ജക്കാർത്ത: 240ലേറെ യാത്രക്കാരുമായി കിഴക്കൻ ജാവയിൽ നിന്ന് തെക്കൻ കലിമന്തൻ പ്രവിശ്യയിലേക്ക് പോയ ഇന്തോനേഷ്യൻ യാത്രാക്കപ്പലുമായുള്ള ബന്ധം നഷ്ടപ്പെട്ടതിനെ തുടർന്ന് ഇന്തോനേഷ്യൻ രക്ഷാപ്രവർത്തകർ തിരച്ചിൽ ആരംഭിച്ചു. ബോർണിയോ ദ്വീപിലെ തെക്കൻ കലിമന്തൻ പ്രവിശ്യയിലെ ബൻജർമസി നഗരത്തിലുള്ള സെർച്ച് ആൻഡ് റെസ്ക്യൂ ഓഫീസിന് പുലർച്ചെ രണ്ടുമണിയോടെയാണ് ‘വിർഗോ ട്രാൻസ്പോർട്ട് 8’ എന്ന കപ്പലുമായുള്ള ബന്ധം നഷ്ടപ്പെട്ടതായി വിവരം ലഭിച്ചത്. ഏകദേശം രണ്ട് മണിക്കൂറിന് ശേഷമാണ് അധികൃതർക്ക് റിപ്പോർട്ട് ലഭിച്ചത്. ഇന്തോനേഷ്യയിലെ കിഴക്കൻ ജാവ പ്രവിശ്യയിലെ രണ്ടാമത്തെ വലിയ നഗരമായ സുരബായയിൽ നിന്ന് ബൻജർമസിയിലേക്കായിരുന്നു കപ്പൽ പുറപ്പെട്ടത്.
കപ്പൽ മോശം കാലാവസ്ഥയിൽപ്പെട്ടതായി വിവരം ലഭിച്ചതിനെ തുടർന്നാണ് കപ്പൽ ഓപ്പറേറ്റർ അധികൃതരെ അറിയിച്ചതെന്ന് സെർച്ച് ആൻഡ് റെസ്ക്യൂ ഓഫീസ് മേധാവി ഐ പുതു സുഡായാന അറിയിച്ചു. കപ്പലിന്റെ അവസാനമായി ലഭിച്ച സ്ഥാനം ജാവാ കടലിലാണെന്നാണ് പ്രാഥമിക വിവരം. ബൻജർമസിയിലെ ഒരു തുറമുഖത്തിൽ നിന്ന് ഏകദേശം 148 കിലോമീറ്റർ അകലെയായിരുന്നു ഈ സ്ഥലം. കപ്പലിലെ യാത്രക്കാരുടെ പട്ടിക പ്രകാരം 241 പേരാണ് കപ്പലിലുണ്ടായിരുന്നത്. കപ്പൽ ഓപ്പറേറ്ററായ പി.ടി. വിർഗോ യോൽ റിഹിയാണ് കപ്പലുമായുള്ള ബന്ധം നഷ്ടപ്പെട്ട വിവരം അധികൃതരെ അറിയിച്ചത്. ശനിയാഴ്ച പ്രാദേശിക സമയം രാവിലെ 10.13ന് സുരബായയിൽ നിന്ന് കപ്പൽ പുറപ്പെട്ടതായും കമ്പനി അറിയിച്ചു.
തുടർന്ന് രക്ഷാപ്രവർത്തകരുടെ സംഘം ബൻജർമസിയിലെ ബസിരിഹ് സെർച്ച് ആൻഡ് റെസ്ക്യൂ തുറമുഖത്തേക്ക് എത്തി. കപ്പലിന്റെ അവസാനമായി ലഭിച്ച സ്ഥാനം കണക്കാക്കി അവിടേക്ക് ഒരു രക്ഷാകപ്പലും പുറപ്പെട്ടു.കപ്പലിൽ വലിയ തോതിൽ യാത്രക്കാരും ജീവനക്കാരും ഉണ്ടായിരുന്നതിനാൽ ലഭ്യമായ മുഴുവൻ രക്ഷാപ്രവർത്തകരെയും സംവിധാനങ്ങളെയും തിരച്ചിലിനായി വിന്യസിച്ചിട്ടുണ്ടെന്ന് തിരച്ചിലിന് നേതൃത്വം നൽകുന്ന സുഡായാന പറഞ്ഞു. സമുദ്രകാര്യ അധികൃതരുമായും മറ്റ് ബന്ധപ്പെട്ട ഏജൻസികളുമായും സഹകരിച്ചാണ് തിരച്ചിൽ നടത്തുന്നതെന്നും പ്രദേശത്തെ കാലാവസ്ഥാ സാഹചര്യം സൂക്ഷ്മമായി നിരീക്ഷിച്ചുവരികയാണെന്നും അദ്ദേഹം വ്യക്തമാക്കി.
Search underway for Indonesian passenger ship carrying more than 240 people after it loses contact
