നടക്കുന്നത്. ഒബാമയുടെ പിന്തുണ തനിക്ക് വലിയ ആവേശവും അഭിമാനവും നൽകുന്നുവെന്ന് ചാർലസ് ബുക്കർ പ്രതികരിച്ചു.
ഡെമോക്രാറ്റിക് പാർട്ടിക്ക് പരമ്പരാഗതമായി ശക്തമായ വേരോട്ടമില്ലാത്ത കെന്റക്കിയിൽ വിജയം നേടാനായാൽ അത് യുഎസ് സെനറ്റിന്റെ നിയന്ത്രണം പിടിച്ചെടുക്കുന്നതിൽ നിർണ്ണായക വഴിത്തിരിവാകുമെന്നാണ് വിലയിരുത്തൽ. തെരഞ്ഞെടുപ്പ് പ്രചാരണം അന്തിമഘട്ടത്തിലെത്തിനിൽക്കെ ഒബാമയുടെ പിന്തുണ ഡെമോക്രാറ്റിക് ക്യാമ്പയിന് വലിയ ഊർജ്ജം നൽകിയിട്ടുണ്ട്.
