‘ക്ഷുദ്രശക്തികൾ എത്ര ശ്രമിച്ചാലും ഇന്ത്യയിൽ അട്ടിമറി ഉണ്ടാവില്ല’, കേന്ദ്രത്തിനെതിരായ പ്രക്ഷോഭങ്ങളെ തള്ളി ആർഎസ്എസ് മേധാവി, പ്രശംസിച്ച് മോദി; തിരിച്ചടിച്ച് രാഹുൽ

രാജ്യതലസ്ഥാനത്ത് കേന്ദ്ര സർക്കാരിനെതിരെ പ്രതിഷേധങ്ങൾ ശക്തമായി തുടരുന്നതിനിടയിൽ, സർക്കാരിന് പരസ്യ പിന്തുണയുമായി ആർ.എസ്.എസ് മേധാവി മോഹൻ ഭാഗവത് രംഗത്തെത്തി. നാഗ്പൂരിൽ നടന്ന ആർ.എസ്.എസിന്റെ വിജയദശമി പ്രസംഗത്തിലാണ് രാജ്യത്തെ പ്രക്ഷോഭങ്ങളെക്കുറിച്ചുള്ള അദ്ദേഹത്തിന്റെ പരാമർശങ്ങൾ ഉണ്ടായത്. ക്ഷുദ്രശക്തികൾ രാജ്യത്തെ ദുർബലപ്പെടുത്താനും ക്രമസമാധാനം തകർക്കാനും നിരന്തരം ശ്രമിക്കുന്നുണ്ടെങ്കിലും, എത്ര ശ്രമിച്ചാലും ഇന്ത്യയിൽ അട്ടിമറി നടക്കില്ലെന്ന് അദ്ദേഹം വ്യക്തമാക്കി. ബംഗ്ലാദേശ്, ഫ്രാൻസ്, അൽബേനിയ തുടങ്ങിയ രാജ്യങ്ങളിലെ അശാന്തി ചൂണ്ടിക്കാണിച്ച അദ്ദേഹം, പടിഞ്ഞാറുനിന്നുള്ള ചില ശക്തികൾ ഇതിന് പിന്നിൽ പ്രവർത്തിക്കുന്നുണ്ടെന്നും ആവർത്തിച്ചു മുന്നറിയിപ്പ് നൽകി.

ഇത്തരം പ്രതികൂല സാഹചര്യങ്ങളോ വിദേശ പിന്തുണയോടെയുള്ള നീക്കങ്ങളോ ഒന്നുംതന്നെ രാജ്യത്ത് ഭരണമാറ്റത്തിന് പര്യാപ്തമല്ലെന്ന് മോഹൻ ഭാഗവത് ആത്മവിശ്വാസം പ്രകടിപ്പിച്ചു. രാജ്യത്തിന്റെ സുസ്ഥിരത തകർക്കാൻ ലക്ഷ്യമിട്ടുള്ള ബാഹ്യ ഇടപെടലുകളെ ചെറുത്തുതോൽപ്പിക്കാൻ സമൂഹം ജാഗ്രത പാലിക്കണമെന്നും അദ്ദേഹം ഓർമ്മിപ്പിച്ചു. കൂടാതെ, ഇന്നത്തെ യുവതലമുറ യാതൊരുവിധ വിവേചന ബുദ്ധിയുമില്ലാതെ കാണുന്ന ഒ.ടി.ടി പ്ലാറ്റ്‌ഫോമുകളിലെ ഉള്ളടക്കങ്ങൾക്ക് കർശനമായ നിയന്ത്രണം ഏർപ്പെടുത്തണമെന്നും ആർ.എസ്.എസ് ഈ അവസരത്തിൽ ആവശ്യപ്പെടുകയുണ്ടായി.

പ്രതിപക്ഷ കക്ഷികളുടെ ഐക്യം ശക്തമായി മുന്നേറുന്ന നിർണായക രാഷ്ട്രീയ സാഹചര്യത്തിലാണ് ആർ.എസ്.എസ് മേധാവി കേന്ദ്ര സർക്കാരിന് പരസ്യ പിന്തുണ പ്രഖ്യാപിച്ചിരിക്കുന്നത് എന്നത് ശ്രദ്ധേയമാണ്. മോഹൻ ഭാഗവതിന്റെ പ്രസംഗത്തെ പ്രശംസിച്ച് പ്രധാനമന്ത്രി നരേന്ദ്ര മോദി രംഗത്തെത്തുകയും ചെയ്തു. ആർ.എസ്.എസിന്റെ നൂറ്റിയൊന്നാം ജന്മദിനത്തോടനുബന്ധിച്ച് സംഘടനയുടെ നൂറുവർഷത്തെ രാഷ്ട്രനിർമ്മാണ സംഭാവനകളെ ഉൾക്കൊള്ളുന്നതാണ് ഈ പ്രസംഗമെന്ന് പ്രകീർത്തിച്ച പ്രധാനമന്ത്രി, ദേശീയ പുരോഗതിയിലും ഐക്യത്തിലും ഊന്നിയ വിശദമായ വീക്ഷണങ്ങളാണ് അദ്ദേഹം പങ്കുവെച്ചതെന്നും വ്യക്തമാക്കി.

അതേസമയം, ആർ.എസ്.എസിന്റെ നിലപാടുകളെ കടുത്ത ഭാഷയിൽ വിമർത്തിച്ചുകൊണ്ട് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി വീണ്ടും രംഗത്തെത്തി. സ്ത്രീകൾ പുരുഷന്മാരുടെ സ്വത്താണെന്ന് വിശ്വസിക്കുന്ന ഭരണഘടനാ വിരുദ്ധ നിലപാടാണ് ആർ.എസ്.എസിന്റേതെന്ന് അദ്ദേഹം ആരോപിച്ചു. താൻ ശിവശക്തിയിലാണ് വിശ്വസിക്കുന്നതെന്നും, ആർ.എസ്.എസിന്റെ ഭാഗമായ നിരവധി സ്ത്രീകളുടെ പിന്തുണ തനിക്കൊപ്പമുണ്ടെന്നും രാഹുൽ എക്സിൽ കുറിച്ചു. മോദിക്കും അമിത് ഷായ്ക്കുമൊപ്പം മുഖ്യ തെരഞ്ഞെടുപ്പ് കമ്മീഷണറെ നിയന്ത്രിക്കുന്നതിൽ മോഹൻ ഭാഗവതുമുണ്ടെന്ന ഗുരുതരമായ ആരോപണവും നേരത്തെ രാഹുൽ ഉന്നയിച്ചിരുന്നു.

RSS Chief Mohan Bhagwat Backs Government Amid Protests and Warns Against External Forces in Vijayadashami Speech