സംസ്ഥാനത്ത് നിലവിലുള്ള ചട്ടങ്ങൾ പൂർണ്ണമായി ലംഘിച്ചുകൊണ്ട് ബാർ ലൈസൻസുകൾ അനുവദിച്ച സംഭവത്തിൽ സിബിഐ അന്വേഷണം ആവശ്യപ്പെട്ട് ഹൈക്കോടതിയിൽ പൊതുതാൽപ്പര്യ ഹർജി. കൊല്ലം ഡിഡിസി സെക്രട്ടറി എം എം സഞ്ജീവ് ആണ് കോടതിയെ സമീപിച്ച് ഹർജി നൽകിയിരിക്കുന്നത്. ത്രീ സ്റ്റാർ മുതൽ ഫൈവ് സ്റ്റാർ വരെയുള്ള പദവിയുള്ള ഹോട്ടലുകൾക്ക് മാത്രമേ ബാർ ലൈസൻസുകൾ അനുവദിക്കാവൂ എന്ന കർശനമായ ചട്ടം രണ്ടാം പിണറായി സർക്കാർ പരസ്യമായി ലംഘിച്ചെന്നാണ് ഹർജിയിലെ പ്രധാന ആരോപണം.
സംസ്ഥാനത്തുടനീളം ഇത്തരത്തിൽ ചട്ടവിരുദ്ധമായി നൂറ്റിനാൽപ്പത്തിയേഴോളം ബാർ ലൈസൻസുകൾ അനധികൃതമായി നൽകിയിട്ടുണ്ടെന്നാണ് ഹർജിക്കാരൻ ഉന്നയിക്കുന്ന ആക്ഷേപം. മുൻ എക്സൈസ് മന്ത്രിയുടെ ഓഫീസിന്റെ നേരിട്ടുള്ള ഇടപെടലുകളിലൂടെയാണ് ഈ അനധികൃത ലൈസൻസുകളെല്ലാം അനുവദിച്ചതെന്നും ഹർജിയിൽ വ്യക്തമാക്കുന്നുണ്ട്.
മുൻ എക്സൈസ് മന്ത്രി എം ബി രാജേഷിന്റെ പ്രൈവറ്റ് സെക്രട്ടറിയായിരുന്ന എൻ ശശിധരൻ നായരെ എതിർകക്ഷിയാക്കിയാണ് കൊല്ലം ഡിഡിസി സെക്രട്ടറി കോടതിയിൽ പൊതുതാൽപ്പര്യ ഹർജി ഫയൽ ചെയ്തിരിക്കുന്നത്. ഈ വിഷയത്തിൽ സമഗ്രമായ സിബിഐ അന്വേഷണം വേണമെന്നാണ് ഹർജിയിലെ ആവശ്യം.
PIL Filed in High Court Seeking CBI Probe Into Unauthorized Bar License Allocations
